[1] Saypitanami Jesústa Espíritu Santu sunyaq jirkaman pusharqan diablu tentananpaq.
[2] Saycho chusku chunka (40) junaq y chusku chunka paqas ayunaskiptinmi Jesústa wanunayparaq mikanay sarikuykurqan.
[3] Saymi diablu chaykur nirqan: “Diospa Surin kaykarqa mä kay rumikunata tantaman tikrasiy”.
[4] Sayno niptinmi Jesús nirqan: “Tayta Diospa palabrancho kaynömi qelqaraykan: ‘Manami tantata mikularsu runa kawan, sinöqa Tayta Dios lapan nishqankunata cäsukurmi kawan’ ”.
[5] Saypitanami sagrädu Jerusalén markaman Jesústa diablu pusharqan. Saychönami templupa altunnin kaq puntanman ichiykasir
[6] nirqan: “Diospa Surin karqa mä kaypita tiwyarpuy. Diospa palabrancho kaynömi qelqaraykan: ‘ Angilninkunatami Tayta Dios kachamunqa rikayäshunaykipaq. Paykunami sariyäshunki chakilaykitapis rumikunacho mana takakunaykipaq’ ”.
[7] Niptinmi Jesús nirqan: “Saynöpis Tayta Diospa palabrancho kaynömi qelqaraykan: ‘Tayta Diosta ama tentankisu’ nir”.
[8] Saypitanami altunnin jirkaman diablu pushaykur maysay nacionkunata y riquëzankunata rikaskasir
[9] nirqan: “Qonqurpaykur adoramaptikiqa lapan rikashqaykikunatami qoykushayki”.
[10] Saymi Jesús nirqan: “¡Witikuy, Satanás! Tayta Diospa palabrancho kaynömi qelqaraykan: ‘Tayta Dioslatami adorayanki. Pay japalantami sirviyanki’ ”.
[11] Sayno niptinmi diablu aywakurqan. Saypitanami angilkuna chaykur Jesústa yanapäyarqan.
[12] Carcilcho Juan wichqaraykashqanta mayarmi Galileaman Jesús kutirqan.
[13] Nazaret markacho tänanpa trukanqa Capernaúm markamannami taq aywarqan. Say marka karqan Galilea qocha kuchuncho, Zabulón y Neftalí trïbu runakuna täyashqan kaqchömi.
[14] Capernaúmcho Jesús tarmi profëta Isaías kayno wilakushqanta cumplirqan:
[15] “Zabulón trïbu y Neftalí trïbu runakuna, qamkuna täyashqaykipami lamar kuchunpa y Jordán mayu wak simpanpa näni päsaykan. Mana Israel runakunapis qamkuna täyashqaykicho askaqmi täyan.
[16] Sakäpakushno kawarpis asikyayta rikaqnömi salvayäshuqnikita rikayanki. Yanawyaykaqchöno kawayaptikipis salvayäshuqnikiqa aksinömi kanqa”.
[17] Capernaúmcho tashpanmi wilakuyta qalaykur Jesús nirqan: “¡Tayta Dios mandaykashqan chämushnami! ¡Jusalikuyta wanakur Tayta Dios munashqannöna kawayay!”
[18] Galilea qocha kuchunpa aywaykashqanchömi Jesús rikarqan ishkay runakunata. Pescaq karmi redninta yakuman mashtaykäyarqan. Paykuna kayarqan Simón y wawqin Andrés. Simónpa jukaq jutinmi karqan Pedro.
[19] Paykunatami Jesús nirqan: “Qatiräyämay. Noqami yachasiyäshayki runakunatana pescayänaykipaq”.
[20] Sayno niptinmi redninkunata kachariykuyashpan Jesúswan aywayarqan.
[21] Saypita mas wakläpa aywaykäyashqanchönami rikarqan Santiagutawan wawqin Juanta. Paykunaqa taytan Zebedeuwanmi büquincho redninkunata shilpaykäyarqan. Paykunapis Jesús qayaptinmi
[22] taytanta y büquita kachaykur jukla aywayarqan.
[23] Intëru Galileapa Jesús purirmi Tayta Dios mandaykashqanpa ali wilakuyninta sinagögakunacho yachasirqan y tukuy niraq qeshyawan qeshyaqkunata aliyäsirqan.
[24] Saytami Siria nación markakunachöpis musyayarqan. Saymi paykunapis Jesús kaqman apayarqan tukuy niraq qeshyawan qeshyaykaqkunata, supay nakasishqan runakunata, wanuy qeshyawan nakaqkunata y pulan cuerpun wanush runakunatapis. Say qeshyaqkunata lapantami Jesús aliyäsirqan.
[25] Askaqmi Jesústa qatiräyarqan. Say runakuna kayarqan Galileapita, Decápolispita, Jerusalénpita, Judeapita y Jordán mayu wak simpanpitapis.