[1] Inkoo Yeesso waha yidah ka, serey yeye, Waakh wahte, wihi us yidah, “Aabba, ibeen a yitah. Weelaah weynaay, 'dee Weelaah a kiweynaacho.
[2] I'di tahe at usu antohi us 'doo'di harra tuumman kaanti a isiisse. Ulla 'dee 'doo'di at kiis kayeesse tuumman, jiroti jirtuu imassan siicha.
[3] Enenyet la chu'us atihi kaldaye rumanka Waakhe kigarti, toro la Yeesso Kiriistohi at sooergatte garti, wahaas a jiroti jirtuu imassan.
[4] Hili goorat at dahanoheey soogelisse an massiche ka, harrata ka an a kiweynaache.
[5] Maantaka Aabbahaaw, weynaanti an geeddi at harra isoouumin kileekhabe ortaah ka iweynaay.
[6] “'Doo'di at harrata ka soobahsatte at isiisse, eti at tahe a abche. 'Doo'da kaahha eheete, at la ani isiisse. Icho la yeedaah a raaheen.
[7] Icho la toolla saggi wihi tuummane at isiisse ati ikaayimaateen a gartaan.
[8] Wori at isiisse iche anna icho siiche, icho la rummeesteen. Icho la saggi an rumanka ati ikaaimiy a gartaane, toro saggi at ani isooeregte laka a rummeestaan.
[9] “Icho a iweesda. 'Doo'di harra tuumman ma iweesdi, i'daasenyi 'doo'di at isiisse iweesda. I'di tahe icho a wahaahha.
[10] 'Doo'di tuummane an khabo a kaahha, 'doo'di tuummane at khabto la a kaaya. Icho ka la ani a liiweynaache.
[11] An kola harra ma kasoojiro, i'daasenyi icho uliba harra kajiraan. Aabbaheeyki munyee, miigti magahaahki at isiisse ka, magahaas ka bariiso, 'dee i'di ani ichoow ati ba wohoo kalday inahuu, icho tuumman wohoo kalday a yitaaheen.
[12] Geeddi goorat an icho leejire, magahaas at isiisse ka, a toorribe bariisde. Ki goorat baabaa liigooche on menye, kichekoo kalday laka ma baabiin, 'dee wihi Chiirnaanneti Waakh ka lachiire labuuhicha.
[13] “Anna inti at kajirto amiit. I'daasenyi waha geeddi an harrata kajiro adeehe, 'dee saggi an ihamaado, icho laka hamaad rubeyohicho goya buuhicha.
[14] An woraah a siiche, 'doo'di wahanyeyyohi harratane sussuuje raaho la icho a 'dii'de. I'di tahe icho ki harrata mee, i'di an laka ki harrata ieheynan u.
[15] Weysiheey ka wihi an kidaaho, atihi icho harrata kabihisso menye, i'daasenyi a atihi Seytaanki uskeel leh kaholisso.
[16] I'di an laka 'doo'di harrata kichokoo ieheynan u, icho laka ki harrata mee.
[17] “Runtaah ka icho munya kayeel. Yeedaah a ki rummaat.
[18] Saggi goorat at ani 'doo'di harrata isooergatte, iche an laka icho 'doo'di harrata iergade.
[19] Jeentetichuu la, an a ismunyaacha, 'dee icho laka, rumanka lamunyaacha.
[20] “Icho kalday ma iweesdi, 'doo'di wori icho cheekaan ka ani irummeesti laka a iweesda.
[21] Aabba, a iweesda, 'dee icho tuumman wohoo kalday yateehiin, saggi ati ichoow ani wohoo kalday inahe, toro la ani ichoow ati wohoo kalday inahuu. Aabba, a iweesda 'dee icho ichoow inno ba wohoo kalday nateehe 'dee 'doo'di harrata saggi at ani isooeregte rummeesta.
[22] Weynaanti at isiisse iche icho siiche, 'dee icho tuumman wohoo kalday yateehiin, i'di toolla ati ichoow ani ba wohoo kalday inahuu.
[23] Ani ichoow icho ba a wohoo kaldaye, ati ichoow ani ba la a wohoo kalday. Icho ba tuum wohoo kalday yateehiine, 'dee 'doo'di harrata saggi at ani isooeregte abta, toro la enenyet waha abta, geeddi at i'doonto, geeddaase icho laka 'doonta.
[24] “Aabbahaaw, at icho ani a isiisse. An la ichohi inti an kajiro icho laka kajiraane, 'deeka weynaanti ati isiisse argaan iche 'doona. Weynaantaas la a ti at isiisse jeenteti at ani geeddi harra liisoouumin laka i'doontuu.
[25] “Aabbaheeyki fissan, chirri 'doo'di harrata kigaran laka, an a kigarda, 'doo'da la saggi at ani isooeregte a garta.
[26] Eti at tahe icho a ibabbakkaahiche, toro la oreye isohda weyti eti at tahe ibabbakkaahicha, 'dee 'dooninti at ani ikhabto goycho a kijirto, ani la goycho a kijiro.”