[1] Herodes rey kashqan wisanmi Judea provinciacho kaykaq Belén markacho Jesús yurirqan. Yuriykuptinmi qoyllar estudiaq runakuna inti jeqamunan kaqläpita Jerusalénman chaykur
[2] tapukuyarqan: “¿Maychötaq Israel runakunapa mandaqnin rey kananpaq yuriq iti kaykan? Qoyllarnin jeqamuqta rikarmi payta adoraq shayämushkä”.
[3] Sayta wiyaykurmi rey Herodes y Jerusaléncho taq runakunapis pasaypa yarpachakuyman churakäyarqan.
[4] Saymi mandaq cürakunata y ley yachasiqkunata qayaykasir Herodes tapur nirqan: “Salvamaqninsi Cristo ¿maycho yurinanpaqtaq kaykan?”
[5] Sayno tapuptinmi niyarqan: “Judea provinciacho kaykaq Belén markachömi, taytay. Saycho yurinanpaqmi Tayta Diospa profëtan kayno qelqarqan:
[6] “ ‘Belén marka, Judácho kaq wakin markakunapita mas takshala kaptikipis qamchömi Israel runakunapa mandaqnin rey yurinqa. Paymi Israel runakunata uysha misiq japuy rikanqa’ ”.
[7] Sayta wiyaykurmi qoyllar estudiaqkunata pakaylapa Herodes qayasirqan. Chaykuyaptinmi say qoyllarta imaypitana rikayashqantapis tapurqan.
[8] Wilayaptinmi Herodes nirqan: “Belénman aywaykur say wamrata ashiyämuy. Tariykurqa wilayämanki noqapis adoraq aywanäpaq”.
[9] Belénman aywaykäyaptinmi say rikayashqan qoyllarpis paykunapa puntanta aywarqan. Wamra kaykashqan kaq wayi derëchunman chaykurnami qoyllar ichikuykurqan.
[10] Sayta rikarmi fiyupa kushikuyarqan.
[11] Wayiman yaykuyashpanmi wamratawan maman Maríata tariyarqan. Saymi wamrapa puntanman qonqurpakuykur adorayarqan. Nirkurnami apayashqan qorita, inciensuta y mïrratapis qarayarqan.
[12] Herodes kaqman manana kutiyänanpaq Tayta Dios sueñuynincho revelaptinmi juk nänipana markanman kutikuyarqan.
[13] Qoyllar estudiaqkuna aywakuyaptinnami Joséta sueñuynincho Tayta Diospa angilnin nirqan: “Herodesmi wamrata wanusinanpaq ashisinqa. Kanan höra sharkur wamrata mamantinta Egiptuman qeshpisiy. Saycho täyämunki yapay wilashqäyaq”.
[14] Saymi jinan höra rikcharkamur pasa manaraq waraptin wamrata mamantinta apakurkur Egiptuman aywayarqan.
[15] Saychömi Herodes wanushqanyaq täyarqan. Saynöpami Tayta Diospa profëtan kayno qelqashqanta cumpliyarqan: “Surï kaptinmi Egiptupita qayamurqä”.
[16] Qoyllar estudiaqkuna wilaq mana kutiykuyaptinmi rey Herodes fiyupa rabyakurqan. Saymi soldädunkunata kacharqan Belén markacho y nawpan estanciakunachöpis olqu wamrakunata wanusiyänanpaq. Qoyllarta imay rikayashqantapis wilapäyashqanpita cuenta jorqurirmi wamrakunata wanusiyarqan sayraq yurishpita ishkay watayuqyaq.
[17] Sayno wanusirmi profëta Jeremías kayno qelqashqanta cumpliyarqan.
[18] “Ramá markacho lakikur ataypa atar waqashqanmi wiyakaykämun. Sayqa Raquel waqashqanmi kaykan. Wawankuna wanush kaptinmi shoqayaptinpis mana chawaypa waqaykan”.
[19] Herodes wanuykuptinnami Egiptucho José kaykaptin Tayta Diospa angilnin sueñuynincho
[20] nirqan: “Wamrata mamantinta apakurkur Israelpa kutikuyay. Wamrata wanusiyta munaqkuna wanuyashnami”.
[21] Sayno niptinmi wamrata mamantinta apakurkur Israelman kutikuyarqan.
[22] Kutiykäyashqanchömi José musyarqan Judeacho rey Herodespa trukan surin Arquelao mandaq kaykashqanta. Sayta musyaykurmi Judeaman kutiyta mansarirqan. Saymi sueñuynincho Tayta Dios wilaptin Galileamanna aywakuyarqan.
[23] Saynöpami Nazaret markaman taq aywakuyarqan. Saycho tarmi Tayta Diospa profëtankuna kayno niyashqanta cumpliyarqan: “Nazareno kashqantami runakuna niyanqa”.