[1] Saypitanami büquiwan simpaskir taykashqan Capernaúm markaman Jesús kutirqan.
[2] Saychömi paralïticu runata kirmawan Jesús kaqman apayarqan. Apaqkuna payman yärakuyashqanta musyarmi say qeshyaqta Jesús nirqan: “Ama lakikuysu, hïju. Lapan jusaykikunatami perdonashkä”.
[3] Sayno niptinmi ley yachasiqkuna yarpachakuyarqan: “¡Sayno nirqa Dios tukuykanmi!”
[4] Sayno yarpaykäyashqanta musyarmi Jesús nirqan: “¿Imanirtaq lutanta yarpaykäyanki?
[5] ¿Mayqantaq mas aja kaykan? ¿Runapa jusankunata perdonayku? ¿O qeshyaqta aliyäsiyku?
[6] Runapa Surin kay pasacho runakunata perdonananpaq munayyuqmi kaykan. Saytami kanan musyayanki”. Nirkurmi paralïticu runata nirqan: “¡Sharkuy! Kirmaykita apakurkur wayikipa aywakuy”.
[7] Sayno niptinmi jinan höra aliyashna sharkurkur wayinpa aywakurqan.
[8] Sayta rikaykurmi runakuna kushikuyashpan Tayta Diosta alabar niyarqan: “¡Kay runataqa Tayta Diosmi munayninta qoykush kaykunata rurananpaq!”
[9] Saypita aywakurmi Jesús rikarqan Mateo jutiyuq runa impuestuta cobrar jamaraykaqta. Saymi nirqan: “Qatirämay”. Sayno niptinmi Jesúswan Mateo aywakurqan.
[10] Saypitanami wayincho mikuyänanpaq Jesústa Mateo qayasirqan. Saychömi impuestu cobraq runakuna y jusasapa runakunapis Jesúswan y discïpulunkunawan mikuyarqan.
[11] Sayta rikaykurmi fariseukuna Jesúspa discïpulunkunata niyarqan: “¿Imanirtaq impuestu cobraqkunawan y jusasapa runakunawanpis Señorniki mikuykan?”
[12] Sayno niyashqanta wiyaykurmi Jesús nirqan: “Sänu kaqkunaqa manami mëdicuta nistäyansu, sinöqa qeshyaykaqkunalami.
[13] Tayta Diospa palabrancho imata nishqantapis yachakuyay. Saychöqa kaynömi nikan: ‘Sacrificiuta rupasiyashqaykipitapis mas munä kuyapäkuq kayänaykitami’. Noqa manami jusaynaq runakunamansu shamushkä, saypa trukanqa [jusalikuyta wanakuyänanpaq] jusasapa runakunamanmi”.
[14] Juk kutichömi Juanpa discïpulunkuna Jesústa tapuyarqan: “Noqakunapis y fariseukunapis cadalami ayunayä. Qampa discïpuluykikunaqa ¿imanirtaq ayunayansu?”
[15] Sayno tapuyaptinmi Jesús nirqan: “Casarakuq maqta kaykaptinqa casaray fiestaman qayasishqan invitädunkuna ¿lakikuyanmansuraq? Casarakuq maqtata wanusiyaptinmi isanqa ayunayanqa.
[16] “Manami pipis makwa mödanata mushuq ratashwan shilpansu. Mushuq ratashqa qentir makwa mödanata masmi rachikäsin.
[17] Saynöpis manami pipis sayraq rurash vïnuta makwa urpumanqa winansu. Winaptinqa vïnu poqur laksiriykunqami. Sayno kaptinqa vïnupis y urpupis ushakanqami. Saymi sayraq rurash vïnuta sänu urpuman winansi. Sayno rurashqaqa vïnupis manami jichanqasu ni urpupis ushakanqasu”.
[18] Sayno parlaykaptinmi sinagögacho mandaq runa chaykur Jesúspa puntanman qonqurpakuykushpan nirqan: “Warmi surïmi päsarpush, taytay. Aywaykuläshun. Yataykuptikiqa kawariykamunqami”.
[19] Sayno ruwakuptinmi discïpulunkunawan Jesús aywayarqan.
[20] Aywaykäyaptinmi chunka ishkay watana yawar apaywan qeshyaykaq warmi qepalanpa yaykuykur Jesúspa mödananpa kuchunta yataykurqan.
[21] Sayno rurarqan “Jesúspa mödananta yataykularpis aliyäshaqmi” nir yarpashpanmi.
[22] Yataykuptinmi tikraykur Jesús payta rikärishpan nirqan: “Ama lakikuysu, hïja. Yärakamashqaykipitami aliyashkanki”. Say nishqan hörami warmi aliyaskirqan.
[23] Saypitanami autoridäpa wayinman Jesús chaykur tarirqan ayata pampayänanpaq tukapakuqkuna tukaykäyaqta y runakunapis fiyupa waqaykäyaqta.
[24] Paykunatami Jesús nirqan: “Waqtapa yarqukuyay. Wamraqa manami wanushsu, sinöqa punuykanlami”. Sayno niptinmi asipäyarqan.
[25] Waqtapa yarquskiyaptinnami wamra sutaraykashqanman Jesús yaykuskir makinpita aptarkuptin wamra kawarirkur sharkamurqan.
[26] Sayno kawarisimushqantami say markacho y wakin markakunachöpis musyayarqan.
[27] Saypita Jesús aywakuptinmi ishkay qaprakuna paypa qepanpa aywar niyarqan: “¡ Davidpa Surin Jesús, kuyapaykayälämay!”
[28] Wayiman Jesús yaykuptinpis say qaprakuna qepantami yaykuyarqan. Saymi Jesús tapurqan: “¿Qamkuna criyiyankiku nawikikunata aliyäsinäpaq kashqanta?” Niptinmi “awmi taytay, criyiyämi” niyarqan.
[29] Sayno niyaptinmi paykunapa nawinkunata yataykur Jesús nirqan: “Yärakayämashqaykipitami nawikikuna rikanqana”.
[30] Sayno niptinmi paykunapa nawinkuna jukla aliyarqan. Saymi Jesús nirqan: “Aliyäsishqäta pitapis ama wilapäyankisu”.
[31] Sayno niptinpis yarqurilarmi Jesús aliyäsishqanta pïmaytapis wilapäyarqan.
[32] Say aliyäsishqan qaprakuna yarquriyaptinnami Jesús kaqman pushayarqan parlayta mana puëdiq runata. Say runacho supay kaptinmi parlarqansu.
[33] Saymi say supayta Jesús qarquskiptin runa parlar qalaykurqan. Sayta rikaykurmi runakuna kushikuyashpan niyarqan: “¡Manami maychöpis rikashkansisu kayno aliyäsikuqtaqa!”
[34] Fariseukunami isanqa niyarqan: “Kay runaqa supaykunapa mandaqninpa munayninwanmi supaykunata qarquykan”.
[35] Lapan markakunapa y jalqakunapa Jesús purirmi Tayta Dios mandaykashqanpa ali wilakuyninta sinagögakunacho yachasirqan y tukuy niraq qeshyawan qeshyaqkunata aliyäsirqan.
[36] Saymi saysika runakuna Jesús kaqman shuntakäyarqan. Misiqniynaq y oqrakash uyshakunano kaykaqta rikarmi Jesús kuyaparqan.
[37] Saymi discïpulunkunata nirqan: “Cosëcha shuntaypaq kaykaqnömi saysika runakuna Tayta Diospa wilakuyninta chaskikuyänanpaq kaykäyan. Sayno kaptinpis walkaqlami wilakuqkuna kaykäyan.
[38] Tayta Diosta manakuyay wilakuqkunata kachananpaq”.