[1] Geeddi ibeen lihe ankhantahe 'dee daawti Baasakka sootateeh, Yeesso ilkerengeetti Be'daaniya Laassaro yaal yimiy. Laassaro la, a eti goorat Yeesso omoot kasookahche.
[2] Yeesso intaas ka gololi gelebeet liikarche. Maarta la icho goollisse. Laassaro 'doo'di Yeesso leegolossate a leejire.
[3] Maariya 'deerka miricchihoo gato miigenye geeyoo naad layadeeh kalday lakahaaggiche geeddi kiilo nyuusichee khaatte, Yeesso luhlo kasubahte, toro tintiche ka luhlohiis hiyyaayte. Uyuuggi miricchihaas min tuumman leekahe.
[4] I'daasenyi etoo abatti Yeesseenye, Yuuda Iskaariyoot layadeehe, dowwanoha ka Yeesso 'dub soogoocho 'dii'de wihi us yidah,
[5] “A i'doh miricchiha liiororinne, 'dee chilimme miskiin liisiin? Chilimmeti eti gu'hoo hil haaggiche laguto iche baha.”
[6] Jeenteti us miskiino uur ikasoonugleeste mee waha iyidah. Jeenteti us i'daas iyidah, a jeenteti us ugarti chilimme ikhuccho, us chilimme ihato.
[7] Yeesso wihi us ilaabe, “'Dii! Iche miricchiha ibeenki ani liihawwaalo iche meel igelissee.
[8] Miskiin kol dakkhan goytiinna kakhabtaane, i'daasenyi ani kol dakkhan ma ikhabtaan.”
[9] Ururoo buurenye Ya'huud Yeessohi ilkerengeetti Be'daaniya kajiro daage, intaas yimiy. Icho la jeenteti icho Yeesso iargaan kalday menye, Laassarohi Yeésso omoot kasookahche laka argine yimaateen.
[10] Kuhaaniyyohi wewween 'deerka jiti icho Laassaro laka kayagiisiin yowteen.
[11] Waha a jeenteti 'doo'di Ya'huude ittaawe jeente Laassaruu icho ikatabo, Yeesso irummeesti.
[12] Ibeenki kaas sooraaho ka, ururi buurenye daawti Baasakka yimiy, saggi Yeesso ilkerengeetti weene Yeerusaleem iyamiit daage.
[13] Seytohi geeyi baar sookhaateene, baheene, Yeesso or kadoween. Chirra icho or kadowaan la a riiraane, “Waakh a lakoolicho!” “Waakh ki magahi Kamur kayamiit a imaale.” “Waakh Karnati Issiraayel a imaale!” iche essaan.
[14] Yeesso inkuraarruhoo 'hele kore, i'di liichiiruu,
[15] “'Doo'di ilkerengeetti Saayon yaal, wohoo rucchul laka akaroorina! Yeya karnatiin kalla, inkuraarru fuulaayi soosohtaa.”
[16] Abattitiis laka kolooraat waha tuumman ma aban. Inkoo Yeesso goobi Waakh ka laweynaache on iche saggi yeedaas lachiire usu imiinsanyahe, toro wahaas laka usu iyeeleen kaseen.
[17] Ururi goorat maanti Yeesso Laassaro go'ddi lakahawwaale goya kasoowahe omoot kasookahche leejire, wihi yitah tuumman cheeke.
[18] 'Doo'di buure jeenteti Yeesso waha miigti Waakh tuso iyeele us idaage, iche ibahe Yeesso i'hele.
[19] Farissaayo 'deerka wihi iche isitidah, “Ma agartaan a, wihi inno yeelin leheet ma yeelloo! 'Doo'd tuumman usu raaha!”
[20] 'Doo'di daawti Baasakka ka irte ilkerengeetti weene Yeerusaleem ka Waakh wahte, 'doo'doo yaafohi Ya'huud ieheynan laka goycho a kijire.
[21] 'Doo'daas la Fiilifhi ilkerengeetti Bessaayda boroofenhi Gaalilaaya kajirto kayimiy iirte, wihi icho iyidaaheen, “Eti ween, nahi Yeesso agarro 'doonna.”
[22] Fiilif la irte Andereeya icheeke, lammache ba iratte Yeesso icheekte.
[23] Yeesso wihi us ilaabe, “Saha'ddi Ínam Aadam laweynaacho kola a titah.
[24] Rume atin icheeka, sammata ilinti 'dargaayye il ikadihine, iche koloo iumaatan, ilintoo on kafiddiita, gurnaan iche desso mele. I'daasenyi chi'iche wohoo yumuy titah, gurnaanki buurenye dessa.
[25] Eti jiroti awtiis 'doono, jiroti rummaat a waaya. Eti harrata ka jirotiis 'dii'do la, jirotiis jiroti jirtuu imassan a ikaaya.
[26] Eti tuummane falfateey itaahan 'doono, ani isooraaha. Meelbaaw an irdi ka ileejira. Aabbaheey la eti tuummane hileey haaggicho, usú a weynaacha.
[27] “Toolla rubeyteey a suujowte, mehe idaahe? ‘Aabbahaaw, saha'dda sinayyoot ikarib,’ iche adeeh? Mele! An jeentetane saha'dda isooeleele.
[28] Aabba, magahaah weynaay!” Hooyoo 'deerka serey ka sooyeede, mehe yidah ya, “Magaheey a weynaache, toro la a inokhda weynaacha.”
[29] Ururi intaas toolle hooyaas daage gaasoo, “A guuguh,” esse, gaasoo la, “Hertoo Waakhe leeyyeedda,” esse.
[30] Yeesso wihi us yidah, “Hooya jeenteteey ma isooyeedine, jeentetiinna isooyeede.
[31] Ibeenki Waakh 'doo'di harrata hukkumo kola a yitah. Waakh toolla karnati harrata a riha.
[32] I'daasenyi ani maanti massalaaba ka serey liiokkhicho, weeli enenyet tuumman ankaaya keena.”
[33] I'dane yidahye, omootti us sooyamuut enenyet tusa.
[34] Urur la wihi us iyidah, “Amurre Muusa ka, Ki Lasubhe jirtuu tuumman a inno leefiddiya iche daagne. Saggoh 'deerka ‘Ínam Aadam serey a liiokkhicha’ itadeeh? ‘Ínam Aadamha,’ a ayyo?”
[35] Yeesso la wihi us icho iyidah, “Geeddoo rucchul on banay khabtaan. Banay goya kasohda gi'de, geeddi banay jiraane mug'di ikhaatin. Eti mug'di kasohti, inti us isohti ma garti.
[36] Anihi banay atin ikeeno, geeddi an atin leejiro irummeesda, 'dee atin laka 'doo'di banay goya kasohti ateeha.” Inkoo Yeesso waha yidah ka, 'doo'd katabe, irte dagte.
[37] Chirri Yeesso wahanyeyyoha miigti Waakh tuso tuumman geedda 'doo'd leejiro us yeele laka, 'doo'd usu ma rummeysan.
[38] Wahaas la a yitaaheene 'dee wihi eti Waákh íyeyyeedo Isaaya layadeeh ka lachiire labuuhicha, “Kamur, ayyo wori nah cheekne rummeeste? Ayyo miigti Waakh latuse?”
[39] Jeenteti icho irummeysawwaayeen la, a jeenteti Isaaya intoo addan ka i'da iyidah,
[40] “Waakh icho indo a tire, uurassicho la dagahnooche, 'deerka indohicho ka il ma argaane, ommos uurassicho ka walah ma abtaan, ommos ani ma isoonokhtaane 'dee ma samaacho.”
[41] Isaaya jeenteti us waha iyidah, a jeenteti us weynaanti Kamur iarge, toro wori usu miinsan ikayeyyeede.
[42] Chirraas weynaanti Ya'huud buurche laka usu a rummeysatte. I'daasenyi jeenteti iche Farissaayo ikaroortuu, saggi iche Yeesso ikakhuufte ma cheekin, minki weysiite Ya'huude lakabahcho iche karoortaa.
[43] I'di tahe koolohi Waakh icho koolicho menye, koolohi weeli enenyet icho koolicho iche 'doonaan.
[44] Yeesso riire wihi us yidah, “Eti tuummane ani irummeesti, ani kalday ma irummeesti, i'daasenyi ki ani isooerge laka a rummeesta.
[45] Eti tuummane ani iargo la, ki ani isooerge laka a arga.
[46] An i'di banayhi harratane iimiyye, 'dee et ani irummeesti mug'di goya fiddiyo mele.
[47] “Eti yeedeey daago i'daasenyi iraahin an ma hukkumo. I'di tahe an hukkunnaanki an harra hukkumo ma iimaatan, i'daasenyi ribnaanki 'doo'di harra iimiy.
[48] Eti ani i'dii'do toro yeedeey ikhaatan, wihi hukkumo a jiraan. Yeedaas an idah rubeytiissa ibeenki yomboot etaas sina igoochá.
[49] A mehe an antoheey ma kaayyeedin. I'daasenyi Aabbaheeyki isooerge iche amur ibahche, wihi an adeeh ichoow saggi an iadeeh isiiche.
[50] Anna saggi amuriis jiroti jirtuu imassan ikeeno a garda. Toollaka wihi an eldi tuumman a wihi Aabbaheey dah iyidah on.”