[1] “Tayta Dios mana juzgayäshunaykipaq runa mayikita ama juzgayaysu.
[2] Runa mayikita juzgayaptikiqa Tayta Dios qamkunatapis juzgayäshunkimi. Runa mayikita imanöpis yanapäyashqaykiman tupumi qamkunatapis Tayta Dios yanapäyäshunki.
[3] Nawikikunacho jatunkaray qeru jatiraykaptinqa ¿imanirtaq runa mayikikunapa nawincho ichiknayla shuka jatiraykaqta rikapäyanki?
[4] Nawikikunacho jatunkaray qeru jatiraykaptinqa ¿imanöparaq niyankiman: ‘Nawikipita shukata jorqapäshayki’?
[5] ¡Ishkay cära runakuna! Puntata nawikikunacho kaykaq qerutaraq jorquyay. Sayraqmi shumaq rikayanki runa mayikipa nawinpita shukata jorqupäyänaykipaq.
[6] “ Sagrädu kaqtaqa alqukunata ama jitapäyaysu. Perlasnikitaqa kuchikunata ama jitapäyaysu. Jitapäyaptikiqa kuchikuna jarukuyanqami y alqukuna usharpis ushaykuyäshunkimi.
[7] “Manakuyaptikiqa Tayta Dios kamaripäyäshunkimi. Ashirqa tariyankimi. Punkuta takakuyaptikiqa kichapäyäshunkimi.
[8] Manakuq kaqqa chaskinmi. Ashiq kaqqa tarinmi. Punkuta takakuq kaqtaqa kichapanmi.
[9] “Mayqaykikunatapis wamraykikuna tantata manakuyäshuptiki ¿rumita aptaparkuyankimansuraq?
[10] Pescäduta manakuyäshuptiki ¿culebrata qarayankimansuraq?
[11] Qamkuna yaqa kaykarpis wamraykikunata ali kaqlata qaraykäyaptikiqa ¿manasuraq jana pasacho kaykaq Taytaykipis manakuq kaqta ali kaqkunata kamaripanqa?
[12] “Imanömi runa mayiki rikayäshunaykita munayanki, saynöla qamkunapis runa mayikita ali rikayanki. Sayno kawanansipaqmi Moisés qelqashqanchöpis y profëtakuna qelqayashqanchöpis nikan.
[13] “Kichki punkupa yaykuyay. Anchu kaq punkupa yaykuqkunaqa jatun nänipami infiernuman aywaykäyan. Askaqmi say punkupa yaykuykäyan.
[14] Kichki kaq punkupa yaykuqkunami isanqa llanu nänipa gloriaman aywaykäyan. Walkaqlami say punkupa yaykuykäyan.
[15] “Profëta tukuqkunata chaskipäyankimantaq. Paykunaqa uyshano shamurpis wanusikuq löbunömi kaykäyan.
[16] Jachata wayuyninpa reqishqansinömi runakunatapis imano kawayashqanta rikar reqinsi. Manami kashakunapitasu üvata palansi ni cardonkunapitasu hïgustapis qorinsi.
[17] Ali jachaqa alitami wayun. Mana ali jachami isanqa mana alita wayun.
[18] Saynölami ali wayuq jachaqa mana alitaqa wayunsu. Mana ali wayuq jachapis manami alita wayunsu.
[19] Say jachataqa muturir ninamanmi qaykunsi.
[20] Jachata wayuyninpa reqishqansinömi runakunatapis imano kawayashqanta rikar reqinsi.
[21] “Manami jutïta joqariyashlanpitasu jana pasacho kaykaq Taytä mandaykashqanman yaykuyanqa. Saymanqa yaykuyanqa pay munashqanno kawaqkunalami.
[22] Juiciu finalcho askaqmi niyämanqa: ‘Tayta, Tayta, qampa wilakuynikitami wilakurqä. Saynöpis qampa jutikichömi supaykunatapis qarqurqä. Saynölami qampa jutikicho milagrukunatapis rurarqä’.
[23] Sayno niyämaptinmi nishaq: ‘Qamkunata manami reqïsu. ¡Jusasapa runakuna, nawpäpita witikuyay!’
[24] “Nishqäkunata wiyakamaq runaqa qaqa janancho wayita sharkasiq runanömi kaykan.
[25] Say wayiqa fiyupa tamyaptinpis, mayu jakar jaytaptinpis y fiyupa wayraptinpis manami juchunqasu.
[26] “Nishqäkunata mana wiyakamaq runami isanqa aqusha janalancho wayita sharkasiq runano kaykan.
[27] Say wayiqa fiyupa tamyaptin, mayu jakar jaytaptin y fiyupa wayraptinmi juchunqa. Saynölami mana wiyakamaq runa pasaypa kuyapaypaq kanqa”.
[28] Jesús sayno yachasiptinmi runakuna fiyupa admirakuyarqan.
[29] Manami ley yachasiq runakunanösu yachasirqan, sinöqa munayyuq karmi shumaq yachasirqan.