[1] Waha 'dubicho ka, Yeesso abattitiis khabaayi Beyti Buurenye Gaalilaaya, magahichekoo addan Beyti Buurenye Tibeeriya layadeeh, aficheki 'diri imaahe.
[2] Ururoo buure la Yeesso raahe, wahanyeyyohi ittaawenye miigti Waakh tuso us haaggicho us 'doo'di khakkhannan samaache, iche argeen.
[3] Yeesso la abattitiis khabaayi haloo kore, orronte.
[4] Ibeenki Daawti Ya'huude Baasakka lagelo la a soodowwaate.
[5] Chirri Yeesso serey yeye ururi buurenye isoosohti arge ka, wihi us Fiilif iyidah, “Intoh gololi inno 'doo'da tuumman kagoollinno kasooganna?”
[6] Yeesso jeenteti us etaas ikajo on waha iworsate, a mehe wihi us sooyeelo orey on garte.
[7] Fiilif wihi us Yeesso ilaabe, “Gololi 'doo'da ebba wohoor on yaham, chilimmeti eti orrah kud lamma hil haaggiche laguto, iche 'doona!”
[8] Andereeyahi ullaka abatti Yeesseenye, Siimonhi Beetero layadeeh leedesse, sooyeede wihi us yidah,
[9] “Inankoo makaate chan 'dargaayye lakahaaggiche, ichoow bahag lamma rurrucchul khabo kalla. I'daasenyi koloo kalday laka 'doo'da ittaawe ma yaakhaan.”
[10] Yeesso la wihi us yidah, “'Doo'd orrommicha.” Intaas la hoosi buurenye khabte. Mejeli orronte la a geeddi alif chan.
[11] Yeesso 'deerka makaateyyo khaate, Waakh kala'd ilaabe, 'doo'di intaas fiddiyo geeddi icho 'doonaan gise. Bahag laka i'daas on yeele.
[12] Chirri icho tuumman dargeen ka, Yeesso wihi us abattitiis iyidah, “Gololi laajjebche lasoowaache soosuuna, uus inno wohoo rucchul laka baabiinne.”
[13] 'Deerka abatti enjel tomon ichoow lamma makaateyyohi chanenye 'dargaayye lakahaaggiche lasoowaache buuhaan soosuunte.
[14] Inkoo 'doo'd wahanyeyyoha miigti Waakh tuso Yeesso yeele arge ka, 'doo'd wihi us yidah, “Rumanka, eti goorat Muusa cheeke, ‘Etoo Waákh íyeyyeedo 'dee berri harrata a yamiit,’ yidah a kan.”
[15] Yeesso la saggi icho miig ka ikhabtaane, icho karnat ikayeelin i'doonaan abte, keley toro haloo inokhte.
[16] Chirri il gelebnowe ka, abattitiis beyti Gaalilaaya ikhubatte.
[17] Intaas ka kooban goya gesse bey aficheki 'diri imaahte, ilkerengeetti Kafarnaa'hume isohtaanee. Sohtaani, il ibeennowe. Yeesso la uliba abatti ma isoonokhan.
[18] Hafaroo miige sookahe, bicche uskulaateen.
[19] Chirri iche geeddi kiilomitta chan ommos lih illeh kooban woyte ka, Yeessohi bicche sarcho kasoosohti kooban isoodowwaate agarte, weyti nahte.
[20] I'daasenyi wihi us iyidah, “A ani, roorro akhabina!”
[21] Abatti la ichehi Yeesso kooban korisso 'doonte. Kooban la chirraas on inti icho isohtaan eleeleen.
[22] Ibeenki kaas sooraaho ka, ururi bey aficheki 'diri kajire, saggi chele koobanhoo kalday on intaas ikajireen kase. Toro saggi Yeesso abattitiis kooban ileekorine, i'daasenyi abatti kalday on iiratte laka kaseen.
[23] Koobanohoo anki ilkerengeetti Tibeeriya kayimiy la yimaateene, inti chele inkoo Kamur Waakh kala'd ilaabe urur fiddiye makaate kayuhum yimaateen.
[24] Inkoo urur saggi Yeesso ichoow abattitiis ba intaas ikajirin kaseen ka, koobano geleene, ilkerengeetti Kafarnaa'hum irteen, Yeesso yowtaanee.
[25] Inkoo 'doo'd bey aficheki 'diri ka Yeesso 'hele ka, wihi icho usu worsateen, “Eti ween, at chirroh inta timiy?”
[26] Yeesso wihi us ilaabe, “Rume atin icheeka, atin jeenteti an wahanyeyyohi miigti Waakh tuso iyeele mee ani iyowattaan. I'daasenyi jeenteti atin makaate itumheene atin idaragteene ani iyowattaan.
[27] Gololi dowwa on kheerowo hol iidowina, i'daasenyi gololi ikheerowine 'doo'di yuhum jirtuu tuumman jiro, Ínam Aadam atin siicho hol idowa. I'di tahe Waakkhi Aabbaheene saggi us usu i'doono on igooche.”
[28] 'Doo'd la wihi us Yeesso worsate, “Mehe yeella 'dee Waakh kahamaadinna?”
[29] Yeesso wihi us ilaabe, “Wihi Waakh atin ka'doono, a atinhi eti us sooerge rummeysattaan.”
[30] Icho la wihi icho worsateen, “Mehe 'deerka miigti Waakh tusa yeessa 'dee kirummeysanna? Mehe yeessa?
[31] Aacchinyeteenyo goorat archiiy gololoo manna layadeehe hidaad ka tuhum. I'di liichiiruu, ‘Gololi serey kayimiyye siiche kagolossateen.’ ”
[32] Yeesso la wihi us icho iyidah, “Rume atin icheeka, eti gololi goobi Waakh kayimiy atin siiche Muusa mee. I'daasenyi Aabbahaaya gololi rummaate serey kayamiit atin siicha.
[33] A mehe gololi Waakh 'doo'd siicho a eti goobi Waakh kayamiite, weeli enenyete harrata jiroti jirtuu imassan siicho.”
[34] Iche la wihi iche Yeesso itidah, “Eti weenoow, golola maan dakkhan nah sii gi'de.”
[35] Yeesso la wihi us ilaabe, “Ani a gololi rummaate jiro lakeelo. Eti tuummane ani iyamiite, ani irummeesti la, a i'doo us jirtuu iankayine ommos jirtuu isubgaan.
[36] I'daasenyi saggi an orey atin ikiidah u, ‘Atin iagarteene toro la ma irummeysan.’
[37] “Eti tuummane Aabbaheey dahanteey soogesso ani iyamiit. Anna eti tuummane ani iyimiy jirtuu ma riho.
[38] I'di tahe an goobi Waakhe kiimiyye, wihi an 'doono menye, i'daasenyi wihi Aabbaheeyki isooerge 'doono, iche yeela.
[39] Eti isooerge la wihi us 'doono a mehe ya, a anihi 'doo'di us isiiche koo kalday laka ibaabiine, i'daasenyi an ibeenki 'da'ddaboot ka, icho tuumman omoot kasookahcho.
[40] I'di tahe wihi Aabbaheey 'doono a mehe ya, a usuhi eti ani iarge toro irummeeste tuumman jiroti jirtuu imassan 'helo. Anna ibeenki 'da'ddaboot icho tuumman omoot a kasookahcha.”
[41] Jeenteti Yeesso, “An a gololi goobi Waakh kayimiy,” iyidah u, 'doo'di Ya'huud nyunnyuwe.
[42] Wihi icho yidaaheen, “Eta Yeessohi ínam Yuussufe menya? Aabbahiis ichoow abartiis inno ma garanni? Saggoh toolla goobi Waakhe kiimiy iessa?”
[43] Yeesso la wihi us ilaabe, “Wihi an atin iidah akaannyuwina.
[44] Et ani iyamiit mele, sammata Aabbaheeyki ani isooerge ikakeenin. Anna etaas ibeenki 'da'ddaboot omoot a kasookahcha.
[45] Khadaaboo eti Waákh íyeyyeedo wihi kachiiran, ‘Weeli enenyet tuumman Waakhe walah abchá.’ Eti tuummane wihi Aabbaheey essi daago toro la wohoo kaabti, ani iyamiit.
[46] Anihi Waakh kiimiy kalday on menye, et addane Aabbaheey arge mele. Ani kalday on Aabbaheey arge.
[47] “Rume atin icheeka, eti tuummane ani irummeesti, jiroti jirtuu imassan a khaba.
[48] Ani la a gololi rummaate jiro lakeelo.
[49] Aacchinyetiin goorat archiiy hidaad ka gololoo manna layadeehe tuhuyye, toro la a tuunte.
[50] I'daasenyi gololi goobi Waakh kayamiit, i'di manna mee. Eti tuummane golola goobi Waakh kayamiit yuhum la ma yamuut.
[51] Ani a gololi rummaate jiro lakeelo goobi Waakh kayamiit. Eti tuummane golola yuhum, jirtuu tuumman a jira. Gololi an eta siicho a sarteeyti an soobahcho, 'dee 'doo'di harrata jiro ka'helo.”
[52] 'Deerka 'doo'daas Ya'huud yeedaas Yeesso ka weyti holloweene, isleeiriireen. Wihi iche isworsatte, “Eta saggoh sartiis inno isiicha inaham?”
[53] Yeesso la wihi us ilaabe, “Rume atin icheeka, sammata atin ínam Aadam sartiis iumhane toro la diiggiis idamin, jiroti rummaat ma khabtaan.
[54] Eti tuummane sarteey yahame diiggeey la damo, etaas jiroti jirtuu imassan a khaba. Anna eta ibeenki 'da'ddaboot omoot a kasookahcha.
[55] A mehe sarteey a gololi rummaate, diiggeey la chirri ladame, rumanka rubey nolole ikeena.
[56] Eti tuummane sarteey yahame diiggeey la damo, goytaaya fiddiya, anna goytiissa fiddiya.
[57] Aabbaheeyki jiro lakeelo ani isooergate jiro a isiiche. Saggaas u la, eti tuummane sarteey yaham ani laka usú jiro a siicha.
[58] Maantaka gololi goobi Waakh kayimiy a kane, golola la i'di gololi goorat aacchinyetiin tuhuyye saahka tuunte mee. I'daasenyi eti golola yuhum jirtuu tuumman a jira.”
[59] Yeesso chirra us waha essi, a chirri us ilkerengeetti Kafarnaa'hum ka, minki weysiite Ya'huud ka enenyet walah abcho.
[60] 'Doo'di ittaawenye Yeesso raaho waha daage wihi us yidah, “Yeeda weyti miigyahe. Ayyo nabah isuda?”
[61] Yeesso saggi 'doo'di usu raaho waha ka inyunnyuuwo kase, wihi us icho iyidah, “Ahollowina.
[62] Eemba Ínam Aadam usuhi inti goorat us kijire ikoro a agarteen?
[63] Rubeyti Waakhe enenyet jiro siissa. Weeli enenyet, enenyet jiro ma siicho. Yeedi an atin icheeke la Rubeyti Waakhe kayamiite, toro la enenyet jiro siicha.
[64] I'daasenyi gaasiinkoo uliba ma irummeesti.” A mehe Yeesso uus uumaccho ka 'doo'di usu irummeysan ichoow eti 'dub soogoocho a garta.
[65] Yeesso toro yeed orey iwoye wihi us yidah, “Jeentetaase an mehe atin iidah ya, et ani iyamiit mele sammata Aabbaheey ani isiin.”
[66] Uus chirraas la, 'doo'di ittaawenye Yeesso raaho Yeesso adah kakhabte, ma raahin.
[67] Yeesso abattitiisti tomon ichoow lammee wihi us worsate, “Atin laka atinhi adah ikakhabattaane 'doontaan?”
[68] Siimonhi Beetero layadeeh wihi us ilaabe, “Kamur ayyo addane iiranna? Ati kaldaye yeedi jiroti jirtuu imassan lakeelo khabta.
[69] Toolla la nah saggi at Ki Munyeenye Waakh kayimiy itahe a rummeysanna toro la a garanna.”
[70] Yeesso 'deerka wihi us ilaabe, “Ani menya atinha tomon ichoow lammee atin soobahsade? I'daasenyi goytiin ka, etoo a ki Seytaan!”
[71] Eti us woriis kaayyeedo la a Yuuda Iskaariyoot. Yuuda la a ínam Siimon Iskaariyoot. I'di tahe Yuuda, chirri us abatti Yeessoti tomon ichoow lammee goya kajiro laka, usu berri Yeesso 'dub goocha.