[1] Sayno yacharkasirmi Galileapita aywar Judeaman chänanpaq Jordán mayu simpanparaq Jesús tumamurqan.
[2] Paypa qepantami aska runakuna aywayarqan. Saychömi qeshyaykaqkunatapis aliyäsirqan.
[3] Fariseukunapis sayman aywaykurmi lutanta parlasiyänan kash Jesústa tapuyarqan: “¿Ima achäquilapis warminpita runa rakikanmanku o manaku?” nir.
[4] Sayno tapuyaptinmi Jesús nirqan: “¿Manaku liyiyashkanki Tayta Diospa palabranta? Saychömi nikan olqutapis warmitapis Tayta Dios kamashqanta.
[5] Sayno kamarkurmi Tayta Dios kayno nirqan: ‘Mamanpa y taytanpa makinpita runa yarqukun warminwan mana rakikaypa tänanpaqmi. Ishkaq karpis juklaylanömi kayanqa’.
[6] Sayno nikaptinqa mananami ishkaqnasu kaykäyan, sinöqa juklaylanönami. Saymi Tayta Dios juklasashqantaqa pipis rakinmansu”.
[7] Sayno niptinmi fariseukuna tapuyarqan: “Sayno kaptinqa ¿imanirtaq Moisés qelqashqancho nikan warminpita rakikar papilta firmaparkur qarqunanpaq kashqanta?”
[8] Saymi Jesús nirqan: “Runakuna warminpita rakikäyänanpaq Moisés permitirqan chukru shonqu kayaptinmi. Isanqa manami sayno kananpaqsu Tayta Dios kamarqan.
[9] Sayno kaptinpis noqa nï: Mayqan runapis warmin mana jarukuykaptin juk warmiwan tarqa adulteriuchömi kaykan. [Saynölami runanpita rakikash warmiwan taq runapis adulteriucho kaykan]”.
[10] Saymi discïpulunkuna niyarqan: “Sayno kaptinqa mas alimi kanman warmiynaqla kakuptin”.
[11] Sayno niyaptinmi Jesús nirqan: “Manami lapansu majaynaq kawayta kamäpakuyan. Tayta Dios kamakäsiptinmi isanqa majaynaq täkun.
[12] Wakin runakuna warmiynaq täkuyänanpaqmi yuriyan. Wakinqa capash karmi warmiwan tänanpaq yarpäyansu. Wakinnami Tayta Dios mandaykashqancho kawar warmita ashiyansu. Pipis majaynaq täkuyta munarqa japala täkusun”.
[13] Saypitanami wamrakunata Jesús kaqman apayarqan umankunaman makinta churaykur Tayta Diosta manakunanpaq. Wamrakunata apaykäyaqta rikarmi discïpulunkuna michäyarqan.
[14] Saymi discïpulunkunata Jesús nirqan: “Wamrakunata apakayämunanta ama michäyaysu. Wamrano kaqkunapaqmi Tayta Dios mandaykashqan kaykan”.
[15] Sayno nirkushpanmi wamrakunapa umanman makinta churaykur Tayta Diosta manakurqan. Nirkurnami saypita aywakurqan.
[16] Juk kutichömi Jesúsman chaykur juk maqta nirqan: “ Rabí, [ali runami kanki]. ¿Imatataq alita ruräman mana ushakaq kawayta tarinäpaq?”
[17] Saymi Jesús nirqan: “¿Imanirtaq ali ruraypaq tapumanki? Juklaylami ali ruraqqa. Mana ushakaq kawayta tariyta munarqa paypa mandamientunkunata cäsukuy”.
[18] Sayno niptinmi say maqta yapay tapurqan: “¿Mayqan mandamientukunatataq cumplïman?” nir. Saymi Jesús nirqan: “Runa mayikita ama wanusinkisu. Majaykita ama jarukunkisu. Ama suwakunkisu. Manakaqta pitapis ama tumpankisu.
[19] Mamaykitapis taytaykitapis ali rikanki. Saynöpis kikiki kuyakushqaykino runa mayikita kuyanki”.
[20] Saymi maqta nirqan: “Saykunataqa [wamra kashqäpita pasami] lapanta cumplishkä. ¿Imataq mas pishiykäman cumplinäpaq?”
[21] Niptinmi Jesús nirqan: “Tayta Dios munashqanno kayta munarqa lapan imaykaykikunatapis rantikuykur say qellayta muchuqkunata aypuy. Sayno ruraptikiqa jana pasachömi riquëzayki kanqa. Nirkur qatirämay”.
[22] Sayno niptinmi pasaypa rïcu kar say maqta lakish aywakurqan.
[23] Aywakuptinmi discïpulunkunata Jesús nirqan: “Rasunpami nï: ¡Ajami kaykan rïcu runakuna Tayta Dios mandaykashqanman yaykuyänanpaq!
[24] Yapaymi qamkunata nï: Rïcu runa Tayta Dios mandaykashqanman yaykushqanpitaqa mas raslami camëllupis awja uchkupa ushturinman”.
[25] Sayta wiyarmi discïpulunkuna pasaypa mansakash niyarqan: “Sayno kaptinqa ¿piraq salvakunman?”
[26] Saymi paykunata rikärishpan Jesús nirqan: “Runakuna salvakuyänanpaqqa aläpa ajami kaykan. Tayta Diospaqmi isanqa imapis ajasu kaykan”.
[27] Saymi Pedro nirqan: “Noqakuna lapan imaykäkunatapis kachaykurmi qamta qatiraykäyä, taytay. Sayno kaykäyaptïqa noqakunapaq ¿imataq kanqa?”
[28] Sayno niptinmi Jesús nirqan: “Rasunpami nï: Mushuq pasacho Runapa Surin chipipiykaq trönunman jamaykuptinmi qamkunapis qatiräyämashqaykipita chunka ishkay trönukunacho jamakuyanki. Saychömi chunka ishkay trïbu Israel runakunata juzgayanki.
[29] “Noqa rayku pipis wayinta, wawqinkunata, paninkunata, mamanta, taytanta, [warminta,] surinkunata y chakrankunatapis kachariq kaqqa pachak (100) kuti mastami chaskinqa. Saynöpis mana ushakaq kawaytami tarinqa.
[30] Askaqmi respitash kaykaqkuna manakaqman churash kayanqa. Manakaqman churash kaqkunanami respitash kayanqa”.