[1] Say watakunami Judea provinciacho kaykaq sunyaq jirkacho Bautizaq Juan wilakur
[2] nirqan: “¡Tayta Dios mandaykashqan chämushnami! ¡Jusalikuykunata wanakur Tayta Dios munashqannöna kawayay!”
[3] Sayno wilakunanpaqmi profëta Isaías qelqashqancho nin: “Juk runami sunyaq jirkacho qayakuypa wilakur nikan: ‘Tayta Dios shamunanpaq nänita alsayay. Wenqu nänikunata derechayay’ ”.
[4] Juanpa mödanan karqan camëllupa aqsanpita awashqami. Wachkunpis karqan camëllu qarapita rurashqami. Mikuyninpis chukluskuna y abëjapa mishkinmi karqan.
[5] Juan wilakushqanta wiyaqmi Jerusalénpita, Judeapita y Jordán mayu wisan markakunapita runakuna aywayarqan.
[6] Tayta Diosta perdonta manakuyaptinmi Jordán mayucho say runakunata Juan bautizarqan.
[7] Sayman aska fariseo y saduceo runakunapis bautizakuq chäyashqanta rikarmi Juan nirqan: “¡Culebra casta runakuna! ¡Pitaq qamkunata niyäshushkanki Tayta Diospa castïgunpita qeshpiyänaykipaq kashqanta!
[8] Jusaykikunata rasunpaypa wanakush karqa Tayta Dios munashqannöna kawayay.
[9] Ama yarpäyaysu Abrahampa ayllun kayashqaykipita Tayta Dios salvayäshunaykipaq kashqanta. Noqa kaynömi nï: Tayta Dios munarqa kay rumikunatapis Abraham ayllu runakunaman tikrarasinmanmi.
[10] Mana wayuq jachakunata chakipita muturir ninaman qaykuqnömi jusalikuqkunata castigananpaq Tayta Dios kamarikushna kaykan.
[11] “Jusalikuyta wanakur Tayta Dios munashqanno kawayänaykipaqmi yakuwan bautizä. Qepäta shamuq kaqmi isanqa Espíritu Santuwan y ninawanpis bautizayäshunki. Noqapita mas munayyuq kaptinmi lanqinta apapänaläpaqpis välïsu.
[12] Trïguta wayrananpaq jurquëtan aptashnami kaykan. Wayraskirnami trïguta wayinman churanqa. Punshantanami imaypis mana upiq ninaman qaykunqa”.
[13] Juan bautizananpaqmi Jesúspis Galileapita Jordán mayuman aywarqan.
[14] Chaykuptinmi bautizayta mana munar Juan nirqan: “Manami qamta bautizämansu, taytay. Saypa trukanqa noqatachir bautizaykalämankimanqa”.
[15] Sayno niptinmi Jesús nirqan: “Imano kaptinpis bautizaykalämay. Bautizamänaykitami Tayta Dios munan”. Sayno niptinmi bautizarqan.
[16] Bautizakuskir yakupita yarqaykämuptinmi jana pasa kichakämurqan. Saychömi Jesús rikarqan Espíritu Santu imayka palumano urämur jananman chaykaqta.
[17] Saynöpis jana pasapita Tayta Dios nimurqan: “Payqa kuyay surïmi. Paypitami kushish kaykä”.