[1] “Wahanyeyyoha a atin isoocheeke, uus atin kakhuufnaanki atin ikakhuuftaan ka soodihin.
[2] Minassi weysiite Ya'huud ka a atin lariha. Ibeen la a yamiit, ki eti atin yagiis tuumman, kol us wihi us yeelo ka Waakh gargaaro koogyahe.
[3] 'Doo'd la waha tuumman a atin yeela, i'di tahe icho Aabbaheey ma gartaane, ani laka ma igartaan.
[4] Waha la a atin isoocheeka, 'dee chirri maanti icho waha yeelaan yitah ka, wihi an atin iidah kasoo'hessaan. “Waha maanti kolooraate atin abattiteey titaaheen ma atin isoocheekin. I'di tahe an a atin leejiree.
[5] An kola 'dee eti goorat isooerge inokhda. Etiinkoo kaldaye inti an isohdi worsati la ma jiro.
[6] Toolla an waha atin isoocheeke la, a bolokhtaan.
[7] I'daasenyi rume atin icheeka, katabnaanki an atin katabo, a iroonotiinna. I'di tahe chirri an iiran, Rubeyti Munyeenye, 'Dooggargaarto layadeeh, ma atin itamiit. I'daasenyi chirri an irde a atin isooerga.
[8] Maanti 'Dooggargaartota timiy la, 'doo'di wahanyeyyohi harratane sussuuje raaho saggi malicho baabul iyahe a tussa. Mali icho khabaane fissanoonki Waakh miinsan a baabul. Toro la wihi saggi Waakh 'doo'di harrata 'dee ihukkumo miinsan a baabul.
[9] Mali icho khabaane uskeel miinsan a baabul, i'di tahe icho ani ma irummeysan.
[10] Mali icho khabaane fissanoonki Waakh miinsan a baabul, i'di tahe an Aabbahaaya iirda, atin la toro ma iagartaan.
[11] Mali icho khabaane saggi Waakh 'doo'di harrata 'dee ihukkumo miinsan a baabul, i'di tahe Waakh orey on karnati harrata uskeel igooche.
[12] “Wihi buurenye an atin isoocheeko a jiraane, i'daasenyi toolla a atin kahulees.
[13] I'daasenyi maanti Rubeyti Munyeenye rum leh atin itimiy, runti tuummane Waakh katimiy a atin tussa. Rubeyti Munyee la awtiche ma kayeyyeeddo. Wihi iche daagte, ichoow wihi 'dee berri sooyateeh, iche atin isoocheekta.
[14] Rubeyti Munyee saggane ani iweynaassa, wihi an adeehe sookhaatta, atin isoocheekta.
[15] Wihi tuummane Aabbaheey khabo, a wahaaya, jeentetaase, Rubeyti Munyee wihi an adeehe sookhaatta, atin isoocheekta atin ikadowa.”
[16] Yeesso wihi us abattitiis iyidah, “Geeddoor rucchul goyaka ma iagartaane, 'dee yomboka la toro a iagartaan,”
[17] Abattitiis gaasoo wihi iche isitidah, “Yeesso chirri us, ‘Geeddoor rucchul ka ma iagartaane 'dee yomboka la a iagartaan,’ inno idowo, mehe essa? Toro chirri us, ‘Aabbahaaya iirda,’ inno idowo, mehe essa?
[18] Waha us, ‘Geeddoor rucchul,’ essi ma garanni. I'da ka mehe essa? Wihi us essi ma garanni.”
[19] Yeesso saggi iche aytaas worsan i'doonto abte, 'deerka wihi us iyidah, “Atin wihi an, ‘Geeddoor rucchul ka ma igartaane, 'dee yomboka la a iagartaan,’ kiidah, iche isworsattaan?
[20] Rume atin icheeka, atin a ooytaane, uuwwissaane, i'daasenyi 'doo'di wahanyeyyohi harratane sussuuje raaho a hamaada. Atin a bolokhtaane, i'daasenyi bolokkhiin a luurgiyicha hamaad lakayeela.
[21] Makhaabassi weel desso a bolokhta a mehe ibeenkiche a yitahyee. I'daasenyi uus weel dessi, sinatiche dabta, hamaadda, jeenteti weeloo harrata ka idessuu.
[22] Atin ka laka i'daas on tateeh. Toolla a bolokhtaane, i'daasenyi toro a atin arga, atin la weyti hamaaddaane, et hamaadiin atin kakhaato la mele.
[23] Maantaas walah atin iworsattaan mele. Rume atin icheeka, walahbaaw jeenteti atin keey itahiin u daahteen Aabbaheey a atin siicha.
[24] Atin ichoowka uliba walah atin jeenteti atin keey itahiin u daahteen mele. Waakh wihi atin 'doontaan daaha a 'hessaane, 'dee hamaadiin la ki buuho iche yateeh.
[25] “Wihi tuummane an atin isoocheeke, jiti mammaheete atin ikasoocheeke. I'daasenyi ibeen a yateeh, ki an mammah ikayeyyeedine, an wihi Aabbaheey miinsan jiti atin kaabattaan ka an atin isoocheeko.
[26] Maantaas jeenteti atin keey itahiin u, Aabbaheey walah a daahtaan. Anna 'deerka meessiin ka Aabbaheey walah a atin isoodaaha mee eldi.
[27] Jeenteti atin ani i'doontaane toro saggi an Waakh ikiimiy irummeysatteen u Aabbaheey a atin 'doona.
[28] An Aabbahaaya kiimiyye, harrata imiy, toro la harrata a kataba, Aabbaheey inokhda.”
[29] Abatti Yeesso 'deerka wihi iche tidah, “Toolla mujjume yeyyeedda, mammaho ma kaayyeeddo, wihi tahe on nah siisatta.
[30] Toolla saggi at walah tuumman igaratti a agarra. At mali weeli enenyet geeddi us walah isooidaahan laka a garatta. Jeentetaas u, saggi at Waakh ikatimiy a rummeysanna.”
[31] Yeesso wihi us ilaabe, “Kola a irummeysatteen?
[32] I'daasenyi maane a tamiite kola la a titah, ti atin tuumman seley baabaataane, ebba goobiis irti. Keleye ikatabtaane, i'daasenyi an keley mee, i'di tahe Aabbaheey a ileejira.
[33] Waha la a atin icheeke, 'dee ani ka nebey 'hessaan. 'Doo'di harrata goyaka sina a atin taham. I'daasenyi roorro akhabina, an harrata a soorichee.”