[1] Yeesso jit raahaayi, etoo indo laan ladele arge.
[2] Abatti Yeesso la wihi iche Yeesso worsatte, “Eti ween, eta a i'doh indo laan liidele? Usú uskeel yeele bal 'doo'di dele?”
[3] Yeesso la wihi us ilaabe, “Eta ommos 'doo'di dele mee uskeel yeele. I'daasenyi waha a yitaaheene 'dee jirotiis ka saggi Waakh hil ihaaggicho laarga.
[4] Geeddi il on maalim yahe, hili Waakkhi isooerge a haagginna. Mug'di la a soogela, ki etoo kalday laka hil ihaaggin.
[5] Geeddi an harrata on kajiro, an a eti 'doo'di harra banay siicho.”
[6] Inkoo Yeesso yeeda yidah ka, hanjuf harra katufe, doobbotoo haaggiche, et indo sarche kawelweele.
[7] Wihi us et iyidah, “Nyaame, ge'dinti Silowaam layadeeh ka fool dikho.” I'da ka mehe leessa ya, “Eti leergate.” 'Deerka et irte, fool dikhte, usuhi il argo soonokhte.
[8] Ollokkiis ichoow 'doo'di tuummane 'hor usuhi walah daddaaho arge wihi icho worsateen, “Icho eta, eti orran fiddiyo walah daddaaho menya?”
[9] Gaasoo wihi icho yidaaheen, “Aa, a usu.” Gaasoo wihi icho yidaaheen, “Mele, usu menye, a etoo iyoog on.” I'daasenyi et rubeytiis tirrime, “Aa, a ani!” yidah.
[10] Icho la ihosseene, “Saggoh 'deerka il iagarte?” idoween.
[11] Wihi us iyidah, “Eti Yeesso layadeehe doobbotoo haaggiche, indo ikawelweele, ‘Nyaam, ge'dinti Silowaam layadeeh ka fool dikho,’ iyidah. Anna 'deerka irde, fool dikhde, il arge.”
[12] “Eta intoh kajira?” worsateen. Ulla, “An ma gardi,” iyidah.
[13] Eti goorat indo laa sookhaateene, Farissaayo ikeeneen.
[14] Ibeenki Yeesso doobbo haaggiche, eti indo laa samaache la, Seeri Lanaso eheneet.
[15] Farissaayo toro saggi us il iarge worsatte, ulla wihi us ilaabe, “Et doobbotoo indoheey kawelweele, anna fool dikhde. Toolla la il a arga.”
[16] Farissaayotoo la wihi iche tidah, “Eti waha yeele Waakh ma kiimaatan, i'di tahe amuri Seeri Lanaso ma raaho.” I'daasenyi gaasoo wihi icho worsateen, “Saggoh eti uskeel leh, wahanyeyyoha miigti Waakh tuso iyeela?” 'Deerka seley goote.
[17] Farissaayo et toro inokhatte wihi iche itidah, “Et indo a kihaaggiche gone, mehe usu miinsane tadeeh?” Et wihi us ilaabe, “Eta a eti Waákh íyeyyeedo.”
[18] Weynaanti Ya'huud uliba saggi eta 'hor indo ilaayahe toolla la us il iargo rummeysawwaayte, ichoowka 'doo'di dele waheen.
[19] Wihi icho worsateen, “Waha a inankiinna? Goorat indo laane desse elattaane, saggoh toolla il iarga?”
[20] 'Doo'di dele wihi us ilaabe, “Saggi us weeleenyo iyahe a garanna, saggi us indo laan idesse laka a garanna.
[21] I'daasenyi saggi us toolla il iarge ma garanni, ommolla eti indo haaggiche ma garanni. Usu worsada, ullaka a etoo weene, a isiyeyyeedo.”
[22] 'Doo'di dele jeenteti icho waha iyidaaheen, a jeenteti icho weynaanti Ya'huud ikarooraan. I'di tahe weynaane goorat mehe goosse ya, eti tuummane Yeesso a Ki Lasubhe cheeko, minki weysiite Ya'huud a lakabahcha.
[23] Jeentetaase 'doo'di dele, “Us laka a etoo weene, worsada,” iyidah.
[24] Koli lammaatteet inokhteene, eti indo laa waheene wihi icho iyidaaheen, “Waakh kooli, eta kisamaache saggi us eti uskeel leh iyahe a garanna.”
[25] Et wihi us ilaabe, “Uskeel khabyeey ichoow kuus ka ba an ma gardi. Wohoo kalday on garda. An 'hor indo ma khabo, i'daasenyi toolla il a arga.”
[26] Wihi icho usu worsateen, “I'doh kiyidah? Saggoh indo kihaaggiche?”
[27] Wihi us ilaabe, “An a atin isoocheeke, atin la ma daagtaan. A i'doh toro daagin i'doontaan? Atin laka sarka atinhi abattitiis tateehiine 'doontaan?”
[28] Farissaayo et leeabaarrante, wihi iche itidah, “At laka a abattiti etaase, nah la a abatti Muusa!
[29] Saggi Waakh Muusa ileeyyeede a tissibna, i'daasenyi etaas, inti us kayimiy laka ma garanni.”
[30] Et la wihi us ilaabe, “Enenne waha a girmo! Atin eta inti us kayimiy ma garattaane, ulla indoheey a ihaaggiche!
[31] Saggi Waakh 'doo'di uskeel leh nabah ikasudin a garanna. 'Doo'di usú inkaanyito wihi us 'doono yeelo la nabah a isuda.
[32] Uus goorat harra lasoouume, eti injire eti indo laan desse indo haaggiche ma ladaagin.
[33] Chirri kootte eta Waakh ikiimaatan, wohoo rucchul laka ma yeelo.”
[34] Waha ka wihi icho laabeen, “At uskeel goya kadelatte, toro la uskeel goya on kaweynaatte. Saggoh toollaka nah walah nah iabissa?” Khar iseyeen.
[35] Chirri Yeesso saggi icho et khar ikaseyeen daage ka, irte, etaas yowte, 'hele. Yeesso wihi us et iyidah, “At Ínam Aadam a rummeysatta?”
[36] Et wihi us iyidah, “Eti ween, chirri at eti us yahe isoocheekte a rummeesda.”
[37] Yeesso wihi us iyidah, “At toolla usu a agarte. Aniha kileeyyeedo a usu.”
[38] Et 'deerka wihi us yidah, “Kamur, a kirummeesda.” Et Yeesso wahte.
[39] Yeesso la wihi us iyidah, “An harrata a imiyye enenyet hukkuma, 'dee 'doo'di indo laa il arga, ki kol us il argo iskoog la indo waaya.”
[40] Farissaayotoo intaas kijirte la wihi us essi daagte, wihi iche worsatte, “Nah laka indo laanahe?”
[41] Yeesso wihi us ilaabe, “Chirri kootte atin indo laatahiin, uskeel atin khabtaan mele. I'daasenyi toolla atin ‘il a agarra,’ elattaan, waha saggi atin uliba uskeel ikajirtaane tusaan.”