[1] Etoo Farissaayeenye Nikodeemo layadeehe Jaldaabti Weene Ya'huud kichokoowe a jire.
[2] Ulla ibeen Yeesso iyimiyye wihi us iyidah, “Eti ween, saggi at etoo Waakh sooergate enenyet walah abcho itahe a garanna. A mehe wahanyeyyohi miigti Waakh tuso at yeesso, et addane yeelo mele, eti Waakh leejiro on menye.”
[3] Yeesso la wihi us ilaabe, “Rume kisoocheeka, et dakhi Waakh argo mele sammata koli lammaatteet liidelin.”
[4] Nikodeemo la wihi us worsate, “Saggoh eti ween toro liidela? Rumanka koli lammaatteet uur abartiis ma inokhti ma dessi!”
[5] Yeesso wihi us ilaabe, “Rume atin icheeka, et dakhi Waakh gelo mele, sammata bicche ichoow Rubeyti Munyee ka liidelin.
[6] Weeli enenyet sartiis aabbahiis ichoow abartiissa ka'hela, toro la rubeyti weeli enenyet, Rubeyti Munyeenye jiro ka'hessa.
[7] Yeedeeyki an, ‘Atin toro koli lammaatteet a atin laaddelo,’ idah akagirmeysan.
[8] Hafar anki us 'doono isohta. Yeenaanki us yeedo la ladaaga, i'daasenyi et inti us kayimiy ichoow inti us isohti garti mele. Eti Rubeyti Munyee jiroti husub siisse laka a i'daas on.”
[9] Nikodeemo la wihi us worsate, “Waha saggoh iyateehiin?”
[10] Yeesso la wihi us ilaabe, “At a etoo 'doo'di Issiraayel Yeedi Waakh abcho, toro la wahanyeyyoha ma abanna?
[11] Rume kisoocheeka, wihi nah garanni a atin isoocheekna, wihi nah indo kaagarre laka a atin isoocheekna. I'daasenyi, atin wihi nah atin idowno ma rummeysattaan.
[12] An wahanyeyyohi harratane atin isoocheeke atin la ma rummeysattaan. Sag 'deerka atin wahanyeyyohi goobi Waakh miinsane an atin idowo irummeysattaan mele gon.
[13] Ínam Aadamhi goobi Waakh kasookhubte on menye, et addane injire goobi Waakh ikore mele.
[14] Saggi goorat Muusa hidaad ka toof iokkhichuu, saggaase Ínam Aadam laka liiokhicha,
[15] 'dee eti tuummane ani irummeeste, jiroti jirtuu imassan 'hela.”
[16] I'di tahe Waakh weeli enenyet tuumman weyti 'doone, 'deerka weeliiski kalday soodiibe, 'dee eti tuummane Weeli Waakh rummeeste ma yamuute, i'daasenyi jiroti jirtuu imassan 'hela.
[17] A mehe Waakh Weeliis weeli enenyete us hukkumo ma isooergin. I'daasenyi a sooerge, 'dee weeliis ka weeli enenyet tuumman uskeeliis kariba.
[18] Eti tuummane Weeli Waakh rummeeste ma lahukkumo. I'daasenyi eti tuummane irummeysan orey on lahukkume, a mehe Weeli Waakhe keleye ma rummeysan.
[19] “Wihi Waakh gooche kallaayo. Runti Waakhe i'di banayeete harra a soogesse, i'daasenyi enenyet banayhi Waakh menye, mug'di on 'doona. A mehe wihi icho yeelaan a wihi uskeel kaldach on.
[20] Eti tuummane suujoon yeelo, banayhi runti Waakh a 'dii'da, toro la banay goya ma soogelo. I'di tahe usuhi uskeeli us yeelo laargo ma 'doono.
[21] I'daasenyi eti tuummane wihi rummaat yeelo banay goya soogela, 'dee banay la saggi wihi us yeele wihi Waakh 'doono iyahiin tusaan.”
[22] 'Da'ddaboka, Yeesso abattitiis khabaayi boroofenhi Ya'huudiya ankiiskoo irte, geeddoor leefiddiye, toro la enenyet laka baattissiye.
[23] Yoohana laka iloo Aynoone layadeehe ilkerengeetti Saalim haggee, iche 'doo'd kabaattissiya. I'di tahe bicchehi buurenye intaas kajira. 'Doo'd la geeddi nool usu iirta, ulla baattissiya.
[24] Waha la a geeddi Yoohana jeela liigelin.
[25] Abatti Yoohanatoo ichoow etoo Ya'huude ba yeedoo daawti saggi isliidikho bi'dir islabahcho miinsan isleeiriireen.
[26] Yoohana iyimaateene, wihi icho iyidaaheen, “Eti weenoow, eti goorat hawti Yoordane 'dusso 'dirihiche ka kileejire, at woriis kayeyyeedde kalla. Yey, enenyet tuumman la usu iirta, ulla baattissiya.”
[27] Yoohana waha ka wihi us ilaabe, “Wihi Waakh soomure on menye, walah eti i'dee kayateeh mele.
[28] Atin tuumman a cheektaane, wihi goorat an idah a mehe ya, ‘An Ki Lasubhe mee, i'daasenyi a eti Waakh ortiis sooerge.’
[29] Mindischo ka, eti min disti iche iname makhaabassiis tahe. Aali eti min disti la, chirra us hooyi eti min disti daago, iche hamaada. Annaka jeentetaase weyti ihamaada.
[30] Usu gon magah 'diriheey 'hela, anna magah waaya.”
[31] “Weeli Waakhe goobi Waakhe saraat kayamiit, usu 'doo'd tuumman kaween. Ani a ki harratane, wihi harratane kayeyyeeda. Ki goobi Waakh kayamiit la, usú 'doo'd tuumman kaween.
[32] Us wihi us arge ichoow wihi us daage 'doo'd icheeka, i'daasenyi et wihi us cheeke rummeesti mele.
[33] Chi' etoo yeediis kakhuufe, etaas saggi wihi Waakh yidah rum iyahiin, iche tusa.
[34] A mehe eti Waakh sooerge farniinki Waakhe kaayyeeda. I'di tahe Waakh etaas Rubeytiisti Munyee iche buuh ka rubeytiis goya gessa.
[35] Aabbaheen weeliis a 'doona, walah tuumman la dahantiissa gesse.
[36] Eti tuummane Weeli Waakh rummeeste, jiroti jirtuu imassan a khaba. I'daasenyi eti tuummane Weeli Waakh 'dii'do jiro ma khabo. A mehe holi Waakh usu a fuula.”