[1] “Tayta Dios mandaykashqan imano kashqantapis kanan tantiyasiyäshayki. Juk runashi üva chakrancho arusinanpaq tuta tutala minkay ashiq aywanaq.
[2] Minkayta tarirshi juk jornalta pägananpaq parlaskir üva chakranman aruq kachanaq.
[3] “Saypita tuta malway hörano pläzapa yapay aywarshi runakuna aruyniynaq puriykäyaqta tarinaq.
[4] Sayshi ninaq: ‘Qamkunapis üva chakräman aruq aywayay. Pägayäshaykimi’. Sayno niptinshi paykunapis aywayänaq.
[5] “Pulan junaqpis y tardi malwayna intipis yapayshi minkay ashiq aywanaq. Tariykurshi wakin kaqtanöla chakranman kachanaq.
[6] “Saypita minkaykuna yarquyänanpaq juk hörano pishiykaptinshi yapay aywar runakuna aruyniynaq kaykäyaqta tarinaq. Sayshi ninaq: ‘¿Imanirtaq qoyati imatapis mana ruraypa kaykäyanki?’
[7] “Sayno niptinshi niyänaq: ‘Manami pipis minkakayämashsu, taytay’. “Sayshi ninaq: ‘Qamkunapis chakräman aruq aywayay’.
[8] “Pasa sakaykaptinnashi capatazninta ninaq: ‘Aruqkunata qayaykur lapanta juk jornalta pägay. Tardiraq yaykuqkunata puntata päganki y tutapita aruqkunata qepata päganki’.
[9] Say nishqannölashi tardiraq aruq yaykuqkunata juk jornal complëtuta päganaq.
[10] Sayta rikarshi tutapita aruqkunaqa shayämunaq mas askata chaskiyänanpaq kayashqanta yarpar. Sayno yarparpis juk jornaltashi paykunapis chaskiyänaq.
[11] Sayshi chakrayuqta reclamar
[12] niyänaq: ‘Tardiraq yaykamuqkuna juk hörala aruykäyaptinqa ¿imanirtaq noqakunataqa sayjina shanaycho aruykäyaptï paykunatanöla pägaykäyämanki?’
[13] “Sayno niyaptinshi chakrayuq runa ninaq: ‘Amïgu, parlashqansinömi pägaykä. Manami engañaykäsu.
[14] Päguykikunata chaskiykarnaqa aywakuyayna. Kikï munarmi tardi yaykamuqkunatapis qamkunatano pägaykä.
[15] Qamkuna ¿ima cuentayuqtaq kayanki aykata pägaptïpis? ¿Ali runa kashqäpitaku ajanäyanki?’ ”
[16] Sayno wilaparkurmi Jesús nirqan: “Saynölami qepa kaqkuna puntacho kayanqa. Punta kaqkunanami qepacho kayanqa. [Askaqta qayarpis walkälatami Tayta Dios akranqa]”.
[17] Jerusalénman aywaykäyashqanchömi chunka ishkay discïpulunkunata jukläman qayaykur Jesús nirqan:
[18] “Musyayankimi Jerusalénman aywaykashqansita. Saychömi Runapa Surinta prësu sarirkur mandaq cürakunaman y ley yachasiqkunaman apayanqa. Paykunami wanusish kananpaq niyanqa.
[19] Mana Israel autoridäkunapa makinman churayaptinmi asipäyanqa, astayanqa y crucificayanqapis. Sayno kaptinpis kimsa junaqtaqa kawarimunqami”.
[20] Saypitanami Zebedeupa warmin wawankunata pushakurkur Jesús kaqman charqan. Jesúspa puntanman qonqurpakuykurmi nirqan: “Ruwakuläshayki, taytay”.
[21] Sayno niptinmi Jesús nirqan: “¿Imata ruranätataq munaykanki?” Saymi say warmi nirqan: “Mandaq kanaykipaq Tayta Dios churashuptiki kay ishkay wawäkunata churaykulanki mandäsishunaykipaq, taytay. Jukta jamaykasinki aluqnikiman y jukaqtana isuqnikiman”.
[22] Saymi Jesús nirqan: “Imata manakayämashqaykitapis manami musyayankisu. ¿Noqa upunäpaq kaq cöpata upuyankimansuraq? [¿Awantayankimansuraq bautizayämänanpaq kashqanno bautizayäshuptiki?]” Saymi niyarqan: “Awmi, taytay”.
[23] Sayno niyaptinmi Jesús nirqan: “Rasunpaypami noqa upunäpaq kaq cöpata upuyanki [y bautizayämänanpaq kashqanno bautizayäshunki]. Sayno kaptinpis aluq kaq nawpäman ni isuq kaq nawpäman jamasinäpaq manami noqapitasu kaykan. Saymanqa jamayanqa Taytä nishqan kaqkunalami”.
[24] Say ruwakuyashqanta wiyarmi wakin kaq discïpulunkuna Juantawan Santiaguta rabyapäyarqan.
[25] Saymi discïpulunkunata qayaykur Jesús nirqan: “Musyayashqaykinöpis nación mandaq runakunaqa munayashqantami rurasiyan.
[26] Qamkunachöqa manami sayno kanmansu. Mayqaykipis mandaq kayta munarqa ashmaynöla runa mayikita yanapäyay.
[27] Ali rikash kayta munarqa esclävunöla runa mayikita yanapäyay.
[28] Runapa Surinpis manami sirvish kananpaqsu shamush, sinöqa sirvinanpaq y runakuna rayku wanur askaqta salvananpaqmi”.
[29] Jericó markapita discïpulunkunawan Jesús aywakuptinmi aska runakuna qepanta aywayarqan.
[30] Say nänichömi ishkay qapra runakuna jamaraykäyarqan. Paykunami Jesús päsaykashqanta mayar qayakuyashpan niyarqan: “¡ Davidpa Surin Tayta Jesús, kuyapaykayälämay!”
[31] Saymi upälakuyänanpaq olqutupäyarqan. Olqutupäyaptinpis masraqmi qayakur niyarqan: “¡Davidpa Surin Jesús, kuyapaykayälämay ari!”
[32] Saymi say qaprakunata qayaykur Jesús tapurqan: “¿Imacho yanapänätataq munayanki?” nir.
[33] Niptinmi qaprakuna niyarqan: “Nawïkuna rikanantami munayä, taytay”.
[34] Saymi kuyapar nawinkunata yataykuptin jinan höra rikayarqanna. Aliyarkurnami Jesúspa qepanta aywayarqan.