[1] Bilaato 'deerka, “Yeesso a lakhaato, laajja ka a lajaho,” yidah.
[2] Iskare la 'duuboo kudaheet iskayuubte matah Yeesso korisse, dafartoo muggee laka i'di karnat u gelisse.
[3] Iskare isoononnokhatte, “Karnati Ya'huudoow, jiroti deer 'hel,” idoddowte, toro la fodoorre jajjahte.
[4] Bilaato toro koloo addan urur isoobahe, wihi us iyidah, “Yeya, kharane isoobahcha atin ikeena, 'dee saggi wohoo rucchule lakahukkumo an ikaargin agartaan.”
[5] Chirri Yeesso 'duubi kudaheet ichoow dafarti muggee khabaayi khar isoobahe ka, Bilaato wihi us 'doo'd iyidah, “Et kalla!”
[6] Uus kuhaaniyyohi wewween ichoow iskarti minki Waakhe buure yaakhisso Yeesso agarte ka, riirte, “Massalaaba kakaah! Massalaaba kakaah!” tidah. I'daasenyi Bilaato wihi us ilaabe, “Atin khaata massalaaba kakaaha. Ani ka walah lakacheekti an argo mele.”
[7] Weynaanti Ya'huud tirriinsatte wihi iche tidah, “Nah amuri eti i'dee a layigaase yadeeh a khabna. A mehe us, ‘Aní Weeli Waakhe,’ iche essa.”
[8] Chirri Bilaato saggi Yeesso Weeli Waakh isikawahe daage ka, geeddi kootteet 'dirihiis roorro gesse.
[9] Minki buurenye gaafana goya inokhte, Yeesso, “Intoh katimiy?” worsate. I'daasenyi Yeesso walah us laabe mele.
[10] Bilaato la wihi us Yeesso iyidah, “At ani ma ileeyyeeddo? Saggi an antohi an kaafuro ikhabo ommos antohi an massalaaba kaakaaho ikhabo ma kasso?”
[11] Yeesso wihi us ilaabe, “Waakh on anto kisiiche menye, at anto at ikakhabto mele. Maantaka eti dahanohaah igesse, uskeeli us khabo kaah laka a kuta.”
[12] Chirri Bilaato waha daage ka, jiti us Yeesso kafuro yowte. I'daasenyi weynaanti Ya'huud riirte wihi iche tidah, “Chirri at eta soofurte, at aali karnati ili Rooma mee! Eti tuummane karnat iskawaho karnati ili Rooma tirrima.”
[13] Chirri Bilaato yeeda daage ka, Yeesso khaate, khar ibahche, inti 'doo'd lakahukkumo, “Orotti dagaheet,” layadeeh keene. Magaha afi Ibiraaniya ka la Gabaa'da layadeeh.
[14] Saha'd tomon ichoow lammati chirdeereet, Ibeenki Latannabti daawti Baasakka orchee, Bilaato wihi us 'doo'di Ya'huud iyidah, “Karnatiin kalla!”
[15] I'daasenyi riireene, “Agiis, agiis! Massalaaba kakaah,” yidaaheen. Bilaato toro wihi us worsate, “Anihi karnatiin massalaaba kakaaho 'doontaan?” Kuhaaniyyohi wewween wihi icho ilaabeen, “Kaaysar on menye, karnat addane nah khabno mele.”
[16] 'Da'ddaboka Bilaato Yeesso dahanohicho gesse, 'dee massalaaba a kakaaheen. Iskare 'deerka Yeesso khaatte.
[17] Yeesso massalaabatiis si'daayi bahe. Meessoo Meessi Lafohi Matahe Enenyet layadeeh irte. Meessa la afi Ibiraaniya ka a Golgoo'da.
[18] Inta ka massalaaba kakaaheen. Reeroo lammee laka Yeesso leekaaheen. Kooba Yeesso ankiiskoo lakakaahe, Yeesso la dahcho lakakaahe.
[19] Bilaato la amuri baawatoo lachiiro, massalaaba Yeesso sarche lakaloo'dicho bahche. Wihi lakachiire la a mehe ya, Yeessohi Ilkerengeetti Naasaret, Karnati Ya'huud.
[20] 'Doo'di ittaawenye Ya'huud la chiirnaannetaas soome, i'di tahe meessi Yeesso massalaaba lakakaahe, ilkerengeet ma kadeer. Wihi baawa kachiiran la afi Ibiraaniya ichoow afi 'Deylaan ichoow afi Giriige lakachiire.
[21] Kuhaaniyyohi wewween la wihi icho Bilaato iyidaaheen, “ ‘Karnati Ya'huud’ akachiirine, i'daasenyi eta, ‘An a karnati Ya'huud,’ iche isyadeeh, kachiir.”
[22] Bilaato wihi us ilaabe, “Wihi an chiire, koloo kalday laka ma luurgiyicho.”
[23] Inkoo iskare Yeesso massalaaba kakaahte ka, gaaddiisti saraat et affar ka gisante. Dafartiisti goyaatteet la a dafartoo kaldache ma tolan la.
[24] Iskare wihi iche isitidah, “Uus inno khakkharadinne, kaaleya kura a igu'dubno, eti khaatti a agarro!” Waha la a yitaaheene, 'dee Chiirnaanneti Waakhe i'da tadeeh labuuhicha, “Darfoheey a gismeene, toro la dafarteeyti goyaatteet kura igu'ddeen.” Wihi iskare yeesse 'deerka a wahaas.
[25] 'Doo'di massalaaba Yeesso hagga toolle a abartiis ichoow iingotiis ichoow Maariyati makhaabál Kiiliyoobaase ichoow Maariyati ilkerengeetti Magdaala.
[26] Yeesso abartiis ichoow eti us abattitiis goyaka weyti 'doono ichohi intaas toollo arge. Yeesso wihi us abartiis iyidah, “Abartaay, eta inankaah kayeelo.”
[27] Etaas abattitiise la wihi us iyidah, “Eta, makhaabassa abartaah kayeelo.” Uus maalinkaas la, eta abattee Maariya khaate goobiis geeche.
[28] Yeesso chirraakka saggi wihi goorat yateeh tuumman iyitaaheen garte. Ulla saggi us wihi Chiirnaanneti Waakh tadeeh ibuuhichuu, wihi us yidah, “An a subgaade.”
[29] 'Dirihoo farsoti sabiibe birrakhe kijirto la intaas a kajire. 'Deerka haaruggoo farso goya kalug'deene, haaruggaas kho'doonkoo deer kachuukheene, Yeesso ioogeene, af gesseen.
[30] Chirri us farsota surrukhe ka Yeesso wihi us yidah, “Walah tuumman a massateen.” Wahaas ka matah soolug'de, rubey gooche.
[31] Ibeenki Latannabti kola a yitah. Ibeenki kaas sooraaho la, a Seeri Lanaso weyti khumman. Weynaanti Ya'huud la sarti Seeri Lanaso massalaaba kajirto ma 'doonto. Bilaato amuri luhlo lakaajjebcho 'dee sar lasooyagcho daaheen.
[32] Iskare 'deerka timiyye, 'doo'di kootte Yeesso laleekaahe ki oraat ichoow ki addan ba luhlo jejjebisse.
[33] I'daasenyi chirri iche Yeesso sooeleesse ka, saggi us iyumuy agarte, luhlohiis ma jejjebin.
[34] Etoo iskareet toor ka Yeesso waaru 'hune, diig ichoow bicche kasookhubteen.
[35] Eti waha arge, ayti rummaate cheeke, 'dee atin laka Yeesso rummeysattaan. Wihi us cheeke la beene ma kijirto, ulla saggi us rumanka wihi rummaat icheeko, a garta.
[36] Waha la a yitaaheene, 'dee wihi Chiirnaanneti Waakh ka lachiire labuuhicha, “Laftiistoo kalday laka ma lajebcho.”
[37] Toro la i'di chiirnaankoo addan Chiirnaanneti Waakh goyaka yadeeh u, “'Doo'd eti icho toor ka 'huneen a 'dey'doocha.”
[38] Yomboka etoo Yuussuf layadeehe ilkerengeetti Arima'daaya kayimiy, irte Bilaato sar Yeesso daahe. Yuussuf la dagsi ka abatti Yeesso eheet, jeenteti us weynaanti Ya'huud ikarooruu. Amuri Bilaato siiche ka, yimiyye sar Yeesso khaate.
[39] Eti leejire la, a Nikodeemohi goorat orey Yeesso ibeen iyimiyye, leeyyeede. Nikodeemo uyuuggetoo geeddi kiilo tomon seyyahe sookhaate. Uyuuggetaas la, miricchihoo ichoow abahti geeyoo miir layadeehe islakachibe.
[40] Lammache ba sar Yeesso khaatte, uyuugge kachibeene goonanneti darfoot leeyuubte. Waha ichoow hugunki yaafohi Ya'huud ka saggi eti yumuy il liikalaabo a israahaan.
[41] Inti Yeesso lakakaahe, gosoo a kajire, gosaas goya la go'ddoo lakhute, enenyet injire liikahawwaalin a kajira.
[42] Waha yaafohi Ya'huud ka a Ibeenki Latannabti gone, go'd la a soodowyahe gone, Yeesso go'ddaas kahawwaaleen.