[1] Yeesso toro wihi us yidah, “An a i'di geeyi sabiibe rummaate, Aabbaheey la a eti gos hil kahaaggicho.
[2] Aabbaheey la eti tuummane i'di liikhimeet u ani ikatoollo gurnaan idelin, a goocha. Eti tuummane i'di liikhimeet u gurnaan delo la, Aabbaheey mujjume yeela, 'dee gurnaanki buure bahcha.
[3] Atin la 'hor on wihi an atin abche ka, atin mujjummooche.
[4] Goyteey fiddiya, anna goytiin a fiddiyo. Liikhime keley gurnaan iche bihisso mele. Chirri iche gurnaan bihisso, a chirri iche geeyi sabiib katolosso on. Atin laka i'daasu, chirri atin goyteey ifiddiyin, walah atin 'duu'ddaan mele.
[5] “An a i'di geeyi sabiibe, atin la a i'di liikhimohaaya. Eti tuummane goyteey fiddiyo, anna goytiis fiddiyo, gurnaanki buurenye dela. Laanteey walah atin 'duu'ddaan mele.
[9] “Saggi Aabbaheey ani i'doono, iche ani laka atin i'doona. Goyteey fiddiya, 'dee ani a atin 'doono gi'de.
[10] Cha'atin amurreteey raahtaan 'doonintaaya kafiddiitaan, saggi an amurre Aabbaheey iraahe an 'doonintiis ikafiddiyuu.
[11] “Waha la a atin isoocheeke, 'dee atin laka hamaadi an khabo khabtaane, toro la hamaadiin walah kaankhati mele.
[12] “Amuri an atin siicho kalla, saggi an atin i'doonuu, taba atin laka is'doona.
[13] Wihi 'dooninti enenyet aalassiis weyti 'doono tuso kallaayo, a ti us jirotiis jeentetichuu isoobahcho.
[14] Atin a aalassaaya chirri atin amureey raahtaan.
[15] “Kola ilbooyye ma atin adeeh, i'di tahe ilbooyye wihi kamuriche haaggicho ma garatti. Aalassaaya atin adeeh. I'di tahe wihi tuummane an Aabbaheey kadaage, a atin isoocheeke.
[16] Atin ani ma isoobahsan, i'daasenyi ani atin soobahsade, toro hiloo atin korche, 'dee gurnaan bihissaan, gurnaanki fiddiyo bihissaan. 'Deerka jeenteti atin keey itahiin u, Aabbaheey wihi tuummane atin daahtaan, a atin siicha.
[17] Amurreteey taacheyye, taba gi'de is'doona.
[18] “Chirri 'doo'di wahanyeyyohi harratane sussuuje raaho atin 'dii'de, saggi icho kolooraat ani i'dii'deen abda.
[19] Chirri kootte atin i'di 'doo'da harrata tahiin, 'doo'daas a atin 'doona, i'di 'doo'dichuu. Atin 'doo'di harrata menye, i'daasenyi an a atin soobahsade. Jeentetaase 'doo'di harrata atin i'dii'da.
[20] Wihi an atin iidah kasoo'hela, ‘Falfá kamuriche kaween mele.’ Chirri 'doo'di harrata ani sina iomhicho, atin laka sina a atin omhichaan. Chirri icho wihi an abche raaheen la, wihiin laka a raahaan.
[21] Waha tuumman la jeenteti atin keey itahiin u, a atin layeela. I'di tahe icho eti ani isooergate ma gartaan.
[22] “Chirri goorat an iimaatane an icho ileeyyeedin, uskeel lakacheekti mele gon. I'daasenyi toolla uskeelicho ka walah icho laabaan mele.
[23] Eti tuummane ani inibhaate, Aabbaheéy laka a nibhaate.
[24] Chirri kootte an goycho ka wihi injire liiyeelin iyeelin, uskeel ma khabaan. I'daasenyi toolla wihi ittaawenye weeli enenyet yeelin iubaa'dane an yeele a argeene, toro Aabbaheey ichoow ani ba a nah nibhaateen.
[25] I'daasenyi waha toolla a yateehiine, wihi Amurreticho lakachiire labuuhicha, ‘Walah an yeele icho ika'dii'daan mele.’
[26] “Maanti Rubeyti Munyeenye 'Dooggargaarto layadeehe Aabbaheey katamiit an atin isooergo, Rubeyta Munyeenye rum lehe Aabbaheey katamiit, a atin itamiite, wori ani imiinsan atin icheekta.
[27] Atin laka woraaya cheektaan. A mehe uu' goorat maanti an hila sookhabde, a ileejirteen.