[1] Saypitanami fariseukuna y ley yachasiqkuna Jerusalénpita chaykur Jesústa tapur niyarqan:
[2] “¿Imanirtaq discïpuluykikuna unay ayllunsikunapa costumbrinkunata mana cumpliyashpan mikuyänanpaq makinkunata awikuyansu?”
[3] Sayno niyaptinmi Jesús nirqan: “Qamkunapis ¿imanirtaq Tayta Diospa mandamientunta cumpliyänaykipa trukan costumbrikikunata mas cumpliykäyanki?
[4] Tayta Diospa mandamientun kaynömi nikan: ‘Mamaykitapis taytaykitapis ali rikanki’. Saynöpis nikan: ‘Pipis mamanta o taytanta mana respitaq kaqqa wanusish kasun’.
[5] “Sayno nikaptinmi qamkunaqa kayno nir yachaykäsiyanki: ‘Imaykipis Tayta Dioslapaq kashqanta nikarqa mamaykita ni taytaykita yanapäyänaykipaq manami yatayankimannasu’.
[6] Mamanta y taytanta manana yanapäyänanpaq yachasirqa Tayta Diospa palabranta manakaqmanmi churaykäyanki.
[7] ¡Ishkay cära runakuna! Rasuntachir Isaías qamkunapaq kayno qelqarqan:
[8] “ ‘Kay runakunaqa shimilanmi respitamaq tukuyan. Shonqunkunachöqa manami yarpaylapis yarpäyämansu.
[9] Nishqäta yachasiyänanpa trukanqa runakuna niyashlantami yachasiyan. Saymi manakaqlapaq adorayämanpis’ ”.
[10] Sayno nirkushpanmi runakunata qayaykur Jesús nirqan: “Kay nishqäkunata shumaq tantiyakuyay.
[11] Manami imatapis mikushqanpitasu pipis impüru rikakun, saypa trukanqa lutankunata parlashqanpitami”.
[12] Saymi discïpulunkuna Jesústa niyarqan: “¿Tantiyankiku sayno niptiki fariseukuna rabyakuyashqanta?”
[13] Sayno niyaptinmi Jesús nirqan: “Jana pasacho kaykaq Taytä mana plantashqan jacha karmi paykunaqa chakrapita lukirish kayanqa.
[14] Paykunata ama cäsupäyaysu. Paykunaqa qaprapura pushanakuqnömi kaykäyan. Qaprapura pushanakurqa ishkanmi pözuman jeqakurpuyanqa”.
[15] Sayno niptinmi Pedro nirqan: “Mikuyman tinkusiypa yachasishqaykita tantiyaykasiyälämay, taytay”.
[16] Saymi Jesús nirqan: “¿Qamkunapis manaku tantiyayankiraq?
[17] Manami mikuyta mikushqanpitasu runa impüru rikakun. Mikushqanqa pachanpita pillu pillunpami päsakun.
[18] Shonquncho mana alita yarpashqanta parlarmi isanqa impüru rikakun.
[19] Runakunaqa shonquncho mana alikunata yarparmi runa mayinta wanusiyan, majanta jarukuyan y fornicación jusata jusalikuyan. Saynöpis suwakuyan, lulakuyan y runa mayinta ashliyan.
[20] Saykunata rurarmi runaqa impüru rikakun. Manami makinta mana awikuylapa mikursu impüru rikakun, sinöqa shonquncho mana alikunata yarparmi”.
[21] Saypitanami Jesús aywarqan Tiro y Sidón markakunaläpa.
[22] Say markakunachömi cananeo niyashqan mana Israel runakuna täyan. Saymi juk cananea warmi Jesús kaqman aywaykur sinchipa ruwakurqan: “¡ Davidpa Surin Jesús, kuyapaykalämay! Warmi wawätami supay löcayäsir fiyupa nakaykäsin” nir.
[23] Sayno niptin Jesús manami imatapis parlakurqansu. Saymi discïpulunkuna Jesústa niyarqan: “Pasaypa qapararmi taqay warmi qatiraykämansi. Aywakunanpaq niykulay, taytay”.
[24] Sayno niyaptinmi say warmita Jesús nirqan: “Oqrakash uyshano kaykaq Israel runakunalamanmi Tayta Dios kachamash”.
[25] Sayno niptinmi Jesúspa puntanman qonqurpakuykur say warmi nirqan: “¡Yanapaykalämay ari, taytay!”
[26] Sayno ruwakuptinmi Jesús nirqan: “Qamta yanaparqa wamrakunapa tantanta qechurir alqukunata jitapaykuqnömi käman”.
[27] Sayno niptinmi warmi nirqan: “Aw, taytay. Isanqa mësapita shikwapakuyashqantami alqukunapis mikuyan”.
[28] Saymi Jesús nirqan: “Rasunpaypami yärakamanki. Ruwakamashqaykinömi kanqa”. Say hörami say warmipa wawan aliyarqan.
[29] Saypita aywakurnami Galilea qocha kuchunpa Jesús päsarqan. Nirkurnami juk lömaman wisarkur saycho jamakurqan.
[30] Saymanmi aska runakuna chäsiyarqan weqrukunata, qaprakunata, makllukunata, parlayta mana puëdiqkunata y wakin qeshyawan qeshyaykaqkunatapis. Saychömi lapan qeshyaqkunata Jesús aliyäsirqan.
[31] Saymi runakuna fiyupa kushikuyarqan upakuna parlaykäyaqta wiyar, makllukuna aliyashna kaykäyaqta rikar, weqrukuna puriykäyaqta rikar y qaprakuna rikaykäyaqta rikar. Sayno kushikurmi Tayta Diosta alabayarqan.
[32] Saypitanami discïpulunkunata qayaykur Jesús nirqan: “Kay runakunata pasaypami kuyapä. Kimsa junaqnami mikuytapis mana yawaypa noqansiwan kaykäyan. Mikünilata aywakuyänanpaq niptïqa wayinkunamanpis manaraq charchir malaqaywan aywapakäyanqa”.
[33] Sayno niptinmi discïpulunkuna niyarqan: “Kay sunyaq jirkachöqa ¿maychöraq mikuyta tariykushun kaysika runakunapaq?”
[34] Niyaptinmi Jesús tapurqan: “¿Aykalataq tantayki kaykan?” “Qanchis tantawan juk ishkay pescädulami kaykan, taytay” niyarqan.
[35] Sayno niyaptinmi runakuna jamakuyänanpaq Jesús nirqan.
[36] Jamaykuyaptinnami pescäduta y qanchis tantata aptarkur Tayta Diosta manakur päkilä nirqan. Nirkurnami tantata pakirir discïpulunkunata makyarqan aypukuyänanpaq.
[37] Saymi lapan mikuyarqan pacha junta. Pusushqankunatanami discïpulunkuna shuntayarqan qanchis canasta juntata.
[38] Saycho mikuqkuna kayarqan chusku waranqano (4,000), warmikunata y wamrakunata mana yupaylapa.
[39] Runakunata despachaskirnami büquiman wisarkur discïpulunkunawan Magdala partiman Jesús aywakuyarqan.