[1] Yeesso wihi us 'doo'd iyidah, “Rume atin icheeka, eti sunki iiyyaat ka arit itabine, i'daasenyi 'dossoo on tabe sum gele, etaas hatto leeyahe, toro la a eti enenyet walah saro.
[2] Eti arit kagelo a ersinki iiytiissa.
[3] Eti arit yaakhicho la ersim arite ifaha. Iiye la geeddi ersim iche tuumman magahenyetiche kaawwaho hooyiis a daagta. Ulla toro iiy a tuma, toro iiy ortiche raaha.
[4] Chirra us iiy tuumman tumo, orcheeda raaha, iiye la 'dubiis raahta, i'di tahe iiye hooyiis a garatta.
[5] I'daasenyi iiye eti ersinkicho ieheynan ma raahto a kafiridda, i'di tahe hooyiis ma garatti.”
[6] Yeesso 'doo'd hawweesa icheeke, i'daasenyi 'doo'd wihi hawweesa miinsanyahe ma aban.
[7] Maantaka Yeesso toro wihi us yidah, “Rume atin icheeka, ani a i'di aritti sunki iiyyaat.
[11] “Ani a ersinki haaggan. Ersinki haaggan la jeenteti us iiytiis iribo on u, jirotiis a bahcha.
[12] Eti lakireeste, iiy yaakhime igaranne iiye la tiis ieheynan, chu'us yaay arge, iiy a kataba, firda. Yaaye 'deerka iiy goyaka koo tagiise, iiyti addan la seley baabaata.
[13] Eti lakireeste iiye tiis mee gone, iiy la aw ma ikhabo gone, a kafirda.
[14] “An a ersinki haaggan. Iiyteey a garda, iiyteey la a igaratta.
[15] Saggi Aabbaheey ani igarti, iche ani laka Aabbaheey igarda. Anna jeenteti iiyteey u jiroteey a bahcha.
[16] 'Doo'doo addane i'di iiyteeyenye, woyheey goya ikajirin a jira. Kaas laka a soodowa. Icho laka hooyeey a dagansataane, icho tuumman la i'di woyhoo kaldache ersinkoo kaldach khabo yateehiin.
[17] Aabbaheey jeenteti us ani i'doono, a jeenteti an jiroteey ibahcho, 'dee toro 'da'ddaboka an omoot ka isookaho.
[18] Et jiroteey ikabahcho mele, i'daasenyi ani on i'daanu bahcha. Antohi an jiroteey kabahcho a khaba, toro antohi an isikasoolaabo a khaba. Amura Aabbahaaya ka'hele.”
[19] Yeedaas us yidah ka, 'doo'di Ya'huud toro seley gowe.
[20] 'Doo'd buurtiis mehe essa ya, “Eta ginna dakhatta, a sirgowe. A i'doh idagansattaan?”
[21] I'daasenyi 'doo'doo addan mehe essa ya, “Waha yeyyeedi eti ginna dakhatti mee. Ginna eti indo laa indo a furta?”
[22] Maantaas la Daawti Maanti Minki Waakhe Buure Ladikhe lakasoo'helo ilkerengeetti weene Yeerusaleeme lakagele. Yeesso laka 'deerka ilkerengeetti weene Yeerusaleem irte. Maantaas la a hayohi il roffo yahe.
[23] Yeesso la minki Waakhe buure goyaka intoo, Gaayim Soolomon layadeeh iche raaha.
[24] Weynaantoo Ya'huud Yeesso khaarisse, wihi iche itidah, “Ichoowka maantoh waha nah kadagissa? Cha'at Ki Lasubhe tahe, rum on nah isoocheek.”
[25] Yeesso wihi us ilaabe, “An orey on atin isoocheeke, i'daasenyi atin ma irummeysan. Wihi ittaawenye weeli enenyet yeelin iubaa'dane an antohi magah Aabbaheey ka yeelo, eti an ahe cheekaane,
[26] i'daasenyi atin ma rummeysattaan, a mehe atin 'doo'di i'di iiyteeye mee.
[27] 'Doo'di i'di iiyteeye hooyeey a daaga, anna icho a garda, icho la ani a isooraahaan.
[28] 'Doo'di ani isooraaho la jiroti jirtuu imassanne siicha, icho la jirtuu ma yamuutiin. Et dahanteey ikasaro mele.
[29] Aabbaheeyki dahanteey soogesse walah tuumman a kaweenyahe, jeentetaas u la, et dahan Aabbaheey kabihin yabuu'd mele.
[30] Ani ichoow Aabbaheey a koo kalday.”
[31] Weynaanti Ya'huud toro dagah okhsatte, Yeesso dagah kachibtaa.
[32] I'daasenyi Yeesso wihi us iyidah, “Anto Aabbaheey ka wihi ittaawenye weeli enenyet yeelin iubaa'dan goytiin ka a yeele. Waha an yeele goyaka, jeenteti kichekoh dagah ka ogoos i'doontaan?”
[33] Wihi icho ilaabeen, “Jeenteti haagga at yeesse mee dagah ikaasaano, i'daasenyi a jeenteti at igafte. I'di tahe at a weeli enenyet one, toro Waakhe iskaayyeessa.”
[34] Yeesso la wihi us icho ilaabe, “Amurretiin rubeyche ka mehe chiiran ya, ‘Waakh mehe yidah ya, atin a waakkhakh.’
[35] Saggi atin igarattaan u, Chiirnaanneti Waakh ma luurgiyicho. Chirri 'doo'daas Yeedi Waakh 'hele, ‘waakkhakh’ lakawahe,
[36] ki Aabbaheey soobahsate kiis kayeesse harrata isooerge la? A i'doh 'deerka cha'an, ‘Ani a Weeli Waakh,’ idah, a gafe ielattaan?
[37] Chirri an wihi Aabbaheey yeelo iyeelin, iirummeysanna.
[38] I'daasenyi chirri an wihi Aabbaheey 'doono yeelo toro la atin ani irummeysan laka, wihi ittaawenye weeli enenyet yeelin iubaa'dan rummeesda. I'da ka saggi Aabbaheey goyteey ikijiro anna goytiis ikijiro a abattaan.”
[39] 'Doo'd toro Yeesso khaban leheete, i'daasenyi 'doo'd goya tabe kabahsate.
[40] Yeesso 'deerka toro nokhte, hawti Yoordan aficheki 'diri goorat Yoohana 'doo'd kabaattissiyo imaahe, intaas fiddiye.
[41] 'Doo'di buure la Yeesso iyimiy. Wihi icho yidaaheen, “Chirri goorat Yoohana wohoo miigti Waakh tuso iyeelin laka, wihi eta miinsane us yidah tuumman a rum.”
[42] 'Doo'di buure la intaakka Yeesso rummeeste.