[1] Uu' tol massate, Yeesso Hali Geeyohi Oolif irte.
[2] Ibeenki kaas sooraaho baryo ka, toro Yeesso minki Waakhe buure isoonokhte. 'Doo'd tuumman la kasoourure, ulla orronte, 'doo'd walah abche.
[3] Tagaammeti amurre ichoow Farissaayo ba makhaabassoo ichehi makhaabaloo kiche ieheynan leeu'durto lakhabte sookhaateene, enenyet ortiis keeneen.
[4] Wihi iche Yeesso itidah, “Eti ween, makhaabassa ichehi makhaabaloo kiche ieheynan leeu'durto iche lakhabte.
[5] Amurre Muusa ka la, oboorrihi i'daase dagahe lakaseya layagiis. At la mehe tadeeh?”
[6] Icho la jeenteti icho wahaas iworsateen, Yeesso angey gelin 'doonaane 'dee jitoo icho usu kacheektaan khabaan. I'daasenyi Yeesso gulguubsate farriis ka il chirchiire.
[7] Geedda icho toollaane yeedaas wowworsataan, Yeesso fit tolossate, wihi us iyidah, “Bal etiinki uskeel laa, kolooraat makhaabal dagah a kaseyo.”
[8] Toro gulguubsate il chirchiire.
[9] Chirri icho waha daageen ka, icho tuumman seley tabeene, tattakkay ka irteen. Kolooraat la araarrinye iratte, ichoowka Yeesso ichoow makhaabál kalday soo'hadeen.
[10] Yeesso fit tolossate, wihi us makhaabál worsate, “Weela, 'doo'di kootte kicheekti meeke? Et uskeel kigoocho mele?”
[11] Makhaabale la wihi iche ilaabte, “Eti weenoow ebba.” Yeesso la wihi us iyidah, “Annaka uskeel ma kigoocho gon. Tabe, jirotaahti ha'daabeet 'dii.”
[12] Yeesso toro 'doo'd leeyyeede wihi us iyidah, “An a banayhi harra. Eti tuummane isooraaho, jirtuu mug'di goya ma kaassohti, i'daasenyi banayhi jiro lakeelo siicha.”
[13] Farissaayo la wihi iche Yeesso itidah, “At toolla awtaahha on kaayyeedda, gartaah rum mee.”
[14] Yeesso wihi us ilaabe, “Chirri an awteey kaayyeedo laka, wihi an eldi a rum. I'di tahe inti an kiimiy a garda, toro la inti an isohdi a garda. I'daasenyi atin inti an kiimiy ma garattaane, ommos inti an isohdi ma garattaan.
[15] Atin jiti weeli enenyete walah kagoossaan, ani la et an uskeel igoocho mele.
[16] I'daasenyi chi' kootte incheenka an 'doo'd hukkumo, jiti an 'doo'd kahukkumo a ki rummaat. A mehe an waha keley ma yeelo, Aabbaheeyki isooerge a ileejira.
[17] Amurretiin goyaka wihi chiiran, ‘Chirri et lamma garti iche laabto too kalday tahe, aytaas a rum.’
[18] An rumanka awtaaya kaayyeeda, toro la Aabbaheeyki ani isooerge laka garteey a laaba.”
[19] 'Deerka wihi icho Yeesso worsateen, “Aabbahaah meeke?” Yeesso wihi us ilaabe, “Atin ani ma igarattaane ommos Aabbaheey laka ma garattaan. Chirri kootte atin ani igarattaan, Aabbaheey laka a garattaan gon.”
[20] Yeesso inti minki Waakhe buure ka saanduukhi sadakha lakachibo yaal, iche 'doo'd walah kaabche, toro wahaas tuumman keesse. Et usú khabte la mele, a mehe ibeenkiis uliba a ankhanyahee.
[21] Yeesso toro wihi us icho iyidah, “An a irda, atin la a iyowattaan. I'daasenyi inti an irdi ma tamiitiin. Uskeeliin goya katuuntaan.”
[22] Jeenteti waha u, ewweenki Ya'huud wihi us isworsate, “A isyagiis? Jeentetaase ‘Inti an irdi, ma tamiitiin,’ iessa?”
[23] I'daasenyi Yeesso wihi us iyidah, “Atin a ki ilane, anna a ki saraat. Atin a ki harratane, anna ki harrata mee.
[24] Jeentaase uskeeliin goya katuuntaan atin ikiidah. Chirri atin eti an ahe an atin isoocheeke irummeysan, uskeeliin goya katuuntaan.”
[25] Iche la wihi iche Yeesso worsatte, “At a ayyo?” Yeesso la wihi us ilaabe, “An a eti an uus uumaccho ka an atin isoocheeke on.
[26] Wihi buurenye atin miinsane an adeehe toro atin kahukkumo a jiraan. I'daasenyi eti isooerge a ki rum leh. Anna wihi an usu kadaage on 'doo'di harrata icheeka.”
[27] Icho la saggi Yeesso wor Aabbahiis ikayeyyeedo ma aban.
[28] 'Deerka wihi us iyidah, “Maanti atin Ínam Aadam massalaaba ka serey geesseen, saggi an etaas iahe, a abattaan. Toro la saggi an wohoo rucchul laka miigteey ka iyeeline, i'daasenyi an wihi Aabbaheey iabche on icheeko a abattaan.
[29] Ki isooerge la ma ikatabine, a ileejira, i'di tahe an kol tuumman wihi usu kahamaadicho on yeela.”
[30] 'Doo'di buurenye yeeda Yeesso essi daage, Yeesso rummeeste.
[31] Yeesso wihi us 'doo'di Ya'huude usu rummeeste iyidah, “Chirri atin wori an atin abche khucchissaan, atin rumanka a abattitaaya.
[32] Runti Waakh a abattaane, runti Waakh la a atin furta.”
[33] Icho la wihi icho usu ilaabeen, “Nah a nyaakhut nyaakhut Aburaaham, toro et nah injire ifalle mele. Toollaka chirri at, ‘Runti Waakh a atin furta,’ nah idowto, mehe tussa?”
[34] Yeesso wihi us ilaabe, “Rume atin icheeka, eti tuummane uskeel yeelo, a i'doo us bow'dati uskeelaas yitah.
[35] Bow'da min goyaka inti tichee ma khabto, i'daasenyi inam jirtuu tuumman a ki minkaas on.
[36] 'Deerka chirri Weeli Waakh kifure rumanka a furantahe.
[37] Saggi atin nyaakhut nyaakhut Aburaaham itahiin a garda. I'daasenyi ogoose imarantaan, i'di tahe wihi an atin abcho ma rummeysattaan.
[38] Wihi an inti Aabbaheey kajiro ka an arge a atin icheeke. Atin la wihi atin aabbahiin kadaagteen iche yeessaan.”
[39] Wihi icho ilaabeen, “Aburaaham a aabbahaanya.” Yeesso la wihi us ilaabe, “Chirri atin rumanka nyaakhut nyaakhut Aburaaham tahiin, wihi us yeele atin laka a yeessaan.
[40] Atin la anihi wihi rummaate tuummane an Waakh kadaage atin isoocheeke, iche ogoos imarantaan. Aburaaham injire wihi i'daase ma yeelin.
[41] Wahanyeyyohi aabbahiin yeele on atin laka yeessaan.” Icho la wihi icho ilaabeen, “Nah i'di nyaakhuti eysing'alaje mee. Aabbahi kaldaye nah khabno a Waakh rubeytiissa.”
[42] Yeesso la wihi us iyidah, “Chirri kootte Waakh rumanka Aabbahiin yahe, ani a i'doontaan. I'di tahe an Waakhe kiimiyye, toolla la an intane kajira. An awteey u ma imaatane, i'daasenyi usu isooerge.
[43] Kamalda bal, atin a i'doh wihi an atin idowo matah atin igelin? A jeenteti atin wori an atin idowo atin aban iubaa'dan.
[44] Atin a nyaakhuti Seytaanki ooyohiine. Wihi us imoono tuumman atin laka yeeline 'doontaan. Uus uumaccho ka us eti 'doo'd bakkicho on eheet. Ulla toro rum a 'dii'da, i'di tahe us injire wihi rummaat ma cheekin. Chirra us yeedi beenaat cheeko la, wahaas eti rumanka us yahe tusaan. Us a eti been lehe, toro la a ooyohi 'doo'di been goocho.
[45] I'daasenyi an ayti rummaate atin icheeka, jeentetaase ani irummeysawwaayteen.
[46] Ayyo goytiin ka saggi an rumanka uskeel iyeele tusa? Chirri an rum cheeko a i'doh ani irummeysanna?
[47] Eti Waakh kayimiy, Yeedi Waakh a dagansata. Atin la Waakh ma kiimaatan gone, jeentetaase ani nabah ikasudiwwaayteen.”
[48] 'Doo'di Ya'huud wihi us Yeesso ilaabe, “Chirri nah, ‘At a yaafohi bi'direnye Saamariya toro la ginna kidakhatta,’ kinidah, nah ma eysiinna?”
[49] Yeesso la wihi us ilaabe, “Ani ginna ma idakhatti. I'daasenyi an Aabbahaaya koolo ikeena, atin la lakhaanyo ikadowtaan.
[50] An koolo ma isiyowdi, i'daasenyi eti anihi liikoolicho 'doono a jira, ulla a eti jiti rummaat ka enenyet hukkumo.
[51] Rume atin icheeka, eti tuummane wihi an abcho raaho, jirtuu ma yamuut.”
[52] Jeenteti waha u, 'doo'di Ya'huud wihi us yidah, “Ya! Toolla saggi rumanka ginna kidakhatti a abanne. Aburaaham a yumuyye, 'doo'di tuummane Waákh íyeyyeedo laka a tuume. I'daasenyi at mehe elatta ya, eti tuummane wihi at abisso raaho jirtuu ma yamuut.
[53] Aburaahamhi aabbaheenyee a yumuyye, at usu a kaweentahe? 'Doo'di Waákh íyeyyeedo laka a tuume, at ayyo iskoogtahe?”
[54] Yeesso wihi us ilaabe, “Chirri an iskoolicho, koolohaas walah icho ibahaan mele. Eti koolo i'doono a Aabbaheeyki atin a Waakkhiinna elattaan.
[55] Atin injire usu ma garanne, anna usu a garda. Chirri ani, ‘An usu ma gardi,’ an atin iidah, annaka i'diin u eti been lehe ateeh. I'daasenyi an usu a garda, yeediis la a raaha.
[56] Aburaahamhi aabbahiine laka, emeetteey weyti kahamaade. Ulla goorat archiiy emeetteey a arge, weyti hamaade.”
[57] 'Doo'di Ya'huud la wihi us Yeesso iyidah “At gu'h tomon chan laka ma eleelinne, toro Aburaaham a agarte?”
[58] Yeesso wihi us ilaabe, “Rume atin icheeka, geeddi Aburaaham ijirin laka an a jira on.”
[59] Jeenteti waha u dagah okhsatte, usu saataa. I'daasenyi Yeesso dagte, dagsi ka uranti minki Waakhe buure kabahe.