[1] Saypitanami runakunata y discïpulunkunata Jesús nirqan:
[2] “ Moisés qelqashqan leykunata yachasiyänanpaqmi fariseukunawan ley yachasiqkuna munayyuq kaykäyan.
[3] Sayno kaykaptinqa yachasiyäshushqaykita cäsukuyay. Isanqa paykuna kawayashqannöqa ama kawayaysu. Diospa palabranta yachasirpis kikinkunaqa manami mandamientukunata cumpliyansu.
[4] Paykunaqa apaytapis mana kamäpakuyashqanyaq qepita aparipaqnömi aska leykunata cumpliyänanpaq runakunata niyan. Sayno kaptinpis cumpliyänanpaq manami ichiklatapis yanapäyansu.
[5] “Imatapis rurayan runakuna rikayänalanpaqmi. Saymi jatusaq filacteriankunata ruraykur purisiyan. Saynöpis largu jïlukunata mödanankunapa chuskun kuchunman jiraykurmi puriyan.
[6] Mikuyänanpaq qayasiyaptinpis paykunaqa mësamanraqmi jamakuyan. Sinagögakunachöpis punta puntamanraqmi jamakuyan.
[7] Pläzakunachöpis runakuna ‘ rabí’ nir ali rikayänantami munayan.
[8] “Qamkunapaqa juklaylami yachasishuqniki. Saynöpis say wawqilami kaykäyanki. Sayno kaykaptinqa ama munayaysu ‘rabí’ niyäshunaykita.
[9] Kay pasachöqa ama pitapis ‘Taytansi’ nir Diostano respitayaysu. Juklaylami Taytaykiqa. Payqa jana pasachömi kaykan.
[10] Qamkunatapis yachasikuq kashqaykita ama niyäshunkisu. Juklaylami yachasishuqnikiqa. Payqa Cristumi.
[11] Mas ali rikash kayta munarqa ashmaynöla kayay.
[12] Runa tukuqkunaqa penqayman churashqami kayanqa. Qollmi shonqu kaqkunami isanqa aliman churash kayanqa.
[13] “¡Wawalaw, ishkay cära fariseukuna y ley yachasiqkuna! Wayi punkuta wichqapaqnömi Tayta Dios mandaykashqanman pipis mana yaykuyänanpaq sapata churapaykäyanki. Sayno karmi kikikikunapis yaykuyankisu.
[14] [“¡Wawalaw, ishkay cära fariseukuna y ley yachasiqkuna! Viüdakunapa pobrëzalantapis qechuykäyankimi. Nirkurmi santu tukuyashpayki may höra Tayta Diosta manakuyanki. Sayno kayashqaykipitami Tayta Dios castigayäshunki.]
[15] “¡Wawalaw, ishkay cära fariseukuna y ley yachasiqkuna! Qamkunaqa juk runalapis yachasiyashqaykita chaskikunanta munarmi maysaypapis aywayanki. Chaskikurnami qamkunapitapis ishkay kuti masraq Satanás munashqanta rurayan.
[16] “¡Wawalaw! Qamkunaqa qaprano karmi lutanpa pushaykäyanki. Sayno karmi nikäyanki: ‘Templupa jutincho promitir mana cumpliyaptikipis manami imapis imanansu. Templucho kaykaq qoripa jutincho promitirmi isanqa cumpliyänayki’.
[17] ¡Mana tantiyakuq qaprakuna! ¿Mayqantaq mas sagrädu? ¿Templucho kaykaq qoriku o say qorita sagräduyäsiq templuku?
[18] “Saynöpis qamkuna nikäyanki: ‘ Altarpa jutincho promitir mana cumpliyaptikipis manami imapis imanansu. Altar janancho churashqan ofrendapa jutincho promitirmi isanqa cumpliyänayki’.
[19] ¡Mana tantiyakuq qaprakuna! ¿Mayqantaq mas sagrädu? ¿Ofrendaku o ofrendata sagräduyäsiq altarku?
[20] “Altarpa jutincho jurar manami altarpa jutilanchösu juraykäyanki, sinöqa altar jananman churayashqan ofrendakunapa jutinchöpis juraykäyankimi.
[21] Templupa jutincho jurarpis manami templupa jutilanchösu juraykäyanki, sinöqa templucho kaykaq Tayta Diospa jutinchömi juraykäyanki.
[22] Ciëlupa jutincho jurarpis manami ciëlupa jutilanchösu juraykäyanki, sinöqa Tayta Diospa trönunpa jutincho y kikin Tayta Diospa jutinchömi juraykäyanki.
[23] “¡Wawalaw, ishkay cära fariseukuna y ley yachasiqkuna! Qamkunaqa mentapita, anispita y comïnuspita diezmuta rakiykarpis mas cäsukuyänaykipaq kaq mandamientukunata manami cumpliyankisu. Say mandamientukuna nikan runa mayikita ali rikayänaykipaq, kuyapäyänaykipaq y Tayta Diosta awniyashqaykita cumpliyänaykipaqmi. Diezmupaq rakir cumpliyashqaykino say mandamientukunatapis cumpliyankiman.
[24] Qamkunaqa qaprano karmi lutanpa pushaykäyanki. Yakupita chushpita shuyshurpis camëlluta ultakurkuqnömi kaykäyanki.
[25] “¡Wawalaw, ishkay cära fariseukuna y ley yachasiqkuna! Qamkunaqa janalanpa maylash pucilluno y plätunömi kaykäyanki. Say plätukuna rurincho qanra kashqannömi qamkunapis shonquykikunacho suwakuyänaykipaq y mana alita rurayänaykipaq yarpaykäyanki.
[26] ¡Qapra fariseukuna! Plätupa rurinta maylaqno puntata mana ali yarpäyashqaykikunata kachariyay. Saynöparaqmi rasunpaypa santu kayanki.
[27] “¡Wawalaw, ishkay cära fariseukuna y ley yachasiqkuna! Qamkunaqa janalanpa pintash mïchu niraqmi kaykäyanki. Mïchupa janan kuyaylapaq kaptinpis rurincho tulukuna ismur melanaypaqmi kaykan.
[28] Saynömi qamkunapis runakuna rikayäshuptiki ali ruraqno kaykäyanki. Isanqa ishkay cära kayashqayki y lutan yarpäyashqaykikuna pasaypa penqakuypaqmi kaykan.
[29] “¡Wawalaw, ishkay cära fariseukuna y ley yachasiqkuna! Qamkunaqa profëtakunapa mïchunkunatami ruraykäyanki y ali runakunapa monumentunkunatami adornaykäyanki.
[30] Nirkurmi nikäyanki: ‘Unay ayllükuna kawayashqan wisan kawarqa profëtakunata wanusiyaptin noqakuna manami wanusiyämansu karqan’.
[31] Sayno nirmi musyaykäsiyanki profëtakunata wanusiq runakunapa ayllun kar paykunanöla kaykäyashqaykita.
[32] ¡Sayno kaykarqa unay aylluykikunanöla qamkunapis wanusiyay ari!
[33] “¡Culebra casta runakuna! Infiernuman Tayta Dios qaykuyäshunaykipaq kaykaptinqa ¿imanöparaq salvakuyanki?
[34] Qamkunata tantiyasiyäshunaykipaqmi profëtakunata, musyaq runakunata y yachasiqkunatapis kachamushaq. Paykunatami wakinta wanusiyanki, wakinta crucificayanki, wakinta sinagögakunacho astayanki y wakintanami markan markan qatikachar nakasiyanki.
[35] Jusaynaq Abelta wanusishqanpita Berequíaspa surin Zacaríasta templu punkucho wanusishqanyaqmi kay pasacho lapan ali runakunata wanusiyashqanpita qamkuna jusayuq kaykäyanki.
[36] Rasunpami nï: Say wanusiq runakunatanömi qamkunata Tayta Dios juzgayäshunki”.
[37] “¡Ay, Jerusalén, Jerusalén! Qamqa Tayta Diospa profëtankunata nawpapita pasami wanuykäsinki. Pay kachamushqan wilakuqkunatapis samqaykankimi. Chipshankunata walpa oqlakuqno wawaykikunata aska kuti shuntayta munaptïpis manami munashkankisu.
[38] Sayno kashqaykipitami wayikikunapis templuykipis sunyaraykar quëdanqa.
[39] Noqa kaynömi nï: Manami yapay rikamankinasu ‘¡Tayta Diospa jutincho shamuq runa alabash kaykuläsun!’ nishqaykiyaq”.