[1] Jesústa manakaqman churayta munarmi fariseukunawan saduceukuna aywaykur niyarqan: “Tayta Dios rasunpaypa kachamushushqaykita musyayänäpaq ima milagrutapis ruraykulay, taytay”.
[2] Saymi Jesús nirqan: “Inti jeqashqan höra pukutay qarwa qarwa rikakuptinmi qamkuna niyanki: ‘Waray usyanqami’.
[3] Saynölami pukutaraykar warämuptin niyanki: ‘Kanan junaqqa tamyanqami’. [¡Ishkay cära runakuna!] Saykunata tantiyaykarqa ¿imanirtaq rurashqäkunata rikaykar Tayta Dios kachamashqanta tantiyayankisu?
[4] ¡Mana wiyakuq jusasapa runakuna! Milagruta ruranäta munayaptikipis manami ima milagrutapis rurashaqsu. Saypa trukanqa profëta Jonásta salvar milagruta rurashqannömi Tayta Dios juk milagruta ruranqa”. Sayno niskirmi Jesús aywakurqan.
[5] Qochata simparkurmi Jesúspa discïpulunkuna tantata qonqayashqanta yarpaskiyarqan.
[6] Saymi Jesús nirqan: “ Fariseukunapawan saduceukunapa levadüranta cuidädu chaskipäyankimantaq”.
[7] Sayno niptinmi discïpulunkuna kikinpura ninakuyarqan: “Tantata mana mirkapakamushqansipitami sayno nikämansi”.
[8] Sayno parlaykäyashqanta tantiyarmi Jesús nirqan: “¡Janan shonqula yärakuq runakuna! ¿Imanirtaq parlaykäyanki tantata mana apayämushqaykipita?
[9] ¿Imanirtaq tantiyayankisu imapaq parlaykashqätapis? ¿Manaku yarpäyanki pisqa tantalapita pisqa waranqa (5,000) runakuna mikuyänanpaq milagruta rurashqäta? ¿Manaku yarpäyanki pusuq tantata ayka canastata shuntayashqaykitapis?
[10] Saynöpis ¿manaku yarpäyanki qanchis tantalapita chusku waranqa (4,000) runakuna mikuyänanpaq milagruta rurashqäta y pusuq tantata ayka canastata shuntayashqaykitapis?
[11] ¿Imanirtaq tantiyayankisu tantapaq mana parlashqäta? Qamkunata sayno nikä fariseukunapawan saduceukunapa levadüranta mana chaskipäyänaykipaqmi”.
[12] Sayno niptinmi tantiyayarqan levadürapita mana parlaykashqanta, saypa trukanqa fariseukunapa y saduceukunapa yachasikuyninta mana chaskipäyänanpaq nikashqanta.
[13] Cesarea de Filipos kinrayman chaykurmi discïpulunkunata Jesús tapurqan: “ Runapa Surin ¿pï kashqantataq runakuna nikäyan?”
[14] Saymi discïpulunkuna niyarqan: “Wakin niyan Bautizaq Juan kashqaykita. Wakinnami niyan profëta Elías kashqaykita. Wakinnami niyan profëta Jeremías o mayqan profëtapis kashqaykita”.
[15] Sayno niyaptinmi Jesús yapay tapurqan: “Qamkunaqa ¿pï kashqätataq yarpäyanki?”
[16] Saymi Simón Pedro nirqan: “Qamqa imayyaqpis kawaq Tayta Diospa Surinmi kanki. Pay kachamushqan Cristumi kanki”.
[17] Saymi Jesús nirqan: “Jonáspa surin Simón, alitami nishkanki. Sayno ninaykipaq manami runasu tantiyasishushkanki, sinöqa jana pasacho kaykaq Taytämi.
[18] Qamta nï Pedro kashqaykitami. Kay rumi jananchömi iglesiäta sharkasishaq. Say iglesiataqa Satanáspis manami vincinqasu.
[19] Qamtami qoykushayki Tayta Dios mandaykashqanman yaykuna llävinpa wawankunata. Saymi kay pasacho watashqaykiqa jana pasachöpis watash kanqa. Kay pasacho paskashqaykiqa jana pasachöpis paskashqami kanqa”.
[20] Sayno nirkushpanmi discïpulunkunata nirqan: “Tayta Dios kachamushqan Cristo kashqäta pitapis ama wilayankisu”.
[21] Saypitanami discïpulunkunata Jesús wilapar nirqan: “Jerusalénmanmi aywanä kaykan. Saychömi Israel mayor runakuna, mandaq cürakuna y ley yachasiqkuna fiyupa nakasimar wanusiyämanqa. Wanusiyämashqanpita kimsa junaqtami kawarimushaq”.
[22] Sayno niptinmi jukläman qayaykur Pedro olqutupar nirqan: “Tayta, saytaqa Tayta Dios ama munaykuläsunsu. ¡Sayqa manami päsashunkimansu!”
[23] Sayno niptin Pedruman tikrarkur Jesús nirqan: “¡Nawpäpita witikuy, Satanás! ¡Ama sapata churapämaysu! Qam manami munankisu Tayta Dios munashqanta ruranäta, saypa trukanqa runa munashqanta ruranätami munaykanki”.
[24] Nirkurmi discïpulunkunata Jesús nirqan: “Pipis discïpulü kayta munarqa shonqun munashqanno ama kawasunsu, saypa trukanqa cruzninta apaqno noqata qatirämäsun.
[25] Vïdanta salvayta munaqkunaqa vïdanta oqrayanqami. Vïdanta noqa rayku oqraqkunami isanqa vïdanta salvayanqa.
[26] Infiernuman qaykush kananpaq kaptinqa ¿imapaqtaq välin intëru munduta makincho sararashqanpis? Mayjina rïcu karpis manami rïcu kashqanwanqa salvacionta rantinqasu.
[27] “ Runapa Surin angilninkunawan y Taytanpa munayninwan shamurmi imanöpis kawashqanman tupu pitapis juzganqa.
[28] Rasunpami nï: Manaraqpis wanurmi wakinniki rikayanki Runapa Surin lapantapis mandananpaq shamuykaqta”.