[1] Pasa waraykaptinnami mandaq cürakuna y Israel mayor runakuna wilanakuyarqan Jesústa imanöpapis wanusiyänanpaq.
[2] Wilanakuskirnami Jesústa liyarkur gobernador Pilatuman apasiyarqan.
[3] Wanusiyänanpaq kashqanta musyaykurmi Jesústa rantikuq Judas fiyupa lakikurqan. Saymi mandaq cürakuna y Israel mayor runakuna shuntakäyashqanman aywaykur chaskishqan kimsa chunka (30) qellayta kutisir
[4] nirqan: “Jusaynaq runata wanusiyänaykipaq entregar jusalikushkämi”. Sayno niptinmi niyarqan: “¡Noqakunata imata qokayäman! ¡Imanöpis kakuy!”
[5] Sayno niyaptinmi chaskishqan qellayta templuman jitapaykur aywakurqan. Nirkurnami jurkakuskirqan.
[6] Mandaq cürakunanami say qellayta shuntarkur niyarqan: “Kay qellayqa runapa yawarninpa chaninmi. Sayno kaykaptinqa manami ofrendakunaman talusishwansu”.
[7] Saymi wilanakurkur say qellaywan manka ruraq runapa chakranta rantiyarqan jäpa runakuna wanuptin sayman pampayänanpaq.
[8] Saypita pasami kananyaqpis say chakrapa jutin kaykan Yawar Pampa.
[9] Chakrata sayno rantirmi profëta Jeremías kayno qelqashqanta cumpliyarqan: “Paypa chanin ayka kananpaqpis Israel runakuna niyashqannölami kimsa chunka (30) qellayta chaskiyarqan.
[10] Say qellaywanmi Tayta Dios nimashqannöla manka ruraq runapa chakranta rantiyarqan”.
[11] Jesústa chäsiyaptinmi gobernador Pilato tapurqan: “¿Rasunpaku Israel runakunapa mandaqnin rey kanki?” nir. Saymi Jesús nirqan: “Rasun kaqtami nikanki”.
[12] Saycho mandaq cürakuna y Israel mayor runakuna Jesúspa contran imaykata jitapäyaptinpis Jesús manami imatapis parlakurqansu.
[13] Saymi Pilato tapur nirqan: “¿Manaku imatapis ninki sayjina contrayki nikäyaptin?”
[14] Sayno niptinpis Jesús manami imatapis parlakurqansu. Saymi Pilato yarpachakuyman churakarqan.
[15] Cada watami Pascuacho runakuna manakuyashqan prësuta Pilato kachariq.
[16] Say watami pïmaypis jamurashqan Barrabás jutiyuq runa prësu wichqaraykarqan.
[17] Saymi sayman shuntakäyaptinna runakunata Pilato tapurqan: “¿Mayqan prësutataq kacharinäta munayanki? ¿Barrabástaku? ¿O Cristo nishqan Jesústaku?”
[18] Pilato musyarqanmi Jesústa chikir payman prësu apayashqanta.
[19] Pilato saycho juzgar jamaraykaptinmi warmin wilakasir nirqan: “Say runa jusaynaqmi. Paywan ama jatikaysu. Payta prësu sariyashqanpita kanan paqas pasaypa mana alikunatami sueñupäkushkä”.
[20] Mandaq cürakuna y Israel mayor runakunanami isanqa runakunata shimita qoyarqan Barrabásta kacharir Jesústa wanusinanpaq.
[21] Saymi “¿mayqantataq kacharishaq?” nir Pilato yapay tapuptin runakuna niyarqan: “Barrabásta kachariyqa”.
[22] Sayno niyaptinmi Pilato nirqan: “Sayno kaptinqa Cristo nishqan Jesústa ¿imatataq rurashaq?” Niptinmi lapan niyarqan: “¡Crucificasiy!”
[23] Saymi Pilato tapurqan: “¿Imatataq jusalikush?” Sayno niptinpis runakuna masraqmi “¡crucificasiy!” niyarqan.
[24] Runakuna timpuypa timpur qayaraptinmi ima ruraytapis Pilato kamäpakurqansu. Saymi yakuta apaykasimur runakuna rikaykaptin makinta maylakur nirqan: “Kay runata wanusiyaptiki noqa manami jusayuqsu kä. Qamkuna imanöpis kakuyay”.
[25] Sayno niptinmi runakuna niyarqan: “Kay runa wanushqanpita noqakuna y wamräkunami jusayuq kayäshaq”.
[26] Sayno niyaptinmi Barrabásta Pilato kacharirqan. Jesústanami fiyupa astarkasir crucificayänanpaq soldädukunapa makinman kachaykurqan.
[27] Saypitanami soldädukuna Jesústa apayarqan Pilatupa despächunman. Sayman lapan tröpa soldädukuna juntapaykurmi
[28] Jesúspa mödananta loqtipaskir puka cäpata ayllupäyarqan.
[29] Saynöpis kashapita awash corönatami umanman jatipäyarqan. Aluq kaq makinmannami shoqushta aptapäyarqan. Nirkurmi puntanman qonqurpakuykur asipar niyarqan: “¡Alabash kasun Israel runakunapa mandaqnin rey!”
[30] Saynöpis toqapar ushayashpanmi aptaraykashqan shoqushta qechuskir umacho wiruyarqan.
[31] Sayno asiparkurmi ayllupäyashqan cäpata loqtipaskir kikinpa mödanantana jatipäyarqan. Nirkurmi crucificaq apayarqan.
[32] Crucificaq apaykäyashqanchömi tinkuyarqan Cirene nacionpita Simónwan. Paytami Jesús apaykashqan cruzta umrusiyarqan.
[33] Saypitanami Jesústa chäsiyarqan Gólgota niyashqanman. Gólgota ninanqa Calavëra Sitiu ninanmi.
[34] Saycho asqaq jachawan talush vïnuta upusiyta munayaptinpis yawarkur manami upuyta munarqansu.
[35] Jesústa crucificaykurnami suertita jitayarqan mödananta mayqanpis apakunanpaq. [Sayno rurayänanpaqmi Tayta Diospa profëtan kayno qelqarqan: “Kikinpurami mödanäta rakipänakuyarqan. Mödanäta apakuyänanpaq suertita jitayarqan”.]
[36] Nirkurnami täpaykar quëdakuyarqan.
[37] Imapita wanusiyashqantapis runakuna musyayänanpaqmi juk letrëruta cruzpa puntanman clävayarqan. Say letrërucho kaynömi qelqaraykarqan: “Kay runaqa Israel runakunapa mandaqnin rey Jesúsmi”.
[38] Jesús crucificaraykashqan nawpanmanmi ishkay suwa runakunatapis crucificayarqan, juknin kaqta aluq kaq nawpanman y jukaqtana isuq kaq nawpanman.
[39] Jesús crucificaraykaqta rikarmi saypa päsaq runakuna asipäyarqan. Umankunata awiyashpanmi
[40] niyarqan: “Templutapis juchuskasir kimsa junaqlata sharkasinaykipaq kashqanta nikarqa mä salvakuy, ari. Diospa Surin karqa mä cruzpita urämuy”.
[41] Saynölami mandaq cürakunapis, ley yachasiqkunapis, [ fariseukunapis] y Israel mayor runakunapis Jesústa asipäyashpan niyarqan:
[42] “Wakinta salvarpis kikinqa manami salvakuyta kamäpakunsu. Israel runakunapa mandaqnin rey karqa mä cruzpita urämusun. Urämuptinqa criyishunmi.
[43] Payqa ‘Tayta Diospa Surinmi kä’ nirmi Diosman yärakush. Rasunpaypa Surin kaptinqa Tayta Dios kuyapar cruzpita jorqusun”.
[44] Saynölami nawpancho crucificaraykaq suwa runakunapis ashliyarqan.
[45] Pulan junaqpita malway intiyaqmi pasa sakakurpurqan.
[46] Say hörami Jesús sinchipa nirqan: “Elí, Elí, ¿lama sabactani?” Say ninanqa kaykan “Tayta Dios, Tayta Dios, ¿imanirtaq kachariykamashkanki?” ninanmi.
[47] Sayno nishqanta wiyarmi saycho kaykaq wakin runakuna niyarqan: “Profëta Elíastami qayakuykan”.
[48] Sayno niyaptinmi juk runa ras aywar pochquq vïnuman esponjata ushmarkasir shoqushpa puntanman watarqan. Saywan Jesústa shoqusiyta munaptinmi
[49] runakuna niyarqan: “Ama shoqusiysu. Mä rikashun cruzpita jorqunanpaq Elías shamunäkush”.
[50] Saypitanami yapay sinchipa qaparaskir Jesús päsarpurqan.
[51] Say hörami templu rurincho saparaq cortïna janapita urayaq rachikäkurirqan. Pasa fiyupa suksukyaptinmi qaqakunapis shilikäkuyarqan.
[52] Sepultürakunapis kichakaptinmi Tayta Dios munashqanno kawaq runakunapis kawariyämurqan.
[53] Jesús kawariskamuptinnami pamparäyashqanpita yarqamur sagrädu Jerusalén markaman yaykuyarqan. Aska runakunami say kawarimuq runakunata rikayarqan.
[54] Jesústa täpaykaq capitán y soldädunkunapis pasa suksukyaykaqta mayar y lapan päsashqankunatapis rikarmi fiyupa mansakäyashpan niyarqan: “¡Rasunpaypami kay runaqa Diospa Surin kash!”
[55] Saychömi aska warmikuna karulapita rikaraykäyarqan. Say warmikunami Galileapita pasa Jesústa yanapar aywayarqan.
[56] Paykunawanmi kaykarqan María Magdalena, Santiagupa y Josépa maman María y Zebedeupa warminpis.
[57] Pasa sakaykaptinnami Arimateapita juk rïcu runa José jutiyuq Pilato kaqman charqan. Paypis Jesúspa discïpulunmi karqan.
[58] Chaykurmi Pilatuta manakurqan: “Jesúspa ayanta pampanäpaq kachapaykalämay” nir. Sayno manakuptinmi Pilato soldädukunata nirqan Jesúspa ayanta kachapäyänanpaq.
[59] Kachapaskiyaptinmi lïnupita rurash limpiu säbanaswan piturkur
[60] qaqacho sayraq uchkush sepultüraman pamparqan. Saypitanami jatunkaray rumiwan sepultürapa punkunta sapaykur aywakurqan.
[61] Saychömi María Magdalena y jukaq Maríapis jamaraykäyarqan.
[62] Jesús wanushqanpita waraynin jamay junaqnami mandaq cürakuna y fariseukunapis Pilato kaqman aywaykur
[63] niyarqan: “Taytay, say lulakuq runami nirqan: ‘Wanushqäpita kimsa junaqtami kawarimushaq’.
[64] Sayno nish kaykaptinqa sepultürata kimsa junaqyaq soldäduykikunawan täpaykasilay. Manasayqa discïpulunkuna Jesúspa ayanta [sakaypa] suwarkurmi runakunata criyisiyanqa wanushqanpita kawarimushqanta. Sayno lulakurqa say runa engañashqanpita peormi runakunata engañayanqa”.
[65] Sayno niyaptinmi Pilato nirqan: “Soldädukuna sepultürata täpayänanpaq pushayay”.
[66] Sayno niptinmi aywaykur sepultüra saparaykaq rumita sëllayarqan pipis kichaptin musyakänanpaq. Nirkurnami soldädukunata täpayänanpaq kachaykuyarqan.