[1] Maantooka etoo Laassaro layadeehe ilkerengeetti Be'daaniya yaal khannate. Albehi leeddesse too Maariya tahe too la Maarta tahe laka ilkerengeettaas Be'daaniya yaalliin.
[2] Maariyata la a ti 'dee Kamur miricchi luhlo kasubahto, tintiche la kahiyyaayto. Maariyatane walaalicheki Laassaro layadeeh khannate.
[3] Albeha isleedesse, Yeesso farniin i'diiche, “Kamur, aalaahki at weyti 'doonto a khannanyahe,” iyidah.
[4] Chirri us waha daage ka, Yeesso wihi us yidah, “Khannaata omoot ma kamassati. Khannaata a yateehe 'dee Waakh laweynaacha, 'dee khannaata ka Weeli Waakh laweynaacha.”
[5] Yeesso la Maarta ichoow walaassicheti Maariya layadeeh ichoow walaalichoki Laassaro layadeeh ba a 'doona.
[6] I'daasenyi inkoo us farniinkaas 'hele, us saggi Laassaro ikhannanyahe daage laka, Yeesso intaas us kajire ibeen lamma addane fiddiye.
[7] 'Deerka wihi us abattitiis iyidah, “Kaha, boroofenhi Ya'huudiya a inokhanni.”
[8] I'daasenyi abatti wihi iche Yeesso itidah, “Eti ween, ibeenneta dow on menya weynaanti Ya'huud dagah kaachibin leheete, kiigaasan leheet? Atihi toro intaas inokhatti 'doonta?”
[9] Yeesso wihi us ilaabe, “Orrahti maantoo kaldach saha'd tomon ichoow lamma ma khabto? Eti maalim sohti, ma tarraantarrati, i'di tahe etaas eti harrata banay siicho, iche arga.
[10] Chirri us ibeen sohti a tarraantarrata, a mehe banay ma khabo.”
[11] Yeesso inkoo us waha yidah ka, wihi us toro iyidah, “Aaleenki Laassaro layadeeh a ur'de, i'daasenyi an irda neybaacha.”
[12] Abattitiis wihi iche ilaabte, “Kamur, chirri us ur'do 'dee a deefsata on gon.”
[13] Yeesso la saggi rumanka Laassaro iyumuyye kaayyeeda, i'daasenyi abatti kol us wori ur'dumme on kayeyyeedo koogtahe.
[14] Yeesso 'deerka abatti ma kaaddaginne, “Laassaro a yumuy,” iyidah.
[15] “Toro la jeentetiin u, an a hamaada chirri maanti us yumuy an intaas ikajirin. Waha tuumman atine indigir atin ikhabaane, 'dee ani irummeysattaan. I'daasenyi kaaleya usu iiranni.”
[16] Toomashi Man'daan layadeeh, wihi us abattiti addan iyidah, “Inno tuumman eti ween raahno, 'dee inno tuumman a leetuunno.”
[17] Chirri Yeesso ilkerengeetti Be'daaniya soogele ka, saggi Laassaro ibeen affar kutte liihawwaale abte.
[18] Ilkerengeetti Be'daaniya la geeddi kiilomitta seyyahe ilkerengeetti weene Yeerusaleem ileejirta.
[19] 'Doo'di Ya'huude ittaawe la a yimiyye Maarta ichoow Maariya uur khoboocheen, jeenteti omoot walaalichuu.
[20] Chirri Maarta saggi Yeesso isoosohti daagte ka, bahte or kadowte. I'daasenyi Maariya goob ka'hadde.
[21] Maarta wihi iche Yeesso itidah, “Kamur, kootte at inta kajirte ka, walaaleey ma yamuut!
[22] I'daasenyi toolla laka saggi wihi tuummane at Waakh daahte Waakh kiyeelo, a garda.”
[23] Yeesso la wihi us iyidah, “Walaalaah omoot a kasookaha.”
[24] Maarta wihi iche ilaabte, “Saggi us ibeenki yomboot omoot ikasookaho a garda.”
[25] Yeesso la wihi us iyidah, “Ani enenyet omoot kasookahcha, toro jiro siicha. Eti tuummane ani irummeeste, chirri us yumuy laka jiro a 'hela.
[26] Eti tuummane toolla jiro, ani irummeeste la, jirtuu tuumman ma yamuut. At waha a rummeysatta?”
[27] Iche la wihi iche itidah, “Aa, Kamur, saggi at Ki Lasubhe itahe, at Weeli Waakhe goorat harrata yamiit itahe, a rummeesda.”
[28] Inkoo Maarta waha tidah ka, nokhatte, walaassicheti Maariya layadeeh 'dol iwahte wihi iche itidah, “Eti Ween kallaaye, ati laka a kiwaha.”
[29] Inkoo Maariya waha daagte ka, dowwa kahte Yeesso iiratte.
[30] Yeesso uliba ilkerengeet ma soogeline i'daasenyi inti kootte Maarta ka'hesse on kajira.
[31] 'Doo'di Ya'huude kootte Maariya leejire, uur khoboocho, chirra iche dowwa bahte ka, leebaheen. A mehe kol iche hawwaal iratti kooyto koogyahiin.
[32] Maariya inti Yeesso kajire sooeleesse, uus iche Yeesso agarte ka, luhlohiis ka jilbo il kagu'dubte, wihi iche tidah, “Kamur, kootte at inta kajirte ka, walaaleey ma yamuut.”
[33] Chirri Yeesso ichehi ooyto arge ka, 'doo'di Ya'huude leejiro laka usuhi ooyo arge, rubeye weyti uskulaatte, mal gele.
[34] Wihi us worsate, “Intoh kahawwaasseen?” Wihi icho ilaabeen, “Kamur, kaale agar.”
[35] Yeesso ooye.
[36] 'Doo'di Ya'huud la wihi us isiyidah, “Bal geeddi us Laassaro 'doono yeya!”
[37] I'daasenyi gaasoo mehe yidaaheen ya, “Eti indo laa goorat indo a haaggichee, a i'doh, Laassaro omoot ikaholin?”
[38] Yeesso toro weyti rubeye uskulaatte, hawwaassi go'denye daddaabtoo buure af lakorche hagga irte.
[39] Yeesso wihi us yidah, “Daddaab bahcha.” I'daasenyi Maartati Laassarohi yumuy leedelatte wihi iche tidah, “Kamur, kola a nuuhe, ibeen affar kutte lahawwaalee.”
[40] Yeesso la wihi us iyidah, “An kootte cha'at saggi waha iyateehiin rummeysatte weynaanti Waakh a agarta ma kiidaahan a?”
[41] Daddaab hawwaal afiche lakabahche. Yeesso 'deerka serey yeye, wihi us yidah, “Aabba, jeenteti at ani idaagtuu, kala'de kisoolaaba.
[42] Saggi at kol dakkhan idaagto a garda, i'daasenyi jeenteti 'doo'dane waha iadeehe, 'dee icho la saggi at ani isooergatte rummeestaan.”
[43] Inkoo us waha yidah ka weyti riire, “Laassaro, soobah!” yidah.
[44] Eti yumuy soobahe. Usuhi dahanohiis ichoow luhlohiis ba darfohi eti yumuy lakaayyuubo kaayyubanyahiin soobahe. Fool laka dafare kayuuban. Yeesso la wihi us 'doo'd iyidah, “Furfura, 'dee a irti.”
[45] 'Doo'di Ya'huude ittaawenye, Maariya bariito yimiy, wihi Yeesso yeele arge, Yeesso rummeeste.
[46] I'daasenyi gaasichokoo Farissaayo inokhteene, wihi Yeesso yeele icheekeen.
[47] Kuhaaniyyohi wewween ichoow Farissaayo ba Jaldaabti Weene Ya'huud tol iwaheen. Wihi icho worsateen, “Mehe yeello? Bal wahanyeyyoha ittaawenye miigti Waakh tuso eta yeelo yeya!
[48] Chirri inno usu 'diinne us sagga isossohti, 'doo'd tuumman usu a rummeesta. 'Deerka 'doo'di wewweene ili Rooma yamiite, minkeenki Waakhe buure ichoow yaafteen tuummamba baabiichaan.”
[49] Koo leejire Kayaafa layadeehe ullaka gu'haas ka kuhaanihi weyti weene sooyeede wihi us yidah, “Wohoo rucchul laka ma garattaan!
[50] Ichehi yaaf tuumman bakkatti ka, usuhi etoo kalday meessi 'doo'd tuumman kayamuut menya deefto?”
[51] Ulla waha us yidah, wihi usu kasoouummame mee. I'daasenyi jeenteti us gu'haas ka kuhaanihi weyti ween iyahe, iche wori Waakhe saggi Yeesso meessi yaafohi Ya'huud ikayamuut ikaayyeede.
[52] Toro la Yeesso jeenteti yaaftaas kalday on ma iyamuute, i'daasenyi jeenteti nyaakhuti Waakhe taasane iyamuute, 'dee 'doo'di harra tuumman isikeena, wohoo kalday kayeela.
[53] Uus maalinkaas la, weynaanti Ya'huud tossatte, jiti iche Yeesso katagiis yowatte.
[54] Maantaka Yeesso inti yaafohi Ya'huud kaargaan ma kaassahan. Yeesso intaas katabe, abattitiis khabaayi irte, ilkerengeettoo hidaad haggeenye Efireem layadeeh irte, fiddiye.
[55] Maanti Daawti Ya'huude Baasakka lahaaggicho soodowwaatte ka, 'doo'di ittaawe ilicho kabahe, ilkerengeetti weene Yeerusaleem ikore, daawtichoti Isladikho Baasakka orcheenye gelaanee.
[56] Icho tuumman la Yeesso yowtaan. Chirri icho minki Waakhe buure yimaateen ka, wihi icho isworsateen, “Atin maanta kol us daawta yamiite koogtahiin?”
[57] I'daasenyi kuhaaniyyohi wewween ichoow Farissaayo amur bahcheene, chi' etoo inti Yeesso kajiro garti, a soocheeko, 'dee a khabteen.