[1] Jerusalénman Jesús aywarmi Olivos lömacho Betfagé markaman chäyarqan. Saypitanami ishkay discïpulunkunata kachar
[2] nirqan: “Taqay markaman aywayay. Chäyashpaykimi malta wawayuq ashnu wataraykaqta tariyanki. Say ashnuta paskarir wawantinta apayämuy.
[3] Pipis tapushuptiki niyanki: ‘Señor Jesúsmi munaykan. Rätulatami kutirasimunqa’ ”.
[4] Saynöpami Tayta Diospa profëtan kayno qelqashqanta cumplirqan:
[5] “ Sión runakunata wilay: ‘Rikayay mandaqniki rey shamuykaqta. Humildi karmi ashnun loqash shamuykan. Malta ashnun loqashqami shamuykan’ ”.
[6] Saymi discïpulunkuna aywar Jesús nishqannöla rurayarqan.
[7] Mamantinta apaykur punchunkunata karunaparkuyaptinmi malta ashnun loqash Jesús aywarqan.
[8] Sayno aywaptinmi saysika runakuna kushikur punchunkunata näniman mashtayarqan. Saynölami wakinkunapis palmakunapa rämankunata pakirir pakirir näniman mashtayarqan.
[9] Saymi puntanta aywaqkuna y qepanta aywaqkunapis kushikuyashpan niyarqan: “¡Hosana! ¡ Davidpa Surin alabash kaykuläsun! ¡Tayta Diospa jutincho shamuq runa alabash kaykuläsun! ¡Jana pasachöpis alabash kaykuläsun!”
[10] Jerusalénman Jesús yaykuptinmi saycho kaykaq lapan runakuna jukninpis jukninpis tapunakuyarqan: “¿Piraq taqay runa?” niyashpan.
[11] Saymi Jesúswan aywaykaq runakuna niyarqan: “Pay kaykan Galileacho kaykaq Nazaretpita shamuq profëta Jesúsmi”.
[12] Templu patiuman yaykurirnami rantikuqkunata y rantipakuqkunatapis Jesús qarqurqan. Saynölami qellay trukasiqkunapa mësankunatapis y paluma rantikuqkunapa sillëtankunatapis tikrar usharqan.
[13] Qarqurmi nirqan: “Tayta Diospa palabrancho kaynömi qelqaraykan: ‘Wayïqa kanqa runakuna manakayämänanpaqmi’. Sayno nikaptinpis qamkunaqa suwakunapa machayninmanmi tikrasiyashkanki”.
[14] Templu patiucho Jesús kaykaptinmi qaprakuna y weqrukunapis payta witipäyarqan. Paykunata lapantami aliyäsirqan.
[15] Saychömi wamrakunapis payta alabar niyarqan: “¡Hosana! ¡ Davidpa Surinta alabashun!” Runakunata Jesús aliyaykäsiqta rikaykur y wamrakuna alabaykäyaqta wiyarmi mandaq cürakuna y ley yachasiqkunapis fiyupa rabyanäyarqan.
[16] Saymi Jesústa niyarqan: “¿Wiyankiku kay wamrakuna nikäyashqanta?” Saymi Jesús nirqan: “Aw, wiyämi. ¿Manaku liyiyashkanki Diospa palabrancho kayno qelqaraykashqanta: ‘Pishi wamrakuna y chuchuykaq wamrakunapis alabayäshunkimi’?”
[17] Sayno niskirmi paykunata kacharir Betania markaman kutikurqan saycho pasakunanpaq.
[18] Waraynin tuta Jerusalénman Jesús kutiykashqanchömi mikanarqan.
[19] Saymi näni nawpancho hïgus jachata rikaykur wayuyninta ashiq aywarqan. Rapralanta tariykurmi nirqan: “¡Kananpitaqa manami imaypis wayunkinasu!” Sayno niptinmi jinan höra hïgus jacha sakikäkurqan.
[20] Sayta rikaykurmi discïpulunkuna admirakuyashpan ninakuyarqan: “¿Imanöpataq hïgus jacha jinan höra sakiskish?”
[21] Saymi Jesús nirqan: “Rasunpami nï: Lapan shonquykiwan Tayta Diosman yärakurqa manami kay hïgus jachata sakisishqänölasu rurayanki, sinöqa taqay jirkata: ‘Kaypita lamarman ayway’ niyaptikipis aywanqami.
[22] Lapan shonquykiwan yärakur imatapis Tayta Diosta manakurqa chaskiyankimi”.
[23] Saypita templu patiuman yaykuykur yachaykäsiptinmi mandaq cürakuna y Israel mayor runakunapis Jesústa tapuyarqan: “Qam ¿pipa munayninwantaq rantikuqkunata qarqushkanki? ¿Pitaq nishushkanki sayno qarqunaykipaq?” nir.
[24] Saymi Jesús nirqan: “Qamkunatapis mä tapushayki. Tapushqäta niyämaptikiqa noqapis wilayäshaykimi pipa munayninwan qarqushqätapis.
[25] ¿Pitaq Juanta kachamush bautizananpaq? ¿Tayta Diosku o runakunalaku?” Sayno tapuptinmi kikinpura ninakuyarqan: “Tayta Dios kachamushqanta nishqaqa: ‘¿Imanirtaq chaskikuyashkankisu?’ nimäshunmi.
[26] Runakuna kachayämushqanta nishqaqa intëru markami contransi sharkuyanqa. Lapanmi yarpäyan Juan profëta kashqanta”.
[27] Saymi Jesústa niyarqan: “Manami musyayäsu pï kachamushqantapis”. Sayno niyaptinmi Jesús nirqan: “Noqapis manami wilayäshaykisu pipa munayninwan rantikuqkunata qarqushqäta”.
[28] “¿Ima niyankitaq? Juk runapashi ishkay surinkuna kanaq. Qechpa kaq surintashi ninaq: ‘Hïju, kanan junaq üva chakrächo yanapaykalämay’.
[29] Sayno ruwakuptin manashi awninaqsu. Nikarpis yarpachakurirqa aruqshi aywanaq.
[30] Qechpa surinta minkakushqannölashi shulka kaq surintapis minkakunaq. Sayshi surin ninaq: ‘Yanapäshayki ari, papä’. Sayno awnirkurpis manashi aywanaqsu.
[31] “Kanan mä niyämay. ¿Mayqantaq taytan munashqanta rurash?” Sayno niptinmi “qechpa kaq surinmi” niyarqan. Saymi Jesús nirqan: “Rasunpami nï: Say qechpa kaq surin kashqannömi Romapaq impuestu cobraqkuna y prostitüta warmikunapis kaykäyan. Paykunaqa qamkunapita mas puntatami Tayta Dios mandaykashqanman yaykuykäyan.
[32] Tayta Dios munashqanno kawayänaykipaq Bautizaq Juan yachasiyäshuptikipis qamkunaqa manami chaskikuyashkankisu. Impuestu cobraqkuna y prostitüta warmikunami isanqa wilakushqanta chaskikuyash. Sayta rikaykarpis qamkunaqa wilakushqanta manami chaskikuyashkankisu ni jusalikuyashqaykita wanakuyashkankisu”.
[33] “Mas juktapis tinkusiypa yachasiyäshayki: Juk runashi chakranman üvata plantaykasir intëru kuchunpa perqasinaq. Üvata jaruyänanpaqshi pözuta rurasinaq. Chakranta täpananpaqshi törritapis sharkasinaq. Lapanta ruraskasirnashi chakranta arriendakuykur juklä markapa aywakunaq.
[34] “Cosëcha qalaykuptinnashi üva chakra arriendunpita cobrakayämunanpaq ashmayninkunata kachanaq.
[35] Chäyaptinshi chakra arriendaqkunaqa say ashmaykunata jukta maqayänaq, jukta wanusiyänaq y juktanashi samqar ushayänaq.
[36] Sayshi chakrayuq runaqa puntata kachashqanpita mas askaqtana ashmayninkunata kachanaq. Paykunatapis saynölashi rurayänaq.
[37] “Saypitanashi kikinpa surintana kachanaq ‘surïtaqa respitayanqami’ nishpan.
[38] Sayshi surin aywaykaqta rikayashpan chakra arriendaqkuna wilanakur niyänaq: ‘Taqaymi kay chakrawan quëdananpaq kaykan. Chakranwan quëdakunansipaq wanuskasishun’.
[39] Chaykuptinnashi wilanakuyashqannöla üva chakrapita jukläman apaykur wanusiyänaq”.
[40] Sayno wilaparkurmi Jesús nirqan: “Say üva chakrayuq kutishpan ¿imatataq ruranqa say runakunata?”
[41] Tapuptinmi niyarqan: “Say yaqa runakunataqa mana kuyapaypami wanusir ushanqa. Nirkurmi cada cosëchacho pägaq kaqtana chakranta arriendakuykunqa”.
[42] Saymi Jesús nirqan: “¿Manaku liyiyashkanki Tayta Diospa palabran kayno nishqanta? “ ‘Wayi sharkasiqkuna “kay rumi manami alisu” nir jitariyashqanmi wayi esquïna cimientuchöna churaraykan. Sayno kananpaq Tayta Diosmi kamakäsish. Saypitami seqaypa kushikunsi’.
[43] “Saymi qamkunata nï: Mandashqanta qechurkuyäshushpayki cäsukuq runakunatana qoykunqa.
[44] Pipis say rumiman tuniq kaqqa ushakanqami. Saynölami pipa jananmanpis say rumi charqa pasaypa ushakäsinqa”.
[45] Sayno tinkusiypa yachasiptinmi mandaq cürakuna y fariseukuna tantiyayarqan paykunapa contran parlaykashqanta.
[46] Saymi prësu sarisiyta munarpis profëta kashqanta runakuna parlayaptin paykunata mansapar sarisiyarqansu.