[1] Tishyayparaq runakuna shuntakäyaqta rikarmi lömaman wisarkur Jesús jamakurqan. Nawpanman discïpulunkuna shuntakäyaptinmi
[2] yachasir nirqan:
[3] “Kushishqami kawayanqa Tayta Diosta nistaqkuna. Paykunapaqmi Tayta Dios mandaykashqan kaykan.
[4] “Kushishqami kawayanqa lakikur waqaqkuna. Paykunatami Tayta Dios shoqanqa.
[5] “Kushishqami kawayanqa ali shonquyuqkuna. Paykunami herencian kananpaq mushuq pasata chaskiyanqa.
[6] “Kushishqami kawayanqa mikanaypanöraq y yakunaypanöraq Tayta Dios munashqanno kawayta munaqkuna. Paykunatami Tayta Dios yanapanqa.
[7] “Kushishqami kawayanqa runa mayinta kuyapaqkuna. Paykunatami Tayta Dios kuyapanqa.
[8] “Kushishqami kawayanqa shonqunkunacho imaypis alilata yarpaqkuna. Paykunami Tayta Diosta rikayanqa.
[9] “Kushishqami kawayanqa runa mayinta amistasiqkuna. Paykunatami Tayta Dios ‘wamrämi kanki’ ninqa.
[10] “Kushishqami kawayanqa Tayta Dios munashqanno kawayashqanpita runakuna nakasiyaptin. Paykunapaqmi Tayta Dios mandaykashqan kanqa.
[11] “Kushishqami kawayanki noqata chaskikayämashqaykipita runakuna ashliyäshuptiki, nakasiyäshuptiki y lulakur imaykata jitapäyäshuptikipis.
[12] Sayno kaptinpis kushikuyay. Qamkunata gloriacho maynami premiuta Tayta Dios shuyaraykäsiyäshunki. Qamkunata chikiyäshushqaykinölami unay runakunapis Tayta Diospa profëtankunata chikiyarqan.
[13] “Qamkuna kay pasacho kachinömi kaykäyanki. Kachi qamyakäkurmi isanqa imapaqpis välinnasu. Say kachita jitariptin pïmaypis jarukunmi.
[14] “Kay pasacho aksinömi kaykäyanki. Alayrinnincho kaykaq markata pïmaypis rikayashqannömi imano kawayashqaykitapis rikaykäyäshunki.
[15] Manami pipis aksita sarirkasir cajón rurinman churansu, saypa trukanqa wayicho lapanta asikyapänanpaqmi alayrinninman churan.
[16] Saynöla qamkunapis runakuna rikakuyäshunaykipaq sakaycho asikyaqno alikunata rurayay. Sayno kawayashqaykita rikakurmi jana pasacho kaykaq Taytaykita alabayanqa.
[17] “Ama yarpäyaysu Moisés qelqashqan leykunata y profëtakuna qelqayashqankunata manakaqman churanäpaq shamushqäta. Manami manakaqman churanäpaqsu shamushkä, saypa trukanqa paykuna qelqayashqankuna noqacho cumplikänanpaqmi.
[18] Rasunpami nï: Jana pasapis ni kay pasapis manaraq ushakaptinqa manami ni juk letralapis Diospa leyninpita elaqanqasu. Saycho qelqaraqkuna lapanmi cumplikanqa.
[19] “Pipis kay mandamientukunata juklaylatapis mana cäsukur y wakin runatapis mana cäsukuyänanpaq shimita jatiparqa Tayta Dios mandaykashqancho manami ima premiutapis chaskinqasu. Lapan kay mandamientukunata cäsukur y wakin runatapis cäsukunanpaq yachasirmi isanqa Tayta Dios mandaykashqancho premiuta chaskinqa.
[20] Noqa kaynömi nï: Fariseukunapitapis y ley yachasiqkunapitapis mas shumaq mana kawarqa manami Tayta Dios mandaykashqanman yaykuyankisu.
[21] “Qamkuna musyayankimi unay runakunata kayno nishqanta: ‘Runa mayikita ama wanusinkisu. Wanusiq kaqqa juzgashqami kanqa’.
[22] Sayno niptinpis noqa nï: Pipis runa mayinta rabyaparqa jusayuqmi kanqa. Saynöpis runa mayinta ashlirqa juzgashqami kanqa. Runa mayinta manakaqman churarqa infiernuman qaykushqami kanqa.
[23] “Sayno kaykaptinqa altarman ofrendaykikunata churayänaykipaq kaykäyashqaykicho runa mayikiwan ajanäsinakush kayashqaykita yarparqa
[24] altar nawpanman ofrendaykikunata kachaykur jinan höra ajanäsinakuyashqaykiwan reconciliakuq aywayay. Nirkurraq kutiykur Tayta Diospaq ofrendaykita churayanki.
[25] “Pipis quejakushuptiki autoridäman manaraq char jukla arreglayay. Mana arreglayaptikiqa juezmanmi apasiyäshunki. Jueznami wardiakunawan carcilman wichqasiyäshunki.
[26] Rasunpami nï: Saypita manami yarquyankisu lapan jaqan kayashqaykita manaraq pägapakurqa.
[27] “Qamkuna musyayankimi Moisés qelqashqancho kayno nishqanta: ‘Majaykita ama jarukunkisu’.
[28] Sayno niptinpis noqa nï: Juk warmita munaparqa maynami majaykita jarukuqno kaykäyanki.
[29] “Sayno kaptinqa aluq kaq nawikikuna jusalikasiyäshuptikiqa say nawikita jorqurir jitariykuyay. Infiernuman qaykush kayänaykipa trukanqa mas alimi kanman wiskulapis kayaptiki.
[30] Aluq kaq makikikuna jusalikasiyäshuptikiqa say makikita kusurir jitariykuyay. Infiernuman qaykush kayänaykipa trukanqa mas alimi kanman juk makiyuqlapis kayaptiki.
[31] “Saynöpis Moisés qelqashqan leykunacho kaynömi nikan: ‘Pipis warminwan rakikar imarqa papilta firmapäsun’.
[32] Sayno niptinpis noqa nï: Mayqan runapis warmin mana jarukuykaptin juk warmiwan tarqa jusayuqmi kaykan warmin juk runawan tar adulteriucho kananpaq. Saynölami runanpita rakikash warmiwan taq runapis adulteriucho kaykan.
[33] “Saynöpis qamkuna musyayankimi unay runakunata kayno nishqanta: ‘Mana cumpliyänaykipaqqa ama jurayankisu. Jurarqa mana qonqaylapa cumpliyanki’.
[34] Sayno niptinpis noqa nï: Ni ima nilarpis ama jurayankisu. Sayno kaykaptinqa ama jurayankisu ‘jana pasapaq’ nirpis. Jana pasaqa Tayta Diospa trönunmi kaykan.
[35] Ama jurayankisu ‘pasapaq’ nirpis. Kay pasaqa Tayta Diospa chakin jaruräkunanmi kaykan. Ama jurayankisu ‘Jerusalénpaq’ nirpis. Jerusalénqa lapanpaq munayyuq Rey tashqan markami kaykan.
[36] Ama jurayankisu ‘umäpaq’ nirpis. Manami munayyuqsu kayanki aqsaykita yuraqman ni yanaman tikrasiyänaykipaqpis.
[37] Awnirqa awniyanki, y mana cumpliyänayki kaptinqa ama awniyankisu. Jurayparaq awnirqa Satanás munashqannömi parlaykäyanki.
[38] “Musyankimi Moisés qelqashqan leykunacho kayno nishqanta: ‘Nawinta jorquptinqa kikinpa nawintapis jorqusun. Kirunta jorquptinqa kikinpa kiruntapis jorqusun’.
[39] Sayno niptinpis noqa nï: Chikishuptikipis ama nanaparaysu. Laqyayäshuptikipis jukaq qaqlaykita kamapäyanki.
[40] Pipis demandashushpayki camïsaykita qechuyäshuptikiqa punchuykitapis kachapariykuyanki.
[41] Qepinta juk lëwayaq apapäyänaykipaq obligayäshuptikiqa ishkay lëwayaqpis apapariyanki.
[42] Imatapis ‘qaraykalämay’ nir manakuyäshuptikiqa qaraykuyanki. Saynöla imatapis ‘manaykalämay’ niyäshuptikiqa manaykuyanki.
[43] “Saynöpis musyayankimi runakuna kayno niyashqanta: ‘Kuyanakuyashqaykiwanqa kuyanakuyanki. Chikishuqnikitaqa chikiyanki’.
[44] Sayno niyaptinpis noqa nï: Chikishuqnikikunata kuyayanki. [Ashliyäshuptikipis ali shimilaykipa parlapäyanki. Mana ali rikayäshuptikipis ali rikayanki. Manakaqman churayäshuptikipis y] nakasiyäshuptikipis paykunapaq Tayta Diosta manakuyanki.
[45] Tayta Diosqa ali runakunapaq y mana ali runakunapaqpis intita jeqasimunmi. Saynölami ali runakunapaq y mana ali runakunapaqpis tamyasimun. Jana pasacho kaykaq Taytayki kuyapäkuq kashqanno qamkunapis kuyapäkuq karqa paypa wamranmi kaykäyanki.
[46] “Kuyanakuyashlaykiwan kuyanakurqa ama yarpäyaysu ali runa kayashqaykita. Impuestu cobraq runakunapis kuyanakuyashlanwanqa kuyanakuyanmi.
[47] Kiruyki tinkushlanwan ali kawarqa ¿ima alitataq ruraykäyanki? Jusasapa runakunapis saynölaqa kawayanmi.
[48] Jana pasacho kaykaq Taytayki jusaynaq kashqanno qamkunapis jusaynaq kayay.