[1] Inkoo Yeesso weysi massiche ka, abattitiis khabaayi irte, Ankhari Keediroon maaheen. Intaas la gosoo a kajire. Usu ichoow abattitiis ba gosaas goya geleen.
[2] Eti Yeessó 'dub goocho Yuuda layadeeh la meel a garta. I'di tahe Yeesso ichoow abattitiis ba, geeddi buurenye intaas iska'heleen.
[3] Yuuda 'deerka iskartoo Rooma ichoow rabittoo minki Waakhe buure yuubisso soowoyaayi yimiyye, gos goya soogele. Kuhaaniyyohi wewween ichoow Farissaayo 'doo'daas sooergaté. 'Doo'd la bir ichoow oorassoo khoro bolkho ichoow taa laka a khabe.
[4] Yeesso wihi tuummane usu rubeytiis iyateeh a garta gone, orcho yimiyye wihi us worsate, “Ayyo yowattaan?”
[5] Wihi icho ilaabeen, “Yeessohi ilkerengeetti Naasarete yowanna.” Ulla wihi us ilaabe, “A ani gon.” Yuudahi Yeessó 'dub goocho la icho a leetoolla.
[6] Chirri Yeesso, “A ani gon!” yidah ka, iche tuummamba yombo inokhatte, kufte.
[7] Yeesso toro inokhte, worsate, “Ayyo yowattaan?” Iche la wihi iche ilaabte “Yeessohi ilkerengeetti Naasarete yowanna.”
[8] Yeesso la wihi us ilaabe, “A atin isoocheeke, a ani rubeytaaya. Chirri atin ani iyowattaan, reera addan 'diicha a irti.”
[9] Waha la a yadeehe, 'dee wihi us 'hor yidah buuhicha. Wihi us 'hor yidah la a mehe ya, “Aabbahaaw 'doo'di at dahanteey soogelisse koo kalday laka ma ikabaabiin.”
[10] Siimonhi Beetero layadeehe birlab khabe la, birlabiis soo'hiire, falfati kuhaanihi weyti ween gu'dde, nabahti miigeet ng'ure. Falfata la Maalkus iche layadeeh.
[11] Yeesso la wihi us Beetero iyidah, “Birlabaah min ilaab! Kol sinati Aabbaheey isoogooche ani ikawaarine koogtahe?”
[12] 'Deerka koobbinti iskarti Rooma eti iskartaas itoollo khabtaayi ichoow weynaanti Ya'huud Yeesso khabteen. Hidhideene,
[13] koloo etoo magahiis Aanas layadeeh ikeeneen. Aanas la a seyyoh Kayaafahi gu'haas ka kuhaanihi weyti ween eheet.
[14] Kayaafa la usú goorat ewweenki Ya'huud waaniche, “A haaggantahe chirri etoo kalday meessi 'doo'd tuumman kayamuut,” idowe.
[15] Siimonhi Beetero layadeeh ichoow etoo addane ullaka abatti Yeessee, Yeesso raaheen. Kuhaanihi weyti ween la eta addane abatti Yeessee a garta. Etaas abattee Yeesso raahe ichoowka uranti kuhaanihi weyti ween leegele.
[16] I'daasenyi Beetero arit khariche tolossate. Eta addane abatti Yeesseenye kuhaanihi weyti ween garti yombo inokhte, inantoo ilbooyenye arit yuubisso leeyeede, Beetero uram goya soogesse.
[17] Inanti arit yuubisso la wihi iche Beetero worsatte, “Ati abattiti etaas kichekoo mee menya?” Wihi us ilaabe, “Ani abattitiis mee.”
[18] Il a roffo gone, ilbooyye ichoow iskare ba 'hor on 'dab bolkhicheene, kasookhaarteene dahambooteen. Beetero laka irte iskar leetoolossate, 'dabe dahambootaa.
[19] Chirraakka kuhaanihi weyti ween Yeesso wori abattitiis miinsan ichoow wihi us 'doo'd abcho wowworsate.
[20] Yeesso wihi us ilaabe, “An 'doo'd tuumman 'dowe kaleeyyeede. Kol tuumman minassi weysiite Ya'huud ichoow minki Waakhe buurenye 'doo'di Ya'huud iska'helo ka laka 'doo'd wori Waakh a abche. Walah an dagsi ka idah mele.
[21] Toollaka, a i'dohe iwowworsatta? 'Doo'di idaage ma worsatti? Icho la rumanka wihi an idah a gartaanee.”
[22] Uus Yeesso waha yidah ka, etoo ullaka iskarti intaas tolossee, Yeesso fodoor gu'dde, wihi us iyidah “Ya! Wahaas a saggoh at kuhaanihi weyti ween yeed ikalaabto?”
[23] Yeesso wihi us ilaabe, “Chirri an wohoo suuje idah, 'doo'd tuumman icheek. I'daasenyi chirri wihi an idah rum yahiin a i'doh igu'dubte?”
[24] Yeesso dahano hidanyahaani, Aanas wihi us yidah, “Khaata, Kayaafahi kuhaanihi weyti weene igeecha.”
[25] Chirra Siimonhi Beetero layadeeh intaas toollo 'dab dahammooti ka, 'doo'doo wihi us worsate, “At laka abattiti etaas kichekoo mee menya?” Ulla 'dii'de, wihi us yidah, “Mele, ani abattitiis mee.”
[26] Etoo kuhaanihi weyti ween falfatiisenye eti kootte Beetero nabah ng'ure kichee, wihi us iyidah, “An atihi usú gos goyaka leejirto ma kiargin a?”
[27] Beetero toro yeedaas 'dii'de, chirraas on lukki riire.
[28] Baryo ka ewweenki Ya'huud Yeesso min Kayaafa kakhaate, minki buurenye gaafanahi Roomee geeche. Ewweenki Ya'huud la minki etaas goya ma gelin, i'di tahe ichohi geeddi icho gololi daawti Baasakka iumhan isbi'dirroocho ma 'doonaan.
[29] Bilaato 'deerka khar ka isoobahe, “Eta mehe kacheekattaan?” worsate.
[30] Icho la wihi icho soolaabeen, “Chirri kootte us wohoo suuje iyeelin nah usu inta ma keenno.”
[31] Bilaato la wihi us iyidah, “Atin rubeytiin khaata, amurretiin ka hukkuma.” Weynaanti Ya'huud la 'dii'dde wihi iche tidah, “Nah antohi nah etoo kalday laka omoot ikagoonno ma khabno.”
[32] Waha a yitaaheene, 'dee wihi goorat Yeesso yidahye saggi us isooyamuut miinsan labuuhicha.
[33] Bilaato 'deerka minki buurenye gaafana goya inokhte, Yeesso wahe wihi us worsate, “Karnati Ya'huud a ati?”
[34] Yeesso la wihi us worsate, “Yeeda ati kaayimiy, bal 'doo'doo addane eti an ahe kisoocheeke?”
[35] Bilaato wihi us ilaabe, “Kol an Ya'huud ahe koogtahe? Yaaftaah ichoow kuhaaniyyohaahki wewweene dahanteey kisoogesse. At mehe yeesse?”
[36] Yeesso la wihi us iyidah, “Dakheey ki harrata mee. Chirri kootte iche i'daase tahe, abattiteey diho gessa jiti ewweenki Ya'huud ikakhaban yowatta. I'daasenyi toolla antohi an walah kadakhdi intoo addane kayamiitiin.”
[37] Bilaato wihi us iyidah, “At 'deerka a karnat!” Yeesso wihi us ilaabe, “Aa, at a eysiisse, cha'at an a karnat tidah! Rumanka ani jeentetaase liidele, toro jeentetaase harrata iimiyye, 'dee rum cheeka. Eti tuummane rum 'doono, a idagansata.”
[38] Bilaato la wihi us worsate, “Yeedi rummaat a mehe?” Bilaato toro 'doo'di Ya'huud ibahe wihi us iyidah, “An eta walah lakacheekti an argo mele.
[39] I'daasenyi a hugunkiinna cha'an daawti Baasakka ka etoo hidan atin isoofuro. Anihi ‘Karnati Ya'huud’ soofuro a 'doontaan?”
[40] Icho la riireene, “Mele, usu mee! Barraba nah sii!” yidaaheen. Barraba la goorat 'doo'doo sirgaal 'dii'do goya kijire.