[1] Geeddi ibeenki daawti Baasakka iitaahan, Yeesso saggi ibeenki us harrata katabo, us Aabbahiis iirti kola iyitah garte. Yeesso la ichoowka maanti jirotiisti harrata soomassatti laka, 'doo'diis a 'doone.
[2] Yeesso ichoow abattitiis ba gololi gelebeete yamhiin. Seytaan la Yuuda Iskaariyoothi inam Siimone mali suujenye us Yeesso 'dub kagoocho orey on rubeytiis gesse.
[3] Yeesso saggi Aabbahiis walah tuumman dahantiis igesse a garta, saggi us Waakh ikayimiyye us toro Waakh ikanokhti a garta.
[4] 'Deerka kombor kasookahe, dafartiisti oroot duumiche, dafarti chirri ladikhte lakahiyyaayti dabar kahiite.
[5] Wahaas 'dubicho ka, karaayatoo bicche kachibe, abattitiis luhlo dikhe, dafarti kootte us dabar kahiite ka hiyyaaye.
[6] Chirri us Siimonhi Beetero layadeeh sooeleele ka, Beetero wihi us iyidah, “Kamur, luhlo idikhta?”
[7] Yeesso wihi us ilaabe, “Wihi an yeelo toolla wihicho ma abatti, i'daasenyi yomboka a abatta.”
[8] Beetero la wihi us iyidah, “At koloo kalday laka luhlo ma idikhto.” Yeesso wihi us ilaabe, “Chirri an luhlo kidikhin, at keey mee.”
[9] Siimonhi Beetero layadeeh wihi us Yeesso ilaabe, “Kamur, 'deerka luhlo kalday iidikhine, i'daasenyi dahano ichoow matah laka idikh gi'de.”
[10] Yeesso wihi us ilaabe, “Eti kootte sar tuumman dikhte, yomboka luhlo kalday on dikhta. I'di tahe sartiis tuumman chaafo ma khabto. Buurtiin a dikhantahe, i'daasenyi atin tuumman mee dikhan.”
[11] A mehe us 'hor on eti 'dub goocho garte, jeentetaase, “Atin tuumman mee dikhan,” iyidah.
[12] Inkoo Yeesso abattitiis luhlo dikhe, us dafartiisti oroot toro gessate ka, inti kootte us 'hor fiddiye koorronte. Wihi us icho iyidah, “Kamalda bal, wihi toolla an atin iyeele wihicho a abatteen?
[13] Atin ani, ‘Eti ween,’ ichoow, ‘Kamur,’ menya itadeehiin? Aa! A i'daas on gon. An rumanka a eti weene, toro la a Kamur.
[14] Anihi Kamuriinenye toro la etiinki weene, toolla luhlo a atin dikhe. Taba gi'de atin laka luhlo isdikha.
[15] An jit a atin tuse, 'dee atin laka wihi an atin iyeele 'doo'di addan iyeessaan.
[16] Rume atin icheeka, falfá kamuriche kaween mele, ommos eti ergaanee eti ergate ma kaween.
[17] Toolla 'deerka atin runta garattaan, a hamaadoo geeddohe cha'atin wihi atin lii'doono yeessaan.
[18] “Wora an kaayyeedo atin tuumman mee atin miinsanyahe. 'Doo'di rumanka an soobahsade a garda. I'daasenyi Chiirnaanneti Waakhe, ‘Eti ileegolossate on toro chiiy iyitah,’ tadeeh a labuuhicha.
[19] “Waha geeddi icho iitaahane atin isoocheeka, 'dee maanti icho yitaaheen laka, saggi an eti an ahe, an atin isoocheeke iahe rummeysattaan.
[20] Rume atin icheeka, eti tuummane eti an sooergade khaatti, ani ikhaatta. Eti ani ikhaatti la, eti isooergate khaattta.”
[21] Inkoo us waha yidah ka, Yeesso weyti uur suujowe, wihi awtiis miinsan abatti icheeke, wihi us yidah, “Rume atin icheeka, etiinkoo 'dub igoocha.”
[22] Abattitiis isyeyte, etichoki yeedaas miinsanyahe fooliis waayte.
[23] Abatti goyaka, etoo kachka Yeesso weyti 'doono, Yeessó garabiissa fiddiya.
[24] Siimonhi Beetero layadeeh etaas abattee far iooge, wihi us iyidah, “Bal eti us woriis kaayyeedo, eti tahe worsada.”
[25] Etaas abattee Yeesso kasiihsate wihi us worsate, “Kamur etaas a ayyo?”
[26] Yeesso wihi us ilaabe, “Etaas, a eti toolla an makaatetoor idiibo inkoo an karam kalug'de.” Yeesso 'deerka makaatetoor karam goya kalug'de, Yuuda Iskaariyoothi inam Siimone iooge.
[27] Uus Yuuda makaate khaate, Seytaan goytiis gele. Yeesso la wihi us Yuuda iyidah, “Nyaam, wihi at sooyeesso dowwa yeel!”
[28] I'daasenyi 'doo'di addane leegolossati et jeenteti Yeesso waha iyidah garti mele.
[29] Yuuda gon chilimme khucchaa, abatti gaasoo kol Yeesso Yuuda ergate, wihi icho daaw ka 'doonaan, “Soogat,” iyidahye, ommos us, “Wohoo miskiin sii,” iyidahye koogyahiin.
[30] Chirraas on Yuuda makaate khaate, dowwa bahe. Il la a ibeen.
[31] Inkoo Yuuda bahe ka, Yeesso wihi us yidah, “Toolla Ínam Aadam a laweynaache. Ulla saggi Waakh iweenyahe 'doo'd a tusa.
[32] Anna chirri an saggi Waakh iweenyahe 'doo'd tuse, Waakh laka saggi Ínam Aadam iweenyahe 'doo'de tusa, toro la dowwa tusa.
[33] “Nyaakhutaaw, an kola geeddoo rucchul on atin leefiddiya. Atin a iyowattaane, i'daasenyi i'di goorat an yaafohi Ya'huud iidah u, inti an irdi emeet ma tabuu'diin.
[34] “Amuroo husube atin siicha. Taba is'doona. Saggi an atin i'doone, atin laka saggaas isi'doona.
[35] Cha'atin is'doontaan, 'doo'd tuumman saggi atin abattiteey itahiin a abta.”
[36] Siimonhi Beetero layadeeh wihi us Yeesso worsate, “Kamur, at intoh iratta?” Yeesso wihi us ilaabe, “Toolla inti an irdi ma ileeiratti. I'daasenyi 'dee yomboka a ileeiratta.”
[37] Beetero la wihi us worsate, “Kamur, an a i'doh toolla kiraahin? An a geeddi an jiroteey laka soobahcho jeentetaah u.”
[38] Yeesso wihi us ilaabe, “At rumanka jeenteteey u jirotaah a soobihissa? Rume kisoocheeka, geeddi lukki iriirin, at kol seyyahe ma igaratti tadeeh.”