[1] Farissaayo saggi Yeesso abattiti too Yoohana kiittaawe ibahsate toro la ibaattissiyo daagte.
[2] Rumanka la Yeesso rubeytiis enenyet ma baattissiyine, i'daasenyi abattitiissa enenyet baattissite.
[3] Kamur chirri us waha daage ka, boroofenhi Ya'huudiya katabe, toro abattitiis khabaayi boroofenhi Gaalilaaya inokhte.
[4] Wihi massan, chirri us boroofenha Gaalilaaya irti, boroofenhi Saamariya dah kagoocha.
[5] Chirri us boroofenhi Saamariya gele ka, ilkerengeettoo Siikar layadeehe, gosi goorat archiiy Yaakoobo inankiiski Yuussuf layadeeh siiche idow irte.
[6] Wor Yaakoobo la intaase kajirta. Yeesso la wor afiche orronte. A mehe geeddi deere soosohte, a kurme. Waha la a geeddi saha'd tomon ichoow lammati gelebeet.
[7] Chi' makhaabassoo yaafohi Saamariyee bicche waraaban timiy ka, Yeesso wihi us iyidah, “Bicchehoo an abhuub isii.”
[8] Abattitiis la ilkerengeete iratte golole soogattaa.
[9] Makhaabassi Saamariya la wihi iche Yeesso ilaabte, “Ya! Atiha Ya'huude saggoh anihi yaafohi Saamariyee bicchehi at tabhuub idaahta?” A mehe yaafohi Ya'huud ichoow yaafohi Saamariya walah icho iskakhabaan mele.
[10] Yeesso wihi us iche ilaabe, “Wihi Waakh enenyet siin 'doono garatte ka, ommos anihi bicche kidaaho eti an ahe garatte ka, kootte ati ani bicche idaahta, ani la bicchehi enenyet jiro keelo kisiicha.”
[11] Makhaabale la wihi iche itidah, “Eti ween, wore a hoge, at la wihi bicche lakasoogesso ma khabto. Biccheha jiro lakeelo intoh ka'hessa?
[12] Toro la, at aacchiheenyoki Yaakoobo layadeehe nah worta ka'helle a kaweentahe? Usu rubeytiis ichoow yeeletiis ichoow hoolahiis tuummamba worta on yubhaabeen.”
[13] Yeesso wihi us ilaabe, “Eti tuummane biccheha yabhuub toro a subgaata.
[14] I'daasenyi eti tuummane bicchehi an siicho yabhuub, jirtuu tuumman ma subgaati. Bicchehi an siicho la, goytiis ka i'di issi bicchehi jiro lakeelo yateehiine, jiroti rummaate jirtuu imassanne 'hela.”
[15] Makhaabale la wihi iche itidah, “Eti ween, bicchehaas isiiche, 'dee uus an jirtuu subgaanne, ommos worta isoonokhanne bicche waraaban.”
[16] Yeesso la wihi iyidah, “Nyaame, makhaabalaah soowahe, 'dee soonokho.”
[17] Wihi iche ilaabte, “An makhaábal ma khabo.” Yeesso la wihi us iyidah, “Rume cheekte, cha'at, ‘Makhaábal ma khabo,’ tidah.
[18] Wihi at tidah a rum! At áram chane kidisatte, ki toolla at leefiddiito la makhaabalaah mee.”
[19] Makhaabale wihi iche itidah, “Eti ween, saggi at eti Waákh íyeyyeedo itahe a arga.
[20] Aacchinyeteenti yaafteeyti Saamariyee, goorat halane Waakh kawahatte. I'daasenyi atinhi yaafohi Ya'huude, ‘Inti enenyet Waakh kawahti a ilkerengeetti weene Yeerusaleem,’ iche elattaan.”
[21] Yeesso wihi us makhaabál iyidah, “Makhaabassa, wihi an kidowo rummeyso. Ibeen a yamiit ki enenyet hala ommos ilkerengeetti weene Yeerusaleem Aabbaheey ikawahanne, meelbaaw us kijiro on ka wahti.
[22] Atinhi yaafohi Saamariya chirri atin Waakh wahattaan laka, atin usu rubeytiis ma garattaan. Nahi yaafohi Ya'huude la, Waakkhi nah wahanni a garanna. A mehe eti 'doorribo yaafohi Ya'huude kayamiit.
[23] Ibeen a yamiite toro la kola a yitah. Ibeenki Rubeyti Waakh 'doo'd woyto, 'dee 'doo'd Waakh saggi rumanka us iyahe iwahti. Aabbaheey la 'doo'di usú saggaas iwahti iche yowta.
[24] A mehe Waakh a rubey kalday on. Weeli enenyet la, sammata Rubeyti Waakh igargaarin, koloo kalday laka Waakh saggi us rumanka iyahe ma iwahti.”
[25] Makhaabale la wihi iche itidah, “Saggi Ki Lasubhe Kiriistohi lasugo layadeeh iyamiit a garda. Ulla maanti us yamiit, walah tuumman a inno ibabbakkaahicha.”
[26] Yeesso la wihi us ilaabe “Aniha kileeyeyyeedo a usu rubeytiissa.”
[27] Geeddaas on ka abatti Yeesso soonokhatte. Abatti la chirri iche Yeessohi makhaabál leeyyeedo agarte ka, weyti girmeysatte. I'daasenyi eticho, “At mehe 'doonta?” worsate mele. Ommos eticho Yeesso, “A i'doh makhaabál ileeyyeedda?” iyidah mele.
[28] Makhaabale 'dirihicheki biccheet katabte, ilkerengeet inokhatte, wihi iche 'doo'd itidah,
[29] “Kaaleya eti wihi tuummane goorat an yeele isoocheeke arga. Eta a geeddi us Ki Lasubhe yahe?”
[30] 'Doo'd ilkerengeet kasoobahe, Yeesso iyimiy.
[31] Geeddaas tuumman la abatti Yeesso hawwaassatta, “Eti ween, bal wohoo aham,” idowta.
[32] I'daasenyi wihi us ilaabe, “An gololi atin wihiiskoo rucchul laka igaran a khaba.”
[33] Abatti 'deerka wihi iche isitidah, “Etoo sarka golol ikeene?”
[34] Yeesso la wihi us iyidah, “Wihi uur i'doono i'di gololeeye a mehe ya, a anihi wihi Waakkhi isooerge 'doono yeelo, toro la hili goorat us dahanteey soogesse massicho.
[35] Atin orran, ‘Hay affare yomboossa, 'dee gurnaan lagoocha,’ ma elattaan a? I'daasenyi wihi an atin iadeeh, bal indo ooga gos yeya, gurnaan kola a bissaate, a geeddi lakagoocho.
[36] Waakh la 'doo'di gos goocho mujjume guta. Gurnaanka icho soogoochaan la, a 'doo'di jiroti jirtuu imassan 'helo. 'Deerka 'dee eti gurnaan il kachibe, ichoow ki gurnaan goocho ba isleehamaadaan.
[37] Jeentetaase mammahti, ‘Koo ilmo il geessa, koo la gurnaane soogoocha,’ tadeeh rum itahe.
[38] Ani a atin erge, gosi atin ilmo il ikachibin ka, gurnaan soogoossaan, gosaas la 'doo'doo addane hol kadowe, atin la gurnaanki bissaate on soogoossaan.”
[39] Jeenteti kootte makhaabale, “Eta wihi goorat an yeele tuumman a isoocheeke,” itidah u, 'doo'di Saamariya ilkerengeettaas yaal ki ittaawe Yeesso rummeeste.
[40] 'Deerka chirri 'doo'di Saamariya Yeesso iyimiy ka, hawwaasteene, “Kaale nah leefiddiy,” iyidaaheen. Yeesso la ibeen lamma intaas barye.
[41] 'Doo'di weyti ittaawe la, jeenteti wihi Yeesso yidah u, Yeesso rummeeste.
[42] Wihi icho makhaabál iyidaaheen, “Toolla yeedaah kalday on ma rummeysanni, i'di tahe nah laka awteenyuu usu a daagne, toolla la saggi rumanka eta 'Doorribehi enenyeti harra tuumman iyahe a garanna.”
[43] Inkoo Yeesso intaas ibeen lamma barye ka, anki boroofenhi Gaalilaaya tabe.
[44] Yeesso rubeytiis 'hor mehe yidah ya, “Eti Waákh íyeyyeedo, ilicho ka ma liinkaanyito.”
[45] I'daasenyi, chirri us boroofenhi Gaalilaaya yimiy ka, 'doo'di Gaalilaaya martiiste. I'di tahe wihi us daawti Baasakka ka us ilkerengeetti weene Yeerusaleem ka yeele tuumman a argeen. Icho laka goorat daawtaas a kijireen.
[46] Yeesso toro ilkerengeetti Kaana boroofenhi Gaalilaaya kajirto us bicche kuurgiyiche farsoti sabiib kayeele inokhte. Ilkerengeetti Kafarnaa'hum ka la, etoo sirgaal ka weene inankiis weyti khannanyahe a jira.
[47] Eta chirri us saggi Yeesso boroofenhi Ya'huudiya ikayimiyye, boroofenhi Gaalilaaya isoogele daage ka, iirte hawwaaste, 'dee a yimaate inankiiski omoottan a samaacho.
[48] Yeesso la wihi us iyidah, “Atin sammata atin wahanyeyyohi miigti Waakh tuso ichoow girmo iargin ma irummeysattaan.”
[49] Eti sirgaal ka ween la wihi us iyidah, “Eti ween, bal kaale dowwa a khubanni, inankeey geeddi us iumaatan samaay.”
[50] Yeesso wihi us ilaabe, “Nyaam on iro, inankaah a samaataa.” Et wihi Yeesso iyidah rummeeste, irte.
[51] Jit raahaayi, ilbooyyetiis usu 'hesse, saggi inankiis isamaate icheekte.
[52] Ulla ilbooyye saha'ddi inam kasoodeefsate worsate. Iche la wihi iche ilaabte, “Chele saha'ddoo kaldaye chirdeereete kuleel kabukkhe.”
[53] Aabbahiis la chirraakka saggi wahaas saha'ddi chele Yeesso, “Nyaam, inankaah a samaataa,” ikayidah itahe, abte. 'Deerka usu ichoow minkiis tuummamba Yeesso rummeesteen.
[54] Wahaas a wihi lammaatteete miigti Waakh tuso, Yeesso inkoo us boroofenhi Ya'huudiya kayimiyye us boroofenhi Gaalilaaya soogele yeele.