[1] Baryoti boorane ibeenki oraate teebataas ka, Maariyati ilkerengeetti Magdaala go'ddi Yeesso lakahawwaale ijedde, saggi daddaab meel afiche liikabahche agarte.
[2] 'Deerka Siimonhi Beetero layadeeh ichoow eti ullaka abatteenye Yeesso weyti 'doono isoonyaante wihi iche itidah, “Kamur go'd goya a lakabahche, inti lagesse la ma garanni.”
[3] 'Deerka Beetero ichoow eti abatteenye addan ba anki go'd tabeen.
[4] Abatti lammache ba a oriita, i'daasenyi eti addan Beetero kelee luh ka'hele, go'd orey eleele.
[5] Go'd kagulguubsate, goya yeye, darfo kalday arge, i'daasenyi go'd goya ma gelin.
[6] 'Dubiis ka Siimonhi Beetero layadeeh yimiy. Ulla a yiri'd one go'd goya gele, darfohi meel yaal arge.
[7] Dafarti Yeesso matah kayuyyuubneet laka ichehi layuyyuube intoo keley taal arge.
[8] 'Da'ddaboka eti abatteenye kootte go'd orey eleele laka goya gele, arge rummeeste.
[9] Icho uliba Chiirnaanneti Waakh ka saggi Yeesso omoot ikasookaho ma garan.
[10] Abatti lammache ba 'deerka goobassicho inokhatte.
[11] I'daasenyi Maariya go'd khariche tolossatte ooyte. Ooytaayi gulguubsatte, go'd goya yeyte.
[12] Herti Waakhe lammeenye gaaddi daddakhan khabto inti sar Yeesso tiil fiddiito, agarte. Hertaas Waakh la too, inti matah kijire iche fiddiita, too la inti luhlo kajireene fiddiita.
[13] Herti Waakh wihi iche Maariya worsatte, “Weela a i'doh iooyta?” Maariya la wihi iche tidah, “Sar Kamuraaya lakhaate, inti lagesse la ma gardi!”
[14] Waha ka urgiite, Yeessohi intaas toollo agarte. I'daasenyi saggi us Yeesso iyahe ma kasin.
[15] Yeesso la wihi usu iyidah, “Weela a i'doh iooyta? Ayyo yowatta?” Iche la kol eta ki gos hil kahaaggicho yahe koogtahe, wihi iche tidah, “Eti ween, chirri at sartiis khaatte, inti at gelisse isoocheeke, a irdi a sookhaato.”
[16] Yeesso wihi usu iyidah, “Maariya.” Iche la urgiite, riirte afi Ibiraaniya ka “Rabbooni,” tidah. Ayta chi' lalaabe a eti ween.
[17] Yeesso chirraakka wihi us iyidah, “Iikhaban, i'di tahe an uliba Aabbaheey ma inokhan. Nyaame, 'doo'di irummeeste iiro, saggi an eti Aabbaheeyenye toro icho laka Aabbahichee ikanokhdi, icheek. Ulla a Waakkhaaya, toro la a Waakkhichooda.”
[18] Maariyati ilkerengeetti Magdaala wora abatti ileeiratte, “An Kamur a arge!” Toro saggi us wahaas ikiidah abatti icheekte.
[19] Gelebti ibeenki oraate teebataas ka, abatti kulante. Minkoo goya iskahidde, i'di tahe weynaanti Ya'huude karoortaa. I'daasenyi Yeesso goycho tolossate, “Nebeytiin ma furatti,” iyidah.
[20] Inkoo us waha yidah ka, dahanohiis ichoow waaru ba tuse. Abatti uus iche Kamur agarte ka, weyti hamaadde.
[21] Yeesso toro wihi us iyidah, “Nebeytiin ma furatti! Saggi Aabbaheey ani isooerge, iche an laka atin ierga.”
[22] Wahaas ka neebsi kaafuufe, wihi us yidah, “Rubeyti Munyee 'hela.
[23] Chirri atin 'doo'd uskeel ikakutteen, Waakh rumanka 'doo'daas uskeel a ikakuta. Chirri atin 'doo'd uskeel ikakutin la, Waakh laka 'doo'daas uskeel ma ikakuto.”
[24] Toomashi abattiti tomon ichoow lammee kichokoowenye, duddunkiis Man'daan layadeeh chirri Yeesso abatti isoobahe intaas ma kajirin.
[25] Abattiti addan 'deerka wihi iche Toomas itidah, “Nah Kamur a agarre.” I'daasenyi Toomas wihi us icho iyidah, “Sammata an gumaarreti dahanohiis kajirto an iargine, an farreey inti goorat ussumaar laka'hune an igelinne, dahanteey la inti waaru ka 'hunan an igelin, ma rummeesdi.”
[26] Inkoo teebatoo toro kutte ka, abatti toro minkoo goyaka kulante. Toomas laka a leejire. Afaf a hidanyahiine, i'daasenyi Yeesso goycho sootolossate, wihi us iyidah, “Nebeytiin ma furatti.”
[27] 'Deerka wihi us Toomas iyidah, “Farraah gumaara geliche, dahanoheey la agar, dahantaah la keene, waaruheey geli. Iikamalaline saggi an omoot ikasookahe rummeyso.”
[28] Toomas chirraakka, “Ati a Kamuraaya, toro la a Waakkhaaya,” iyidah.
[29] Yeesso chirraakka wihi us iyidah, “At jeenteti at ani iagarte iche irummeysatte? Waakh 'doo'di ani iargine irummeeste, a imaala.”
[30] Geedda Yeesso abattitiis leejiro, wihi ittaawenye miigti Waakh tuso buugga goya liikachiirin iche yeele.
[31] I'daasenyi waha a lachiire, 'dee saggi Yeesso rumanka Ki Lasubhe iyahe, us Weeli Waakh iyahe, rummeysattaan. Kakhuufnaanki atin usu kakhuuftaan ka la jiroti jirtuu imassanne khabtaan.