[1] 'Da'ddaboka, Yeesso boroofenhi Gaalilaaya ka, kolba ilkerengeettoo irte. Jeenteti weynaanti Ya'huud ogoos iyowattuu, boroofenhi Ya'huudiya ma iran.
[2] I'daasenyi maanti yaafohi Ya'huud Daawti Gaayimo Liigelo gelaan a soodowwaatte.
[3] Walaalinye Yeesso wihi iche Yeesso itidah, “Inta katabe boroofenhi Ya'huudiya iro, 'dee abattitaah laka wihi ittaawenye weeli enenyet yeelin iubaa'dane at yeesso a agarto.
[4] Eti rumanka magah 'doono, wihi us yeelo ma dagcho. Maantaka at wahanyeyyoha a haaggissa gone, tab gi'de enenyet tuumman a kaargo.”
[5] Walaalinyetiis jeenteti iche usu irummeysanne i'daas itidah.
[6] Maantaka Yeesso wihi us iyidah, “Ibeenki an irdi uliba a ankhanyahe. Atin la a geeddi atin ibeenki atin 'doontaan on irattaan. A mehe atin ibeen atin leesuuje mele.
[7] 'Doo'di wahanyeyyohi harratane sussuuje raaho walah us atin ka'dii'do mele, i'daasenyi ani a i'dii'da. Wihi us ika'dii'do la, a jeenteti jiti icho kajiraane an cheeko a suuj ikadowo.
[8] Atin nyaama ilkerengeetti weene Yeerusaleem irda, daawtaas gela. An daawtaas ma irdi. I'di tahe ibeenkeey uliba a ankhanyahe.”
[9] Inkoo us wahaas yidah ka, boroofenhi Gaalilaaya geeddoor fiddiye.
[10] Inkoo walaalinyetiis daawtaas iratte ka, Yeesso laka irte. I'daasenyi 'dóo'd ma istusine, dagsi on ka irte.
[11] Weynaanti Ya'huud la Yeesso daawtaas goyaka yowatte, 'doo'd, “Yeesso mehe agarteen?” idowte.
[12] Urur goyaka nyunnyuutoti usu miinsan kahte. 'Doo'd gaasoo mehe essa ya, “Us a eti haaggan.” Gaasoo la mehe laabeen ya, “Mele, us enenyete ekkeesta.”
[13] I'daasenyi etoo kaldaye issoobahcho, runtiis kayeyyeedo ma jiro. I'di tahe 'doo'd tuumman weynaanti Ya'huude karoora.
[14] Inkoo daaw ukkuriche leeleele ka, Yeesso minki Waakhe buure gele, 'doo'd Yeedi Waakh abinnaan sookhabte.
[15] Weynaanti Ya'huud, chi'che saggi us 'doo'd walah iabcho daagte ka, weyti girmeysatte, wihi iche worsatte, “Eta injire sukkuul iiran, intoh kharata geeddee ka'hele?”
[16] Yeesso wihi us ilaabe, “Waha an 'doo'd abcho, yeedeey on menye, a yeedi eti isooergate kayimiy.
[17] Eti tuummane wihi Waakh 'doono yeelin 'doono, usú waha an atin abcho Waakh kayimaateen ommos usú yeedeey on tahe a abta.
[18] Eti wihi awtiissa on 'doo'd abcho, magahe isiyowta. I'daasenyi eti magahi eti sooergate koolo i'doono, a eti rummaate, walah khollokkhane usu miinsan mele.
[19] Muusa amurre ma atin siinna? I'daasenyi etiin amurretaas raaho mele. A i'doh ani ogoos imarantaan?”
[20] Urur chirraakka wihi us Yeesso ilaabe, “Ati ginna kidakhatta. Ayyo ogoos kimarma?”
[21] Yeesso la wihi us icho iyidah, “Wohoo kaldaye weeli enenyet yeelin iubaa'dane yeele, atin tuumman la girmeysatteen.
[22] Muusa goorat hugunki atin yeeletiin kakhandiitaan a atin siiche. Rumanka hugunka Muusa ma kiimaatan, i'daasenyi aacchinyetiinna kasoouummame. Jeentetaase yeeletiin Seeri Lanaso laka ikhandiitaan.
[23] Chirri yeele Seeri Lanaso lakhandiyo, 'dee amurre Muusa liijebin, a i'dohe jeenteti an Seeri Lanaso enenyet sartiis tuumman isamaachuu ihollowtaan?
[24] Taba uurassiin goyaka walah wihi atin kaagartaan kalday ka uskeel iigoonna, jiti fissan ikagoocha.”
[25] 'Doo'doo ilkerengeetti weene Yeerusaleem wihi us yidah, “Us eta, eti weynaane ogoos maranto menya?
[26] Ulla kalla 'dow kayeyyeeda, weynaanti Ya'huud la walah iche itadeeh mele. Sarka saggi rumanka us Ki Lasubhe iyahe garatta?
[27] I'daasenyi eta inti us kayimiy a garanna. Ki Lasubhe la maanti us yamiit, et inti us kayamiit garti mele.”
[28] Yeesso minki Waakhe buure ka 'doo'd walah abche, riire, wihi us yidah, “Atin rumanka eti an ahe ichoow inti an kiimiy a garattaan on a? An ma issooerganne, i'daasenyi ki isooergate a ki rum leh. Atin la usu ma garattaan.
[29] I'daasenyi an usu a garda, i'di tahe an usu kiimiyye, usu la isooergate.”
[30] Waha ka 'doo'd Yeesso khaban leheete, i'daasenyi et usu khabte mele. I'di tahe ibeenki liichiire lakhabti, uliba a ankhanyahe.
[31] I'daasenyi urur goyaka 'doo'di ittaawe Yeesso rummeeste, wihi icho yidaaheen, “Ki Lasubhe maanti us yamiit, wahanyeyyohi ittaawenye miigti Waakh tuso eta yeele kussan a yeela?”
[32] Farissaayo ururi woriis kanyunnyuwo daagte. 'Deerka kuhaaniyyohi wewween ichoow Farissaayo ba, iskartoo Yeesso khabatti ergeen.
[33] Yeesso la wihi us iyidah, “An geeddoor on atin leejira, 'dee yomboka eti isooergate inokhda.
[34] Atin a iyowattaane, i'daasenyi ma i'hessaan. I'di tahe inti an kajiro ma tamiitiin.”
[35] Weynaanti Ya'huud isinokhatte wihi iche isworsatte, “Inta us irti, inno usu ika'helin a intoh? Inti 'doo'deen kijiro yaafohi Ya'huud ieheynan goya kataasanyahe iche irta yaafohi Ya'huud ieheynan wori Waakh abcha?
[36] Yeeda us, ‘Atin a iyowattaane, ma i'hessaane toro inti an kajiro la ma tamiitiin,’ essi a mehe?”
[37] Ibeenki weyti khummane 'da'ddaboote daawe massatti ka, Yeesso tolossate riire, wihi us yidah, “Eti tuummane sugub khabo, ani a iyimaate, amba sugub bahchaa.
[38] I'di Chiirnaanneti Waakh tadeeh u, ‘Eti tuummane ani irummeeste, a i'doo indohi biccheete 'dulo, jiroti jirtuu imassan lakeelo, uuriis kasoobahaan.’”
[39] Yeesso yeedaas ka la, wihi us woriis kayeyyeedo, a Rubeyti Munyeenye, 'doo'di usu rummeeste soo'helo. Geeddaka uliba Waakh 'doo'di Kiriisto rummeeste Rubeyta Munyee ma siin. A mehe Yeesso geeddaakka goobi Waakh ka ma laweynaan.
[40] Urur goyaka 'doo'd gaasoo yeeda daage wihi us yidah, “Eta rumanka, a eti Waákh íyeyyeedo goorat Waakh ayyiche, Waakh, ‘A sooerga,’ yidah.”
[41] Gaasoo la mehe essaan ya, “Usu a Ki Lasubhe.” I'daasenyi gaasoo mehe worsateen ya, “Ki Lasubhe saggoh boroofenhi Gaalilaaya ikayamiit?
[42] Chiirnaanneti Waakh, Ki Lasubhe hiiy karnati Dawuud layadeeh ichoow ilkerengeetti Be'deleheeme Dawuud yiille kayamiit ma tadeeh a?”
[43] Jeente Yeessuu, 'doo'd seley goggowe.
[44] Gaasoo ichehi khabatti 'doonta, i'daasenyi et khabti mele.
[45] Chirri iskare nokhatte ka, Farissaayo ichoow kuhaaniyyohi wewween ba wihi icho iskar worsateen, “A i'doh Yeesso isookhaatina?”
[46] Iskare la wihi iche tidah, “Et injire saggi eta iyeyyeedo nah daagne mele.”
[47] Farissaayo toro wihi iche iskar itidah, “Atin laka a atin baabiiche?
[48] Etoo weene ommos Farissaayeenye usú rummeeste a agarteen?
[49] Mele! I'daasenyi urura amurre Muusa wihichekoo rucchul laka igaran a falanyahe.”
[50] Etoo Farissaayeenye goycho kajiro Nikodeemo layadeehe goorat 'hor Yeesso iirte la wihi us icho worsate,
[51] “Amurreteen enenyet geeddi wihi us yeelo liikadaagine toro liikagaran on uskeel igoossa?”
[52] Wihi icho ilaabeen, “Ati laka boroofenhi Gaalilaaya katimiy? Bal Chiirnaanneti Waakh goya tabe, 'dee saggi 'doo'di Waákh íyeyyeedo koo kalday laka injire boroofenhi Gaalilaaya ikiimaatan abo.”
[53] Ebba 'deerka goobiis irte.