[1] Say junaqlami wayipita yarqurir Jesús aywarqan Galilea qocha kuchunman. Chaykurmi yachasinanpaq jamakurqan.
[2] Saymanmi aska runakuna shuntakäyarqan yachasishqanta wiyayta munar. Aläpa kichkipäyaptinnami qocha kuchuncho kaykaq büquiman wisarkur Jesús jamakurqan.
[3] Saypitanami imamanpis tinkusiypa aska yachasikuykunata yachasir nirqan: “Juk runashi trïgu muruq aywanaq.
[4] Muruta shikaptinshi näniman wakin shikwanaq. Saytashi pishqukuna shamur upshakurkuyänaq.
[5] Wakin kaq murushi shalaman shikwanaq. Saycho alpa mana kaptinshi ras jeqamurpis
[6] jaqwäkuyta mana kamäpakur shanaywan sakikäkunaq.
[7] Wakin kaq murushi kashakuna chawpinman shikwanaq. Jeqamurpis kashakuna nitiptinshi qarwashtaykälar wanunaq.
[8] Wakin kaq murunashi isanqa ali alpaman shikwanaq. Saycho ali winamurshi ali espïgayuq kayänaq. Wakin espïgashi pachak (100) trïguta wayunaq, wakin espïgashi soqta chunka (60) trïguta wayunaq y wakinnashi kimsa chunka (30) trïguta wayunaq.
[9] Rinriyuq kaqkunaqa nishqäkunata wiyakuyäsun”.
[10] Saypitanami discïpulunkuna Jesústa tapuyarqan: “Taytay, tantiyaykasilämay tinkusiypa imanir yachasishqaykitapis”.
[11] Saymi Jesús nirqan: “Qamkunataqa Tayta Dios mandaykashqan imano kashqantapis shumaqmi tantiyasiyäshayki. Wakinkunataqa manami tantiyasishaqsu.
[12] Yachasishqäta cäsukuqkunaqa masmi tantiyakuyanqa. Mana cäsukuqkunami isanqa ichiklata tantiyayashlantapis qonqaykuyanqa.
[13] Saymi imamanpis tinkusiypa wilapaykä. Paykunaqa rikaykarpis manami cuentata qokuyansu y wiyaykarpis manami tantiyayansu.
[14] Sayno kananpaq kashqanta musyarmi profëta Isaías kayno qelqarqan: “Mayjina wiyayashpaykipis manami tantiyayankisu. Mayjina rikayashpaykipis manami cuentata qokuyankisu.
[15] Say runakunapa shonqunkuna chukruyashqami. Rinrinkunapis upayashqami. Nawinkunapis qaprayashqami. Sayno karmi rikayansu, wiyayansu, tantiyakuyansu ni wanakuyansu. Sayno kayaptinmi noqapis aliyäsishaqsu.
[16] “Qamkunatami isanqa Tayta Dios yanapaykäyäshunki rikayashqaykita y wiyayashqaykita tantiyakuyänaykipaq.
[17] Rasunpami nï: Unay profëtakunapis y Tayta Dios munashqanno kawaq runakunapis rikayashqaykita rikayta munarpis manami rikayarqansu. Wiyayashqaykita wiyayta munarpis manami wiyayarqansu.
[18] “Kanan tantiyasiyäshayki murupakuq runaman tinkusiypa yachasishqäta.
[19] Trïgu muruqa Tayta Dios mandaykashqanpa wilakuyninmi kaykan. Wakin runakunaqa chukru näninömi kaykan. Saymi Tayta Diospa wilakuyninta wiyarpis mana chaskikuyaptin Satanás shamur wiyayashlantapis qonqaykasin.
[20] “Wakin runakunaqa shalanömi kaykäyan. Paykunaqa Diospa wilakuyninta wiyar kushishqami chaskikuyan.
[21] Kushish chaskikurpis jaqwäkuyta mana kamäpakuq trïgunömi kaykäyan. Saymi Diospa palabranta chaskikuyashqanpita runakuna chikiyaptin qepaman kutikuyan.
[22] “Wakin runakunaqa kasha kasha chakranömi kaykäyan. Paykunaqa Diospa wilakuyninta wiyarpis kay vïdacho imaykankunapaqpis lakikur y rïcu kanalanpaq yarpachakurmi Diospa wilakuyninta qonqaykur mana wayuq trïguno kaykäyan.
[23] “Wakin runakunami isanqa ali alpano kaykäyan. Paykunaqa Tayta Diospa wilakuyninta chaskikurmi Tayta Dios munashqanno kawayan. Saymi ali alpacho juk murulapita juk pachak (100) trïgu o soqta chunka (60) trïgu o kimsa chunka (30) trïgu wayushqanno kaykäyan”.
[24] Saypitanami tinkusiypa yapay yachasir Jesús nirqan: “Tayta Dios mandaykashqan imano kashqantapis tinkusiypa yachasiyäshayki. Juk runashi chakrancho trïguta murunaq.
[25] Murupakuyta ushaskiptinnashi chikiqnin runa sakaypa aywaykur trïgu murushqan jananman ballicuta shikanaq.
[26] Trïgu winamur shikshiyta qalaykuptinshi ballicupis reqilapa kaykänaq.
[27] “Sayshi ashmayninkuna aywaykur patronninta niyänaq: ‘Taytay, akraylata muruykaptikiqa ¿maypitaraq ballicu winamush?’
[28] “Sayno wilayaptinshi ninaq: ‘Mayqanpis chikipämaqnïmi sayta shikapämash’. “Sayno niptinshi ashmaykuna tapur niyänaq: ‘¿Munankiku say ballicuta lukiyänäta?’
[29] “Niyaptinshi ninaq: ‘Ama lukiyaysu. Ballicuta lukirqa trïgutapis lukiyankimi.
[30] Jina cosëchayaq saycho winakusun. Cosëchachönami achuqkunata nishaq: “Puntata ballicuta shuntar wankuyay rupasinansipaq. Trïguta isanqa shuntarkur mikuy churakunäman pirwayay” ’ ”.
[31] Mastapis tinkusiypa yachasirmi Jesús nirqan: “Tayta Dios mandaykashqanqa ñäbus muruta juk runa chakranman murushqannömi kaykan.
[32] Lapan murupita mas ichiknayla kaykarpis winamurqa wakin qewakunapitapis mas jatunmi winan. Saymi rämankunacho pishqukunapis qeshunkunata rurayan”.
[33] Tinkusiypa yapay yachasirmi Jesús nirqan: “Tayta Dios mandaykashqanqa levadüranömi kaykan. Tantata rurananpaq ishkay arröbano jarinaman levadürata winaptin mäsa shumaqmi jakan”.
[34] Saynömi Jesús imamanpis tinkusiypa runakunata yachasirqan. Imamanpis mana tinkusiypaqa manami imaypis yachasirqansu.
[35] Sayno yachasirqan Tayta Diospa profëtan kayno nishqanta cumplinanpaqmi: “Imamanpis tinkusiypami yachasiyäshayki. Kay pasata kamashqanpita pasa pipis mana tantiyashqankunatami wilakushaq”.
[36] Saypitanami runakunata despachaskir juk wayiman Jesús yaykurqan. Saychömi discïpulunkuna ruwakuyarqan ballicuman tinkusiypa yachasishqanta tantiyasinanpaq.
[37] Saymi Jesús nirqan: “Trïguta muruq kaqqa Runapa Surinmi kaykan.
[38] Chakraqa intëru kay pasami kaykan. Trïguqa Tayta Dios mandaykashqancho kawaq runakunami kaykäyan. Ballicuqa Satanás munashqanno kawaq runakunami kaykäyan.
[39] Ballicuta shikaq kaqqa diablumi kaykan. Cosëchaqa juiciu finalmi kaykan. Cosëchata shuntaqkunanami angilkuna kaykäyan.
[40] “Ballicuta shuntarkur ninaman qaykushqannömi juiciu final junaqpis kanqa.
[41] Say junaqmi angilninkunata Runapa Surin kachamunqa jusalikasiqkunata y jusalikuqkunatapis mandashqanpita shuntaykur
[42] bunyaypa bunyaykaq ninaman qaykuyänanpaq. Saychömi fiyupa waqar kiruntapis uchuyanqa.
[43] Tayta Dios munashqanno kawaqkunami isanqa Tayta Dios mandaykashqancho intinöraq asikyäyanqa. Rinriyuq kaqkunaqa nishqäkunata wiyakuyäsun.
[44] “Tayta Dios mandaykashqanqa chakracho qellay pamparaqmanmi tinkun. Juk runashi chakracho saysika qellay pamparaykaqta tarinaq. Say qellayta tariykurshi kashlanman pampaykunaq. Nirkurshi lapan imaykantapis rantikuykur say qellay pamparaykaq chakrata kushish rantinaq.
[45] “Saynöpis Tayta Dios mandaykashqanqa kuyaylapaq perlasmanmi tinkun. Juk negociantishi alinnin perlasta rantinanpaq ashinaq.
[46] Mas alinnin kaqta tariykurnashi lapan imaykantapis rantikuykur say perlasta rantinaq”.
[47] “Saynöpis Tayta Dios mandaykashqanqa redmanmi tinkun. Lamarman redta jitar imayka casta pescädutami sariyan.
[48] Red juntatami lamar kuchunman jorquyan. Saychömi ali kaq pescäduta canastaman winayan y mana ali kaqtana jitariyan.
[49] Saynölami juiciu finalcho angilkuna shamur ali runakunapita jusalikur kawaq runakunata rakiyanqa.
[50] Jusalikur kawaq runakunatami bunyaypa bunyaykaq ninaman qaykuyanqa. Saychömi fiyupa waqar kiruntapis uchuyanqa”.
[51] Sayno yacharkasirnami discïpulunkunata Jesús tapur nirqan: “¿Kay yachasishqäkunata tantiyayankiku?” Sayno tapuptinmi niyarqan: “Aw, tantiyayämi, taytay”.
[52] Saymi Jesús nirqan: “Tayta Dios mandaykashqanpita yachasiq runaqa maran kaq mikuykunata y sayraq churashqan kaqkunata jorqarkamur qarakuqnömi kaykan”.
[53] Imamanpis tinkusiypa yacharkasirmi Jesús saypita aywakurqan.
[54] Markanman chaykur sinagögacho yachasiptinmi marka mayinkuna admirayashpan niyarqan: “Sayno yachasinanpaq ¿maychöraq yachakamush? Saynöpis ¿imanöparaq milagrukunata ruran?
[55] ¿Manaku payqa carpintëru Josépa surin kaykan? Saynöpis paypa maman ¿manaku María? Wawqinkunapis ¿manaku Santiago, José, Simón y Judas?
[56] Lapan paninkunapis ¿manaku kaycho täyan? Sayjinanpa yachasinanpaqqa ¿maychöraq yachakamush?”
[57] Sayno nirmi Jesús yachasishqankunata chaskikuyarqansu. Saymi Jesús nirqan: “Wakin markakunacho profëtata chaskikuyaptinpis ayllunkuna y marka mayinkunaqa manami chaskikuyansu”.
[58] Sayno mana chaskikuyaptinmi juk ishkay milagrukunalata saycho rurarqan.