[1] Ibeenki seyyahnaatteet ka, oroosoo ilkerengeetti Kaana boroofenhi Gaalilaaya kajirto ka lagele. Abar Yeesso la intaas a kajirte.
[4] Yeesso wihi us ilaabe, “Abartaay, ati mee wihi an yeelo isoocheekto. Ibeenki Waakh isoogooche a ankhanyahe.”
[5] Abartiis wihi iche ilbooyye itidah, “Walahbaaw us yeela atin iidah, yeela.”
[6] 'Diraammetoo lihenye burbuurenye dagaheete bicche lakachibo yaafohi Ya'huud hugumme ka kadikhatti intaas a kajireen. Kooba la bicchehi geeddi litta tomon siyyeet ichoowka litta kudoo ichoow tomon lamma iche khaata.
[7] Yeesso wihi us ilbooyye iyidah, “'Diraamme bicche buuhicha.” Ilbooyye 'diraamme buuhisse af keente.
[8] 'Deerka wihi us ilbooyye iyidah, “Bal wohoor soogessa, 'dee khaata, ilbooyi oroos ka golol itoollo igeecha.” Ilbooyye la i'daas yeesse.
[9] Ilbooyi golol itoollo la bicchehi luurgiyiche farsoti sabiib lakayeele chanchame. Ulla inti lakakeene ma garanne, ilbooyyeti bicche soogelisse la a garatta. Ilbooyi golol itoollo eti min diste 'dol iwahe,
[10] wihi us iyidah, “Ebba farsoti sabiibe weyti haaggane orey leekeena, inkoo marti farsoti buure dante ka, farsoti gato 'dabakhe lasookhaata. At la farsoti weyti haaggane laabte ichoowka toolla.”
[11] Waha a wahanyeyyohi oraate miigti Waakh tuso Yeesso ilkerengeetti Kaana boroofenhi Gaalilaaya kajirto ka haaggiche. 'Deerka weynaantiis 'doo'd isoobabbakkaahiche, abattitiis la usu kakhuufte.
[12] 'Da'ddaboka Yeesso abartiis ichoow walaalinyetiis ichoow abattitiis khabaayi ilkerengeetti Kafarnaa'hum ikhubte, intaas ibeennetoo fiddiye.
[13] Maanti Daawti yaafohi Ya'huude Baasakka layadeeh soodowwaatte, Yeesso ilkerengeetti weene Yeerusaleem ikore.
[14] Uranti minki Waakhe buure ka, 'doo'di looyyo ichoow iiy ichoow kutukuurrug ba ororicho ichoow 'doo'doo addane komborohi balballaaddan koorronte chilimme iskadooricho 'hele.
[15] 'Deerka yabarretoo laajja kayeesse, icho tuumman ichoow iiy ichoow looyyo ba uranti minki Waakhe buure karihe. Komborohi balballaaddane 'doo'd chilimme iskadooricho rerreeche, chilimme la seley turraa'hiche.
[16] Wihi us 'doo'di kutukuurrug ororicho iyidah, “Kutukurrugtaas inta kabahcha. Min Aabbaheey uurgiyinna sokko akayeelina!”
[17] Abattitiis waha chiiran kasoo'hesse, “Kamuraaw, 'dooninti an minkaah 'doono, weyti buurtahe ichoowka a ikhaatta laka.”
[18] 'Deerka ewweenki yaafohi Ya'huud wihi us Yeesso worsate, “Wahanyeyyohi miigti Waakh tuso at nah tusso 'dee saggi rumanka Waakh antohi at waha kayeesse kisiiche iagarro a mehe?”
[19] Yeesso wihi us icho ilaabe, “Minka Waakhe buure jejjebcha, anna ibeen seyyah goyaka toro a disaa.”
[20] Iche la wihi iche ilaabte, “Minka Waakhe buure, gu'h tomon affar ichoow lihe khaate ladise. Alla maan seyyah goya on ka dissa?”
[21] I'daasenyi minka Waakhe buurenye Yeesso woriis kayeyyeedo a sartiissa.
[22] Inkoo Waakh usu omoot kasookahche ka, abattitiis wihi us 'hor kayeyyeede kasoo'hesse. Abatti 'deerka Chiirnaanneti Waakh ichoow wihi Yeesso yidah ba rummeysatte.
[23] Geedda Yeesso ilkerengeetti weene Yeerusaleem ka daawti Baasakka kajiro, 'doo'di buure wahanyeyyohi noole miigti Waakh tuso us yeelo arge, usu rummeeste.
[24] I'daasenyi Yeesso icho ma kakhuufin, a mehe us enenyet tuumman i'diis a garta.
[25] Walah etoo miinsane usu liicheeko mele, i'di tahe usu rubeytiis uuri weeli enenyet a garta.