[1] Saypita soqta junaqtami Pedruta, Santiaguta y Santiagupa wawqin Juanta pushakurkur Jesús wisarqan altunnin jirkaman.
[2] Saychömi paykunapa rikanancho Jesús jukniraqman tikrarqan. Saymi qaqlanpis intinöraq chipipirqan y mödananpis pasaypa yuraq rikakur empañakuyparaq asikyarqan.
[3] Saychömi rikayarqan Moiséswan Elías yuriparkur Jesúswan parlaykäyaqta.
[4] Saymi Jesústa Pedro nirqan: “Alipaqmi kaycho kaykäyä, taytay. Munaptikiqa kimsa suklata rurayämushaq: jukta qampaq, jukta Moiséspaq y jukta Elíaspaq”.
[5] Pedro sayno nikashqan hörami chipipiykaq pukutay paykunata sapakurkurqan. Pukutaypitanami Tayta Dios nimurqan: “Paymi kuyay Surï. Paypitami kushish kaykä. Pay niyäshushqaykita cäsukuyay”.
[6] Sayno nimuqta wiyaykurmi discïpulunkuna seqaypa mansakäyashpan pasaman lätakuykuyarqan.
[7] Sayno lätaraykäyaptinmi paykunata yataykur Jesús nirqan: “Ama mansakäyaysu. Sharkuyay”.
[8] Sayno niptin nukirkuyashpanmi Jesúslatana rikayarqan.
[9] Jirkapita uraykäyämushqanchömi Jesús nirqan: “Puntacho rikayashqaykita pitapis ama wilapäyankiraqsu. Runapa Surin wanushqanpita kawarimuptinraq wilakuyanki”.
[10] Saymi discïpulunkuna Jesústa tapuyarqan: “Runapa Surin wanunanpaq kaykaptinqa ¿imanirtaq ley yachasiqkuna niyan puntata Elíasraq shamunanpaq kashqanta?”
[11] Niyaptinmi Jesús nirqan: “Elías rasunpaypami puntata shamunqa lapanta kamakäsinanpaq.
[12] Isanqa Elías maynami shamush. Pay pï kashqantapis mana reqirmi wanusiyarqan. Saynölami Runapa Surintapis wanusiyanqa”.
[13] Jesús sayno niptinmi discïpulunkuna tantiyayarqan Elíaspaq parlar Bautizaq Juanpaq parlaykashqanta.
[14] Runakuna shuntaraykäyashqanman Jesús chaptinmi puntanman qonqurpakuykur juk runa ruwakur nirqan:
[15] “Surïta kuyapaykulay, taytay. Wanuy qeshya sariptinmi pasaypa nakan. Aska kutimi ninamanpis yakumanpis jeqash.
[16] Discïpuluykikunaman apamuptïpis manami kachakäsiyta kamäpakuyashsu”.
[17] Sayno niptinmi Jesús nirqan: “¡Yärakuyniynaq jusasapa runakuna! ¡Imayyaqraq qamkunawan kaykäshaq! ¡Imayyaqraq qamkunata awantayäshayki! Mä say maqtata apayämuy”.
[18] Nawpanman chaykasiyaptinmi maqtata nakaykäsiq supayta Jesús olqutuparqan. Saymi supayqa jinan höra maqtapita yarqurir aywakurqan. Say hörapitami maqta sänuna rikakurqan.
[19] Saypita kikilankunana kaykarmi discïpulunkuna Jesústa tapuyarqan: “Noqakunaqa ¿imanirtaq say supayta qarquyta kamäpakuyashkäsu?” nir.
[20] Saymi Jesús nirqan: “Janan shonqula yärakurmi qarquyta kamäpakuyashkankisu. Rasunpami nï: Ñäbuspa murunno ichiklapis yärakuyniki kaptinqa taqay jirkata witikunanpaq niyaptikipis witikunmanmi. Manami imapis aläpa ajasu qamkunapaq kanman.
[21] [Sayno kaptinpis kayno supaykunataqa qarquyanki ayunar Tayta Diosta manakurraqmi]”.
[22] Galileacho puriykarmi discïpulunkunata Jesús nirqan: “ Runapa Surinta chikiqninkunapa makinmanmi entreganqa.
[23] Wanusiyaptinpis kimsa junaqtami kawarimunqa”. Sayno niptinmi discïpulunkuna fiyupa lakikuyarqan.
[24] Saypitanami Capernaúmman discïpulunkunawan Jesús chäyarqan. Saychömi templupaq impuestu cobraqkuna Pedruta tapur niyarqan: “Señornikiqa ¿manaku templupaq impuestuta pägan?”
[25] Sayno tapuyaptinmi Pedro nirqan: “Aw, päganmi”. Saypita wayiman Pedro yaykurir imatapis manaraq niptinmi Jesús nirqan: “¿Ima ninkitaq, Simón? Mandaq reykuna ¿pitataq impuestuta cobrayan? ¿Marka mayinkunataku o jäpa runakunataku?”
[26] Sayno tapuptinmi Pedro nirqan: “Jäpa runakunatami, taytay”. Saymi Jesús nirqan: “Sayno kaptinqa surinkuna manami pägayansu.
[27] Sayno kaptinpis cobraqkuna mana rabyakuyänanpaq qochaman aywar anzuëluwan pescäduta sarimuy. Punta kaq pescäduta sarimushqaykipa shiminchömi qellay kaykanqa. Say qellaywan ishkansipita impuestuta pägamuy”.