[1] Say wisanmi Galileapa mandaqnin Herodes mayarqan Jesúspaq pïmaypis parlayashqanta.
[2] Saymi yanapaqninkunata Herodes nirqan: “Say runaqa Bautizaq Juanmi kawarimush kanqa. Saymi munayyuq kaykan milagrukunata rurananpaq”.
[3] Nawpatami Juanta Herodes prësu sarisir cadinawan watarkur carcilman wichqasish karqan. Sayno rurarqan Herodías jutiyuq warmi manakuptinmi. Herodías karqan Herodespa wawqin Felipipa warminmi.
[4] Herodíasta Herodes suwash kaptinmi Juan nirqan: “Wawqikipa warminta suwamushpayki jusalikushkankimi”.
[5] Sayno niptinmi Herodesqa Juanta wanusiyta munarqan. Wanusiyta munarpis profëta kashqanta lapan runakuna niyaptinmi mansarirqan.
[6] Saypita Herodespa diyancho fiesta kaptinmi Herodíaspa jipash wawan lapan qayasishqankunapa nawpancho shumaq tushurqan. Sayta rikarmi Herodes selläma kushikushpan
[7] Tayta Diospa jutincho jurar say jipashta promitirqan: “Imatapis manakamashqaykitami qoykushayki” nir.
[8] Sayno niptinmi jipashqa maman yachasishqannöla Herodesta nirqan: “Bautizaq Juanpa umanta juk plätuwan qoykamay”.
[9] Sayta manakuptinmi rey Herodes fiyupa lakikurqan. Sayno kaptinpis qayasishqankunapa nawpancho jurash karmi manakushqanta qoykuyänanpaq wardiakunata nirqan.
[10] Saymi wardiakuna Juanpa umanta carcilcho roquskir
[11] juk plätuwan apamur jipashta ayaparkuyarqan. Jipashnami mamanta ayaparqan.
[12] Sayno rurayashqanta musyaykurmi Juanpa discïpulunkuna ayanta shuntayashpan pampayarqan. Saypitanami Jesúsman aywaykur Juanta wanusiyashqanta wilayarqan.
[13] Sayta musyaykurmi büquiman wisarkur sunyaqninman Jesús japalan aywakurqan. Aywakushqanta musyaykurnami runakuna markakunapita chakilapa aywayarqan Jesústa tariyashqanyaq.
[14] Büquipita urarkurnami Jesús tarirqan aska runakuna shuyakuykäyaqta. Saymi kuyapashpan qeshyaykaqkunata aliyäsirqan.
[15] Tardiyaptinnami discïpulunkuna Jesús kaqman aywaykur niyarqan: “Sunyaqchömi kaykansi. Pasapis tardiyaykannami. Runakunata niykuy markakunapa aywar mikuyninkuna rantiyämunanpaq”.
[16] Sayno niyaptinmi Jesús nirqan: “Manami mikuy ashiq aywayanmansu. Qamkuna pachan qarayay”.
[17] Sayno niptinmi discïpulunkuna niyarqan: “Pisqa tantawan ishkay pescädulami mirkapäkuna kaykan”.
[18] Saymi Jesús nirqan: “Say mirkapaykita apayämuy”.
[19] Nirkurmi runakunata Jesús nirqan pashpaman jamakuyänanpaq. Pisqa tantatawan ishkay pescäduta aptarkurmi jana pasapa rikärishpan Tayta Diosta Jesús päkilä nirqan. Tantata pakirirnami discïpulunkunata makyarqan runakunata qarayänanpaq
[20] Pacha junta mikuskiyaptinnami pusuq kaqta chunka ishkay canasta juntata shuntayarqan.
[21] Saycho mikuqkuna kayarqan pisqa waranqano (5,000), warmikunata y wamrakunata mana yupaylapa.
[22] Saypitanami discïpulunkunata Jesús nirqan büquiman wisarkur wak simpaman nawpayänanpaq. Aywakuyaptinnami saycho kaq runakunata despachaskir
[23] Tayta Diosta manakunanpaq kikilan jirkaman wisarqan. Saychömi pasa sakashqanyaq manakuykarqan.
[24] Sayyaqqa discïpulunkuna qocha chawpintanami büquiwan aywaykäyarqan. Fiyupa wayrar yakuta pulchaqyäsiptinmi seqaypa nakaykäyarqan.
[25] Pasa waraykaptinnami discïpulunkuna kaqman yaku jananpa Jesús aywarqan.
[26] Sayta rikaykurmi discïpulunkuna fiyupa mansakar qaparäyarqan: “¡Achachalay! ¡Almachä shamuykan!” niyashpan.
[27] Saymi Jesús nirqan: “¡Noqami kaykä! ¡Ama mansayämaysu!”
[28] Saynami Pedro nirqan: “Rasunpaypa qam karqa noqapis yaku jananpa shamunäpaq kamakaykasilay, taytay”.
[29] Sayno niptin Jesús nirqan: “Shamuy, ari”. Saymi büquipita yarqurir yaku jananpa Jesús kaqman aywayta qalaykurqan.
[30] Aywaykashqanchömi fiyupa wayrämuptin mansariywan talpukar qapararqan: “¡Salvaykalämay, taytay!” nir.
[31] Saymi jinan höra makinpita sutarkur Jesús nirqan: “Janan shonqula yärakuq runa, ¿imanirtaq yärakamankisu?”
[32] Büquiman wisarkuyaptinnami wayrapis chawarqanna.
[33] Sayta rikaykurmi büquicho kaykaqkuna qonqurpakuykur niyarqan: “¡Rasunpaypami Tayta Diospa Surin kaykanki, taytay!”
[34] Qochata simparkurnami Genesaret pampaman chäyarqan.
[35] Saycho runakuna Jesústa reqirkurmi maysaypa wilakasiyarqan. Saymi lapan qeshyaqkunata aliyäsinanpaq apayarqan.
[36] Chaykasirmi Jesústa ruwakuyarqan qeshyaqninkuna mödananpa kuchulantapis yataykunanpaq. Saychömi lapanpis yataykuq kaqqa aliyäyarqan.