[1] Sayno yachasiyta usharkurmi discïpulunkunata Jesús nirqan:
[2] “Musyayashqaykinöpis Pascua fiesta qalaykunanpaq ishkay junaqlanami pishiykan. Saychömi prësu sariykur Runapa Surinta crucificayanqa”.
[3] Saypitanami mandaq cürakuna, [ley yachasiqkuna] y Israel mayor runakuna shuntakäyarqan mas mandaq cüra Caifáspa wayinman.
[4] Saychömi wilanakuyarqan runakunata mana musyasiylapa Jesústa sarirkur wanusiyänanpaq.
[5] Saymi niyarqan: “Fiestachöqa ama sarishunsu. Saycho sarishqaqa contransimi runakuna sharkuyanqa”.
[6] Betania markacho leprösu niyashqan Simónpa wayincho Jesús kaykaptinmi
[7] juk warmi charqan alabastro rumipita rurash pömuwan perfümin aptash. Say perfümiqa selläma chaninmi karqan. Mësacho kaykaptinmi say warmiqa Jesúspa umanman perfümita winaparqan.
[8] Sayta rikarmi discïpulunkuna rabyanäyashpan niyarqan: “¿Imapaqtaq say perfümita perdisish?
[9] Saypa trukanqa ali chanincho rantikuskir say qellaywan muchuqkunata yanapashwan karqan”.
[10] Sayno niyashqanta wiyaykurmi Jesús nirqan: “¿Imanirtaq kay warmita jamuraykäyanki? Pay alitami rurash.
[11] Muchuqkunaqa qamkunawanmi imaypis kaykäyanqa. Noqami isanqa qamkunawan kashaqnasu.
[12] Pampash kanäpaqmi payqa perfümita winapämar kamariykäman.
[13] Rasunpami nï: Maysaychöpis wilakuynïta wilakur kay warmi perfümita winapämashqantapis wilakuyanqami”.
[14] Jesúspa apostolnin Judas Iscariotimi mandaq cürakunaman aywaykur
[15] nirqan: “Jesústa prësu sarisiyänaykipaq pushaptï ¿aykatataq pägayämankiman?” Sayno niptinmi kimsa chunka (30) yuraq qellayta pägayänanpaq niyarqan.
[16] Saypitanami Judas yarpachakurqan Jesús kaqman imay höra pushananpaqpis.
[17] Levadüraynaq Tantata Mikuna fiesta qalaykunan junaqmi discïpulunkuna Jesústa tapuyarqan: “Taytay, Pascua mikuyta mikunansipaq ¿maychötaq kamarikayämushaq?”
[18] Sayno niyaptinmi Jesús nirqan: “Jerusalénman aywayay. Wayinman chaykur juk runata niyanki: ‘Jesúsmi kachayämash. Höranshi chaykämunna. Wayikichöshi Pascua mikuyta discïpulunkunawan mikuyanqa’ ”.
[19] Jesús yäsishqannöla aywarmi discïpulunkuna Pascua mikuyta kamariyarqan.
[20] Pasa sakaykaptinnami chunka ishkay discïpulunkunawan mësaman Jesús jamakuyarqan.
[21] Mikuykäyashqanchömi Jesús nirqan: “Rasunpami nï: Qamkunapita juknikimi prësu sariyämänanpaq entregamanqa”.
[22] Sayno niptinmi fiyupa lakikuyashpan juknin juknin tapuyarqan: “Taytay, ¿noqasuraq kaykä?” niyashpan.
[23] Saymi Jesús nirqan: “Plätucho noqawan tantata ushmasiq kaqmi entregamanqa.
[24] Rasunpaypami Runapa Surinqa qelqaraykashqannöla nakar wanunqa. Payta prësusiq runami isanqa pasaypa kuyapaypaq kanqa. Say runaqa ama yurinmanpissu karqan”.
[25] Sayno niptinmi rantikunanpaq kaq Judas nirqan: “ Rabí, ¿noqasuraq kaykä?” Niptinmi Jesús nirqan: “Kikikimi nikanki”.
[26] Saypitanami tantata aptarkur Tayta Diosta Jesús päkilä nirqan. Tantata pakiparmi discïpulunkunata nirqan: “Kay tantata mikuyay. Kayqa cuerpümi”.
[27] Saynölami vïnuyuq väsuta aptarkur Tayta Diosta päkilä nirqan. Nirkurnami discïpulunkunata makyar nirqan: “Lapayki kaypita upuyay.
[28] Kay vïnuqa Tayta Dios [mushuq] pactuta rurananpaq jichashqä yawarnïmi. Aska runakuna jusankunapita perdonash kayänanpaqmi yawarnïta jichar wanushaq.
[29] Noqa kaynömi nï: Taytä mandashqancho qamkunawan mushuq vïnuta upushqansiyaq manami vïnuta yapay upushaqnasu”.
[30] Discïpulunkunawan salmukunata cantaskirnami Olivos lömaman aywayarqan.
[31] Saypitanami Jesús nirqan: “Kanan sakaymi lapayki kachariykamar aywakuyanki. Tayta Diospa palabranchöpis kaynömi qelqaraykan: ‘Uysha misiqta wanuykasiptï uyshankuna wakpa kaypami aywakuyanqa’.
[32] Sayno kaptinpis wanushqäpita kawarirkamurmi qamkunapita mas puntata Galileaman aywashaq”.
[33] Niptinmi Pedro nirqan: “Wakin kachariyäshuptikipis noqa manami kachashaykisu”.
[34] Saymi Jesús nirqan: “Rasunpami nï: Kanan sakay kakash manaraq cantaptinmi mana reqimashqaykita ninkipaq”.
[35] Sayno niptinmi Pedro nirqan: “Ishkansita wanusimänansi kaptinpis manami ñëgashaykisu”. Wakin kaq discïpulunkunapis saynölami niyarqan.
[36] Getsemaní nishqanman discïpulunkunawan chaykurmi Jesús nirqan: “Tayta Diosta manakamushqäyaq kaylacho jamaraykäyay”.
[37] Nirkurmi Pedruta y Zebedeupa surinkunata mas washaläman pusharqan. Saychömi seqaypa lakikur
[38] nirqan: “Wanunayparaqmi lakikuy sarimash. Mana punukaylapa kaylacho shuyaraykäyämay”.
[39] Nirkur mas washaläman aywashpanmi pasaman lätakuykur Tayta Diosta manakur nirqan: “Papä, cöpacho winaraykaq castïguykita ama upuykasilämaysu. Isanqa noqa munashqäno ama kasunsu, sinöqa qam munashqaykino kaykuläsun”.
[40] Saypita discïpulunkuna kaqman kutirmi punukash kaykäyaqta tarirqan. Saymi Pedruta nirqan: “¿Manaku juk höralapis rikchayta kamäpakuyanki?
[41] Rikchayayna. Satanásta ichipäyänaykipaq Tayta Diosta manakuyay. Cäsukamayta munarpis kikilaykikunapitaqa manami kamäpakuyankisu”.
[42] Sayno nirkurmi yapay aywashpan Tayta Diosta manakur nirqan: “Papä, kay cöpacho winaraykaq castïguykita upunäta munaptikiqa munashqaykino kaykuläsun”.
[43] Yapay Jesús kutirmi discïpulunkunata tarirqan punukash kaykäyaqta. Punuy pasaypa nitiptinmi punukash kaykäyarqan.
[44] Saypita yapay aywarmi puntata manakushqannöla Tayta Diosta manakurqan.
[45] Discïpulunkunaman yapay kutiykurmi nirqan: “¿Jinalaku punuykäyanki? Höra chämushnami Runapa Surinta jusasapa runakunapa makinman entregananpaq.
[46] ¡Sharkuyay, aywashunna! Entregamaq runa shamuykannami”.
[47] Jesús sayno parlaykaptinraqmi aska runakunata pushash apostolnin Judas Iscariote charqan. Say runakunatami espädankuna y garrutinkuna aptashta mandaq cürakuna y Israel mayor runakuna kachayarqan.
[48] Manaraq charmi pushashqan runakunata yäsir Judas nirqan: “Mayqantapis musar winchikushqä kaqmi Jesús kanqa. Payta prësu sariyanki”.
[49] Saymi chaykur “¡winchi, rabí!” nishpan Jesústa musaykurqan.
[50] Saymi Jesús nirqan: “Amïgu, ruranaykipaq kaqta juklana ruray”. Sayno niptinmi Jesústa prësu sariyarqan.
[51] Sariyaptinmi juk discïpulun espädanta jorqurir mas mandaq cürapa ashmayninpa rinrinta wallurirqan.
[52] Saymi Jesús nirqan: “¡Espädaykita kutisiy! Pipis espädawan wanusiq kaqqa espädawan wanusishqami kanqa.
[53] ¿Manaku musyanki Taytäta manakuptï washämänanpaq chunka ishkay legión angilkunapita masta kachamunanpaq kashqanta?
[54] Sayno manakuptïqa ¿imanöparaq cumplikanqa runakuna wanusiyämänanpaq Tayta Diospa palabran nishqanpis?”
[55] Nirkurnami runakunata Jesús nirqan: “¿Imanirtaq suwamannöpis espädaykikunawan y garrutikikunawan shayämushkanki? Waran waran templu patiucho [qamkunawan] kaykaptï ¿imanirtaq saycho prësu sariyämarqaykisu?
[56] Isanqa prësu sariykäyämanki profëtakuna qelqayashqan cumplikänanpaqmi”. Jesústa prësu sariyaptinnami discïpulunkuna kachaykur qeshpir aywakuyarqan.
[57] Saypitanami mas mandaq cüra Caifáspa wayinman Jesústa apayarqan. Saychömi ley yachasiqkuna y Israel mayor runakunapis shuntakash kaykäyarqan.
[58] Karu qepalanta Pedro aywarmi sawan ruriyaq yaykurqan. Yaykurirmi ima päsashqantapis rikananpaq templu täpaq wardiakunawan jamaraykarqan.
[59] Saychömi mandaq cürakuna, [Israel mayor runakuna] y lapan Sanedrín juezkuna Jesústa wanusiyta munar testïgukunata ashiyarqan lulakur Jesúspa contran parlayänanpaq.
[60] Manakaqkunata askaq jitapäyaptinpis wanusish kananpaq manami ima jusantapis tariyarqansu. Saypitanami ishkay lula runakuna witiykur
[61] niyarqan: “Kay runami templuta juchurasir kimsa junaqlata yapay sharkasinanpaq nirqan”.
[62] Saymi mas mandaq cüra sharkurkur Jesústa tapur nirqan: “Sayno jitapäshuptiki ¿manaku imatapis ninki? ¿Rasun kaqtaku nikäyan o manaku?”
[63] Sayno tapuptinpis manami imatapis Jesús parlakurqansu. Saymi mas mandaq cüra nirqan: “Imayyaqpis kawaq Tayta Diospa jutinchömi qamta tapü: ¿Rasunpaku Diospa Surin Cristo kaykanki o manaku?”
[64] Sayno tapuptinmi Jesús nirqan: “Nishqaykinölami kä. Kananpitaqa Runapa Surinta rikayanki munayyuq Diospa aluq kaq nawpancho jamaraykaqta y pukutay janancho jana pasapita shamuykaqtami”.
[65] Sayno niptinmi mas mandaq cüra fiyupa rabyashpan sotänantapis rachirir nirqan: “¡Kay runaqa Tayta Diospa contranmi parlaykan! ¿Imapaqnataq mas testïgutapis ashishun? Wiyayashkankinami lutanta parlaykashqanta.
[66] Kanan ¿imatataq niyanki?” Sayno niptinmi lapan niyarqan: “¡Jusayuqmi kaykan! ¡Wanusish kasun!”
[67] Sayno nirmi Jesúspa qaqlancho toqapäyashpan kutayarqan. Wakinnami laqyayashpan
[68] niyarqan: “Rasunpaypa Cristo karqa pï maqashushqaykitapis mä niyämay”.
[69] Pedruqa patiuchömi jamaraykarqan. Payta rikarmi juk ashmay jipash nirqan: “Qampis Galileapita kaq Jesúswanmi purishkanki”.
[70] Sayno niptinmi lapan runakuna wiyaykäyaptin Pedro nirqan: “Manami musyäsu imapita parlaykashqaykitapis”.
[71] Sayno niskirmi sawan punkumanna witikurqan. Saychöpis juk ashmay jipash payta rikaykur saycho kaykaqkunata nirqan: “Kay runataqa taqay Jesúswan puriqtami rikashkä”.
[72] Yapaypis ñëgarmi Pedro jurashpan nirqan: “¡Say runata manami reqïsu!”
[73] Saypita maylantanami saycho kaykaq wakin runakuna Pedruman witiykur niyarqan: “Qamqa rasunpaypami paywan puriq kaykanki. Parlakuynikipis Galilea runakunapa niraqmi kaykan”.
[74] Sayno niyaptinmi Pedro yapay jurashpan nirqan: “¡Say runataqa manami reqïsu!” Say hörami kakash cantarkurqan.
[75] Sayno cantarkuptinmi Pedro yarparkurqan Jesús kayno nishqanta: “Manaraq kakash cantaptinmi kimsa kuti mana reqimashqaykita ninkipaq”. Saymi waqtaman yarquskir seqaypa pësakushpan waqarqan.