[1] Saahka, daawtoo Ya'huude jirta, Yeesso ilkerengeetti weene Yeerusaleem ikore.
[2] Ilkerengeetti Yeerusaleem ka, meessi, “Aritti iiyyaat,” layadeeh hagga ka, ge'dintoo gaayim chan khabto a jirta. Afi Ibiraaniya ka magahiche, “Bessaa'da,” iche layadeeh.
[3] 'Doo'di buurenye khakkhannane, gaasoo indo laaye ichoow ki luhlo laa ichoow ki ma'dayyee iche ge'dintaas hagga jijjiifa.
[5] Makhaabaloo geeddi gu'h tomon seyyah ichoow siyyeet ba khannaneet la intaas a kajire.
[6] Chirri Yeesso usuhi intaas jiifo arge, saggi us gu'hassi ittaawe ikhannaneet garte ka wihi us worsate, “Atihi samaatti a 'doonta?”
[7] Eti khannan wihi us ilaabe, “Eti ween, et chirri bicche loonkorooriye, ge'dim goya ikalug'do mele. Chirra an ge'dim kadih adeeh, etoo addan orteey a kadihe.”
[8] Yeesso la wihi us iyidah, “Tolosso, ilaalaah okhso, soho.”
[9] Chirraas on et samaate, ilaaliis okhsate, sohte. Ibeenka Yeesso waha yeele la a Seeri Lanaso.
[10] 'Deerka 'doo'di wewweene Ya'huud wihi us etaas lasamaache iyidah, “Maanta a Seeri Lanaso, amurre ilaalaahki at si'ddo a 'dii'ddantahe.”
[11] I'daasenyi wihi us ilaabe, “Eti isamaache mehe iyidah ya, ‘Ilaalaah okhso, soho.’ ”
[12] 'Deerka wihi iche worsatte, “Eta, ‘Ilaalaah okhso, soho,’ kiidah, a ayyo?”
[13] Eti lasamaache la, eti us yahe ma garti. A mehe ururi buurenye intaas kajire, Yeesso la urur goya tabe.
[14] Yeesso saahka etaas minki Waakhe buure ka 'hele, wihi us iyidah, “At kola a samaatte. Uus 'dee wohoo addane suuje kisoobahine, tabe uskeel kanokho.”
[15] Makhaabal irte, 'doo'di Ya'huude wewween saggi eti goorat samaache Yeesso iyahe icheeke.
[16] 'Deerka jeenteti Yeesso waha Seeri Lanaso ihaaggichuu, weynaanti Ya'huud Yeesso sina omhisse.
[17] Yeesso la wihi us iyidah, “Aabbaheey kol dakkhan hil a haaggicha, annaka i'diis u hile haaggicha.”
[18] Jeentetaas u la weynaanti Ya'huud sagag tuumman ka weyti Yeesso ogoos yowatte. Us amurreti Seeri Lanaso kalday ma jebinne, i'daasenyi Waakh a Aabbahaaya essa, Waakh ekkatiis iskayeela.
[19] Yeesso wihi us jaldaabti Ya'huud ilaabe, “Rume atin icheeka, Weeli Waakh walah us keley yeelo mele. Wihi us argo Aabbahiis yeelo on yeela. I'di tahe wihi Aabbahiis yeelo on Weeliis laka yeela.
[20] I'di tahe Aabbaheen Weeliis a 'doona, wihi noole us awtiis u yeelo, a tusa. Wihi noole waha kussan a tusa, 'dee atin la kagirmeysattaan.
[21] Saggi Aabbahiis 'doo'di tuume isookahcho jiro isiicho, saggaase Weeliis laka, eti us 'doono jiro isiicha.
[22] Toro Aabbaheey etoo kalday laka ma hukkumo, i'daasenyi Weeliissa antohi us 'doo'd kahukkumo siiche.
[23] 'Dee enenyet tuumman saggi us Aabbahiis iinkaanyito, Weeliis laka iinkaanyita. Eti tuummane Weeli Waakh iinkaanyitin la, Aabbahiiski usu sooerge laka ma inkaanyito.
[24] “Rume atin icheeka, eti tuummane yeedeey daage toro eti ani isooerge rummeeste, jiroti jirtuu imassan a 'hele toro la ma lahukkumo, omoot a 'dallaabsate jiroti jirtuu imassan 'hele.
[25] Rume atin icheeka, ibeen a yateehe kola la a yitah, ibeenki 'doo'di tuume hooyi Weeli Waakh daago. Eti tuummane daage la, jiroti jirtuu imassanne 'hela.
[26] I'di tahe saggi Aabbaheey enenyet jiro isiicho, iche Weeliis laka enenyet jiro isiicha.
[27] Toro Aabbaheey usu antohi us 'doo'd kahukkumo laka a siiche, i'di tahe us a Ínam Aadamee.
[28] “Waha akagirmeysanna, i'di tahe ibeen a yamiit ki 'doo'di tuume tuumman hawwaalo goyaka hooyeey daago,
[29] omoot lakasookahcho. 'Doo'di tuummane wihi haaggan yeele, omoot a kasookaha, jiro 'hela. Ki suujoon yeele la, omoot a kasookaha, lahukkuma.”
[30] Awteey u walah an yeelo mele, i'daasenyi saggi an Aabbaheey ikadaago iche enenyet jiti fissan ka ihukkuma, a mehe an ma iskahamaadicho i'daasenyi ki isooergate kahamaadicha.
[31] “Chirri ani on garteey laabo, garteey ti rummaat mee gon.
[32] I'daasenyi etoo addane wihi ani imiinsan cheeko a jira. Wihi us atin idowo ani imiinsan runticho a garda.
[33] “Atin Yoohana enenyet a iergatteene, ulla runti ani imiinsan tuumman atin icheeke.
[34] Toro la yeedi weeli enenyete eti an ahe soocheeko, ani ka a walahba. I'daasenyi waha a atin isoocheeka 'dee Waakh atin riba.
[35] Yoohana a i'di taahi bolkho, banay 'doo'd tuso. Atin la geeddoor yeedi us atin idowo atin kahamaadicho a 'doonteen. Yeeda us atin idowo la, a i'di banay.
[36] “Wohoo addane woreey cheeko, Yoohana laka kussan a jiraan. A mehe hili Aabbaheey dahan isoogesse an massicho an haaggicho saggi Aabbaheey isooerge, iche tusa.
[37] Aabbaheeyki ani isooerge laka, wihi tuummane ani imiinsan a cheeke. Atin injire hooyiis ma daagine, ommolla injire fooliis ma argine,
[38] ommos yeediis goytiin ma fiddiyo, a mehe atin eti us sooerge ma rummeysan.
[39] Atin Chiirnaanneti Waakh a kamalattaan, kol atin jiroti jirtuu imassan ka'hessaane koogtahiinee. Chiirnaannetaas Waakh laka, woraaya kaayyeeda.
[40] I'daasenyi atin, atinhi ani itamiitiine 'dee jiroti rummaat jirtaan a 'dii'ddeen.
[41] “An weeli enenyet koolo ma kayowdi.
[42] I'daasenyi an rumanka a atin garda, saggi atin rumanka Waakh i'doonin a garda.
[43] Ani anto Aabbahaaya kiimiyye atin la ma ikhaatan, i'daasenyi chirri etoo addan yimiyye antohiissa on kayeyyeedo, atin etaas a khaatattaan.
[44] Atin goytiinna on ka koolo iskayowattaane, i'daasenyi Waakkhi usu kalday on Waakh yahe, koolo ma kayowattaan. Saggoh ani irummeysattaan?”
[45] I'daasenyi kol an Aabbaheey ortiis ka uskeeli atin yeesseen cheeko akoogeynana. Eti atin cheekti, a Muusahi atin khajjeel kakhabtaan.
[46] Chirri atin yeed Muusa rummeysatteen, ani laka kootte a irummeysattaan. A mehe Muusa wihi ani imiinsan on chiire.
[47] I'daasenyi wihi us chiire ma rummeysan gone, sag atin wihi an atin isoocheeko irummeysattaan mele gon.