[1] Jamay junaqchömi discïpulunkunawan Jesús päsaykäyarqan trïgu poquraykaq chakrakunapa. Saypa päsarmi discïpulunkuna mikanäyashpan trïguta palar uchuyarqan.
[2] Sayta rikarmi fariseukuna niyarqan: “Rikay. Discïpuluykikuna leyninsita mana cäsukuypami jamay junaq kaykaptin trïguta palaykäyan”.
[3] Saymi Jesús nirqan: “¿Manaku imaypis liyiyashkanki yanapaqninkunawan mikanar David imata rurashqantapis?
[4] Davidshi Tayta Diospa wayinman yaykur Diospaq churayashqan tantata mikunaq. Say tanta manami David ni paywan kaykaq runakuna mikuyänanpaqsu karqan, saypa trukanqa cürakunala mikuyänanpaqmi.
[5] Saynöpis Moisés qelqashqan leykunacho nikan cürakuna templucho jamay junaq arurpis jusayuq mana kayashqantami. Saytapis ¿manaku liyiyashkanki?
[6] Saymi qamkunata nï: Noqami templupitapis mas munayyuq kaykä.
[7] “Tayta Diospa palabrancho kaynömi nikan: ‘Sacrificiuta rupasiyashqaykipitapis mas munä kuyapäkuq kayänaykitami’. Sayta tantiyakurqa manami discïpulükunata jamurpaykäyankimansu.
[8] Runapa Surinqa jamay junaqpaqpis munayyuqmi kaykan”.
[9] Saypita aywarmi sinagögaman Jesús yaykurqan.
[10] Saychömi makin wanush runapis kaykarqan. Saymi Jesústa tapur niyarqan: “Jamay junaqcho qeshyaykaqta ¿aliyäsishwanku o manaku?” Sayno tapuyarqan aliyäsiptinqa say achäquila Jesúspa contran sharkuyänanpaqmi.
[11] Saymi Jesús nirqan: “Mayqaykipapis uyshayki pözuman jeqaptin jamay junaq kaykaptinpis ¿manaku jinan höra jorquq aywayanki?
[12] Uyshapitapis masmi runa välin. Sayno kaykaptinqa jamay junaqchöpis runa mayinsita aliyäsishwanmi”.
[13] Nirkurmi makin wanush runata nirqan: “¡Makikita joqariy!” Joqarkuptinmi jukaq makinno alina rikakurqan.
[14] Saypitanami fariseukuna yarquriyashpan Jesústa wanusiyänanpaq wilanakuyarqan.
[15] Sayno wilanakuyashqanta musyaykurmi say markapita Jesús aywakurqan. Aywakuptinmi aska runakuna qepanpa aywayarqan. Qeshyaq kaqtaqa lapantami Jesús aliyäsirqan.
[16] Aliyarkasirmi Jesús nirqan: “Pitapis ama wilapäyankisu noqa aliyäsishqäta”.
[17] Saynöpami profëta Isaías kayno qelqashqanta Jesús cumplirqan:
[18] “Sirvimaqnï imano kashqantapis tantiyakuyay. Paytami akrashkä. Paytami kuyä. Paypitami fiyupa kushikü. Espïritütami payman kachamushaq. Paymi maysay nación runakuna munashqäno kawayänanpaq wilakunqa.
[19] Payqa manami olqutupanqasu ni qayapanqasu. Cällikunachöpis manami wajukur purinqasu.
[20] Laksish shoqushtapis manami pakirinqasu. Upinaykaq aksitapis manami upirasinqasu. Payqa lapantapis alimi juzganqa.
[21] Juklä nacioncho taqkunapis paymanmi yärakuyanqa”.
[22] Saypitanami supay qaprayäsishqan y upayäsishqan runata Jesús kaqman pushayarqan. Say runami Jesús aliyäsiptin rikarqanna y parlarqanna.
[23] Sayta rikarmi runakuna kushikuyashpan niyarqan: “¿Kay runaqa Davidpa Surinsuraq kaykan?”
[24] Sayno niyashqanta wiyarmi fariseukuna niyarqan: “Kay runaqa supaykunapa mandaqnin Beelzebúpa munayninwanmi supaykunata qarquykan”.
[25] Paykuna yarpäyashqanta musyarmi Jesús nirqan: “Juk nacioncho runakuna kikinkunapura chikinakurqa ¿manasuraq wanusinakur ushakäyanman? Saynöpis juk markacho taqkunapis o juk wayicho taqkunapis chikinakurqa ¿manasuraq wakpa kaypa aywakur ushakäyanman?
[26] Saynölami Satanáspis kikinpa contran sharkurqa rakikash kayanqa. Sayno kaptinqa mandaykashqanpis ushakanqami.
[27] “Beelzebúpa munayninwan supaykunata qarquptïqa ¿pipa munayninwantaq discïpuluykikunaqa supaykunata qarquyan? Diospa munayninwan supaykunata qarquyashqanta tantiyaykarqa ¿imanirtaq tantiyayankisu noqapis Diospa munayninwan qarqushqäta?
[28] Diospa Espïritunwan supaykunata qarquptïmi Tayta Dios mandaykashqan qamkunaman chämushqanta musyayanki”.
[29] “Kalpayuq runata manaraq pankarqa manami pipis wayinman yaykur imankunatapis apakunmansu. Pankaykurmi isanqa imankunatapis apakunman.
[30] “Pipis favornï mana karqa chikiykämanmi. Mana shuntäsimaq kaqqa mashiykanmi.
[31] Saymi qamkunata nï: Runakuna jusalikuyashqanta y Diospa contran parlayashqantapis Tayta Dios perdonanqami. Espíritu Santupa contran parlayashqantami isanqa perdonanqasu.
[32] Runapa Surinpa contran parlayaptinqa perdonanqami. Espíritu Santupa contran parlayaptinmi isanqa kay vïdachöpis ni juk vïdachöpis perdonanqasu.
[33] “Ali jachaqa alitami wayun. Mana ali jachami isanqa mana alita wayun. Wayuyninpami jachata reqinsi.
[34] ¡Culebra casta runakuna! Fiyu runa kaykarqa ¿imanöpashi alita parlaykuyankiman? Runaqa shonqun yarpashqantami alitapis o mana alitapis parlan.
[35] Ali runaqa shonqun alita yarpashqantami parlan y fiyu runaqa shonqun mana alita yarpashqantami parlan.
[36] Saymi qamkunata nï: Imatapis lutankunata parlayashqanpitami Tayta Dios juiciu finalcho juzganqa.
[37] Alita parlaqtaqa salvanqami. Lutankunata parlaqtami isanqa infiernuman qaykunqa”.
[38] Sayno niptinmi wakin fariseukuna y ley yachasiqkuna Jesústa niyarqan: “ Rabí, Tayta Dios rasunpaypa kachamushushqaykita musyayänäpaq ima milagrutapis ruraykulay”.
[39] Saymi Jesús nirqan: “¡Mana wiyakuq jusasapa runakuna! Milagruta ruranäta munayaptikipis manami ima milagrutapis rurashaqsu. Saypa trukanqa profëta Jonásta salvar milagruta rurashqannömi Tayta Dios juk milagruta ruranqa.
[40] Kimsa junaq kimsa paqas jatunkaray pescädupa pachancho Jonás kashqannömi Runapa Surinpis kimsa junaq kimsa paqas pamparanqa.
[41] “Jonás wilakushqanta chaskikurmi Nínive runakuna jusalikuyta wanakuyarqan. Kananqa Jonáspita mas munayyuq kaqmi wilapaykäyäshunki. Saymi juiciu finalcho Nínive runakuna sharkarkamur kanan wisan runakunata acusayanqa”.
[42] “Salomón yachasishqanta wiyananpaqmi mandaq reinapis sur kaqlä karu nacionpita shamurqan. Kananqa Salomónpita mas yachaq kaqmi wilapaykäyäshunki. Saymi juiciu finalcho say reina sharkarkamur kanan wisan runakunata acusanqa.
[43] “Runapita supay yarqurmi maychöpis tänanpaq ashir sunyaq jirkakunapa purin. Mana tariykurmi
[44] nin: ‘Yarqamushqä wayïman kutikushaq’. Kutishpanmi tarin pisapakush y churapakush jäkuraykaqta.
[45] Saynöta tariykurmi supay mayinkunaman aywar paypita mas fiyu qanchis supaykunata pushakurkur say tashqanman kutin. Saymi nawpata kashqanpitapis peorraq say runa rikakun. Saynömi päsanqa kanan wisan yaqa runakunatapis”.
[46] Jesús sayno yachaykäsiptinmi paywan parlayta munar maman y wawqinkuna punkucho shuyaraykäyarqan.
[47] Saymi juk runa Jesústa wilarqan: “Mamaykiwan wawqikikunami punkucho shuyaraykäyäshunki” nir.
[48] Sayno wilaptinmi Jesús nirqan: “Kanan wilayäshayki mamä y wawqïkuna pï kayashqantapis”.
[49] Sayno nirmi discïpulunkuna kaqläpa toqiykur nirqan: “Paykunami mamä y wawqïkuna kaykäyan.
[50] Pipis jana pasacho kaykaq Taytä munashqanno kawaq kaqmi wawqï, panï y mamä kaykan”.