[1] Jamay junaq päsarkuptinnami domingu tuta saka sakala María Magdalenawan juknin María aywayarqan Jesús pamparashqan sepultüra rikaq.
[2] Aywaykäyaptinmi Tayta Dios kachamushqan ángel jana pasapita urämuptin pasa fiyupa suksukyarqan. Jesús pamparaykashqan sepultüraman chaykurmi saparaq rumita witiskasir jananman jamakuykurqan.
[3] Say ángel elqukuynöraqmi asikyarqan. Mödananpis rashtano yuraqmi karqan.
[4] Angilta rikaykurmi soldädukuna fiyupa mansakaywan suksukyäyashpan watpaskiyarqan.
[5] Warmikuna chäyaptinnami ángel nirqan: “Ama mansakäyaysu. Musyämi crucificayashqan Jesúspa ayanta rikaq shayämushqaykita.
[6] Manami kaychönasu. Kawarimunanpaq nishqannölami kawarimush. Mayman sutayashqantapis rikayänaykipaq shayämuy.
[7] Kananqa apurä aywar discïpulunkunata wilayay Jesús kawarimushqanta. Saynöpis wilayay Galileaman nawpaykashqanta y saycho paywan tinkuyänanpaq kashqanta. Saytami qamkunata wilaykä”.
[8] Ángel sayno niptinmi warmikunaqa mansakash kaykäyashqancho fiyupa kushikuyashpan Jesúspa discïpulunkunata wilaq cörri aywayarqan. [Sayno aywaykäyaptinmi]
[9] Jesús yuriparkur winchikurqan. Saymi say warmikuna Jesúspa chakinta makalakurkur adorayarqan.
[10] Jesúsnami nirqan: “Ama mansayämaysu. Aywar wawqïkunata wilayay Galileaman aywayänanpaq. Saychönami paykunawan tinkushaq”.
[11] Warmikuna kutikuyaptinmi sepultürata täpaq wakin soldädukunapis Jerusalénman aywar mandaq cürakunata wilayarqan ima päsashqantapis.
[12] Wilayaptinmi mandaq cürakuna Israel mayor runakunawan shuntakaykur imata rurayänanpaqpis wilanakuyarqan. Wilanakuskirmi soldädukunata aska qellayta pägar
[13] niyarqan: “Runakunata niyanki Jesúspa discïpulunkuna sakaypa aywar ayanta suwar apakuyashqanta. Saynöpis niyanki punukash kar imatapis mana mayayashqaykita.
[14] Pilato musyaptinqa noqakunami paywan parlayäshaq mana castigayäshunaykipaq”.
[15] Saymi päguta chaskiskir soldädukuna aywayashpan mandaq cürakuna niyashqannöla runakunata wilapäyarqan. Sayno wilakuyashqantami Israel runakuna kananyaqpis criyiyan.
[16] Jesúspa chunka juk discïpulunkunanami Galileaman chaykur aywayarqan mayninchöpis tinkuyänanpaq Jesús nishqan jirkaman.
[17] Saychömi Jesúswan tinkur adorayarqan. Wakinqa rikaykarpis manami Jesús kashqanta criyiyarqanraqsu.
[18] Discïpulunkunaman witiykurmi Jesús nirqan: “Kay pasachöpis y jana pasachöpis lapanpaq munayyuq kanäpaqmi Tayta Dios churamash.
[19] Saymi maysay markakunapapis aywar runakunata yachasiyanki discïpulü kayänanpaq. Paykunata bautizayanki Tayta Diospa jutincho, Surinpa jutincho y Espíritu Santupa jutincho.
[20] Saynöpis yachasiyanki lapan nishqäkunata cäsukuyänanpaq. Noqaqa qamkunawanmi imaypis kaykäshaq kay pasa ushakashqanyaq”. [Amén.]