[1] Yeesso toro wihi us abattitiis iyidah, “Amalalina, Waakh kakhuufa, ani laka ikakhuufa.
[2] Min Aabbaheey goonanneti ittaawenye khaba. Anna a irda, meel atin iyeela. Chirri kootte waha i'daas ieheynan, ma atin isoocheeko.
[3] Chirri an irde meel atin iyeele la, a soonokhda, meesseey atin geecha, 'dee inti an kajiro, atin laka kajirtaan.
[4] Jiti inti an isohdi irti a garattaan.”
[5] Toomas la wihi us iyidah, “Kamur, inti at isohatti nah ma garanni, saggoh jiti intaas isohti iabanna?”
[6] Yeesso wihi us ilaabe, “An a jit, an a rum, an a jiro. Eti ani ileeyimiy on menye, et Aabbaheey iyamiit mele.
[7] Cha'atin rumanka igaratteen, Aabbaheey laka a garattaan. Uus toolla kakhabatti atin usu a abatteene, toro la a agarteen.”
[8] Fiilif la wihi us iyidah, “Kamur, bal Aabbahaah nah tus, nah walah addane nah 'doonno mele.”
[9] Yeesso wihi us ilaabe, “Fiilif, geeddi deere atin tuumman atin leejire, toro ichoow uliba at ma iaban ba? Eti tuummane ani iarge, Aabbaheey a arge. A i'dohe toro, ‘Aabbahaah nah tus,’ ielatta?
[10] Fiilif, at saggi an Aabbaheey goytiis ifiddiyo, ulla goyteey ifiddiyo ma rummeysatti? Yeeda an eldi ani ma ikiimaatane, Aabbaheeyki goyteey fiddiyo iche waha tuumman yeela.
[11] Chirra ani, ‘An Aabbaheey goytiissa fiddiya, ulla goytaaya fiddiya,’ atin iidah, irummeesda gi'de. Chirri atin irummeysan, wihi ittaawenye weeli enenyet yeelin iubaa'dane an yeelo ka rummeesda gi'de.
[12] Rume atin icheeka, eti tuummane ani irummeesti, wihi an yeelo a yeela. Wihi waha kussan laka a yeela, i'di tahe an Aabbahaaya inokhda.
[13] Anna walahbaaw atin jeenteti atin keey itahiin u daahteen a atin iyeela, 'dee Weeli Waakh Aabbahiis weynaacha.
[14] Walahbaaw tahe ka, jeenteti atin keey itahiin idaaha anna a atin iyeelaa.
[15] “Chirri atin i'doontaan, amuri an atin siiche a raahtaan.
[16] Anna Aabbaheey a daaha, ulla 'Dooggargaartotoo addane jirtuu tuumman atin leejirto atin isooerga.
[17] Waha a Rubeyti Munyeenye rum leh. 'Doo'di harrata la Rubeyti Munyee ma khaatti. I'di tahe icho Rubeyta Munyee ma argaane, ommos ma gartaan. I'daasenyi atin a garattaan, a mehe Rubeyti Munyee toolla a atin leefiddiita, toro berri goytiinna kijirta.
[18] Saggi nyaakhuti 'doo'di dele katuume ma atin ikatabo, a atin isoonokhda.
[19] Geeddoo rucchul ka kola 'doo'di harrata toro ma iargo, i'daasenyi atin a iagartaan. Toro jeenteti an ijiruu, atin laka 'dee jiro a 'hessaan.
[20] Maantaas saggi ani ichoow Aabbaheey wohoo kalday inahe, atin ichoow ani wohoo kalday inahe, toro la ani ichoow atin wohoo kalday inahe a kassaan.
[21] Eti i'doono, a ki amurreteey khabti, toro raaho. Eti i'doono la, Aabbaheey laka usú a 'doona, ani laka usu a 'doona, toro la eti an ahe la a tusa.”
[22] Yuuda 'deerka, kan Yuudahi inam Iskaariyoote menye, wihi us yidah, “Kamur, at a i'doh dowwanoha ka nah isitussa, 'doo'di harrata la isitusiwwaayta?”
[23] Yeesso la wihi us ilaabe, “Eti tuummane i'doono, wihi an abcho a raaha. Aabbaheey usu a 'doona. Aabbaheey ichoow ani usu a inamiite fureenyo goytiis kayeelanna.
[24] Eti tuummane ani i'doonin, wihi an abche laka ma raaho. Wihi atin daagteen la weheey menye, Aabbaheeyki isooerge iche kayimaateen.
[25] “Waha tuumman geeddi an atin leefiddiyo iche atin isoocheeke.
[26] I'daasenyi Rubeyti Munyeenye 'Dooggargaarto layadeehe, Aabbaheey meesseey ka sooergo, walah tuummane atin abissa, toro la wihi tuummane an atin isoocheeke, atin kasoo'helissa.
[27] Nebeye atin ikataba. Nebeytaaya atin siicha. Saggi 'doo'di harrata nebey 'doo'd isiicho mee an nebey atin isiicho. Amalalina toro la roorro akhabina.
[28] “Anihi, ‘A irda toro a atin isoonokhda,’ eldi a daagteen. Chirri atin i'doonteen, jeenteti an Aabbaheey ikiirduu, a hamaaddaan. A mehe Aabbaheey ani a ikaweenyahe.
[29] Waha tuumman la geeddi icho iitaahane atin icheeke, 'dee 'deerka maanti icho yateehiin rummeysattaan.
[30] Geeddi deer ma atin leeyyeedo, a mehe karnati harrata a soosohtaa. Us miig ma ikakhabo,
[31] i'daasenyi 'doo'di harrata saggi an Aabbaheey i'doono an amur Aabbaheey iraaho a abta. “Kaaleya inta a katabno.”