[1] Hinaqtinmi, soqta p'unchayraq Paskua fiestapaq kashaqtin, Betania llaqtaman Jesusqa rirqan. Chay llaqtapin Lazaropas kasharqan. Payqa wañukapusqañan karqan. Ichaqa Jesusmi payta wañusqakunapuramanta kawsarichimpusqa karqan.
[2] Chaypitaqmi Jesuspaq senayta wayk'upurqanku. Martan serbirqan, Lazarotaqmi Jesuswan mesaman tiyaykuqkunaq huknin karqan.
[3] Hinaqtinmi Mariaqa, ancha balorniyoq ch'uya nardomanta huk libra q'apashaq hawinata apamurqan. Hinan Jesuspa chakinkunata hawirqan. Chukchankunawantaq ch'akichirqan. Hinan wasiqa q'apashaq hawinaq q'apayninwan hunt'aykusqa karqan.
[4] Yachachisqankunamanta huknintaqmi, Simonpa churin Judas Iskarioteqa chaypi kasharqan. Payqa, Jesusta hap'ichiqmi karqan.
[5] Nirqantaq: —¿Imanaqtintaq kay q'apashaq hawinari mana kinsa pachak denario qolqemanchu bendesqa karqan, hinaspataq wakchakunaman qosqachu karqan? nispa.
[6] Payqa, manan wakchakunamanta llakikuspanchu chaytaqa nirqan. Aswanpas suwa kaspanmi, chaytaqa nirqan. Hinallataq qolqe wayaqatapas waqaychaqmi karqan. Hinan chay churasqankumanta horqokuqllapuni karqan.
[7] Hinaqtinmi Jesusqa nirqan: —Hinalla ruwachun. Kay warmiqa, p'ampawananku p'unchaypaqmi chay q'apashaq hawinata waqaycharqan.
[8] Wakchakunaqa qankunallawanpunin kashanku. Ñoqan ichaqa, mana qankunallawanpunichu kashasaq, nispa.
[9] Hinaqtinmi, judío runakunamanta ancha askha runakuna Jesusqa chaypi kashasqanta yacharurqanku. Hinan mana Jesusraykullachu, aswanpas Lazarotawan rikuqmi rirqanku. Paytan Jesusqa, wañusqakunapuramanta kawsarichimpusqa karqan.
[10] Umalliq saserdotekunataqmi ichaqa, Lazarotapas wañuchinankupaq rimanakurqanku.
[11] Payhawataqmi, askha judío runakuna t'aqakurqanku. Hinaspa Jesuspi iñikapurqanku. Chaymi Lazarotaqa wañuchiytapuni munarqanku.
[12] Qhepantin p'unchaytaq, fiestaman hamuq chay ancha askha runakuna, Jerusalén llaqtaman Jesuspa haykumushasqanta uyarirqanku.
[13] Hinan palmeraq k'allmankunata hap'ispanku, Jesusta chaskinankupaq lloqsirqanku. Qaparirqankutaq: —¡Hosanna! ¡Señorpa sutinpi hamuq, Israel llaqtaq Reynin saminchasqapuni kachun, nispanku. (Sal. 118:26)
[14] Huk asnochata tarispataqmi, Jesusqa, Qelqaq nisqanman hina, chay asnochapi sillaykukurqan.
[15] Qelqapas nintaqmi: ‘Sionpa ususin, ama mancharikuychu. ¡Qhawariy, malta asnochapi sillaykukuspan, Reyniykiqa hamushan!’ nispa. (Zak. 9:9)
[16] Yachachisqankunaqa, manan chay pacha kay imaymanakunata yuyayninkuman churasqakuchu karqan. Ichaqa, maypachachus Jesusqa hatunchasqa karqan, chayñan Jesusmanta chaykuna qelqasqa kasqanta yuyarirurqanku. Hinallataqmi, payta imaymanakuna ruwasqankutapas yuyarirullarqankutaq.
[17] Hayk'aqchus Lazarota aya p'ampana t'oqomanta waqyashaqtin, hinallataq wañusqakunapuramanta kawsarichishaqtin, paywan kuska kashaq chay askha runakunan chaymanta willakurqanku.
[18] Chay señal ruwasqantan uyarisqaku karqan. Chaymi chay askha runakunapas, payta chaskiq lloqsirqanku.
[19] Hinaqtinmi fariseokunaqa, paykunapurapi ninakurqanku: —¿Rikushankichischu? Manan imatapas ruwayta atisunmanñachu. ¡Qhawariychis, tukuymi paypa qhepanta ripushanku! nispanku.
[20] Fiestapi hatunchanankupaq wichamuqkuna ukhupitaqmi, wakinqa Gresia suyumanta runakuna kasharqanku.
[21] Paykunan, Galilea probinsiapi kashaq Betsaida llaqtamanta Felipeman asuykurqanku. Hinan payta balikuspa, nirqanku: —Wiraqochay, Jesustan rikuyta munashayku, nispanku.
[22] Felipetaq rispan, Andresman chayta willamurqan. Andreswan Felipewantaq Jesusman chayta willarqanku.
[23] Jesustaq paykunaman kutichispa nirqan: —Runaq Churin hatunchasqa kananpaq oraqa chayamunñan.
[24] Cheqaqta, cheqaqtan niykichis: ‘Manachus trigoq rurun hallp'aman urmanqa, hinaspa wañunqa chayqa, sapallanpunin kashanqa. Sichus wañunqa chaymi ichaqa, askha ruruta rurunqa,’ nispay.
[25] Pipas kawsayninta munakuqqa, chinkachipunqan. Kay pachapi kawsayninta cheqnikuqmi ichaqa, wiñay kawsaypaq waqaychanqa.
[26] Sichus pipas serbiwan chayqa, qatikuwachun. Hinan maypichus ñoqa kashasaq, chaypipas serbiqnillaypuni kashanqa. Sichus pipas serbiwan chayqa, Yayaymi payta allinpaq qhawarinqa.
[27] Kunanmi sonqoy phoq-nisqa kashan. ¿Imanisaqtaq? ‘¿Yayay, kay oramanta horqoykuway,’ nispachu nisaq? ¡Manapunin! ¡Aswanpas, chaypaqmi kay oramanqa chayarqani! nispa
[28] Jesusqa nillarqantaqmi: —Yayay, sutiykita hatunchay, nispa. Hinaqtinmi huk kunka hanaq pachamanta nimurqan: —¡Ñan sutiytaqa hatuncharqaniña, wakmantapas hatunchallasaqtaqmi! nispa.
[29] Hinan chaypi kashaq askha runakuna, chay kunkata uyarirqanku. Nirqankutaq: —Pacha t'oqyaymi, nispanku. Hukkunataq nirqanku: —¡Huk angelmi payman rimaykamun! nispanku.
[30] Jesustaq kutichispa nirqan: —Chay kunkaqa, manan ñoqaraykuchu hamurqan. Aswanpas qankunaraykun hamurqan.
[31] Kunanmi kay pacha runaq taripayninqa. Kunanmi kay pachapi kamachikuqqa hawaman wikch'usqa kanqa.
[32] Ñoqataqmi ichaqa, sichus hallp'amanta hoqarisqa kasaq chayqa, llapa runata ñoqaman pusamusaq, nispa.
[33] Payqa, imaynatachus wañunan karqan chaymantan chaytaqa nisharqan.
[34] Hinan askha runakunaqa payman kutichirqanku: —Kamachikuy Simiman hina, Cristoqa wiñaypaqmi takyan. Chay hinatan ñoqaykuqa uyarirqayku. ¿Imanaqtintaq qanri ninki: ‘Runaq Churinqa hoqarisqapunin kanan’ nispaykiri? ¿Pitaq chay Runaq Churinri? nispanku.
[35] Hinaqtinmi Jesusqa, paykunata nirqan: —As pisi tiempollatawanmi k'anchayqa qankuna ukhupi kashan. Laqhayaypi puriqqa, maymanchus rishan chaytan mana yachanchu. Chayrayku ama laqhayay qonqayllamanta atipanasunkichispaq, k'anchay kapunasunkichiskamaqa puriychis, nispa.
[36] Payqa nillarqantaqmi: —K'anchaypa wawankuna kanaykichispaq, k'anchay kapunasunkichiskamaqa, k'anchaypi iñiychis, nispa. Chay imaymanakunatan Jesusqa rimarqan. T'aqarikapuspantaqmi, paykunamanta pakakurqan.
[37] Ichaqa, hinaña paykunaq ñawpaqenkupi Jesusqa askha señalkunata ruwarqan chaypas, manapunin paypi iñirqankuchu.
[38] Diospa rantinpi rimaq Isaiaspa nisqan hunt'akunanpaqmi chay mana iñisqankuqa karqan. Paymi nirqan: ‘Señor, ¿pitaq willakuyniykutari kreerqan? ¿Pimantaq Señorqa, atiyniyoq makinta rikuchirqan?’ nispa. (Isa. 53:1)
[39] Isaiasqa imaymanakunatawanmi nirqan. Chaykunaraykun manapuni iñiytaqa atirqankuchu.
[40] Isaiasqa nisqan karqan: ‘Ñawinkuwanpas mana rikunankupaq, Nitaq sonqonkupipas yuyayman churanankupaq, Nillataq yuyaymanpas kutirikunankupaq, Amallataq ñoqa paykunata qhaliyachinaypaqmi, Diosqa paykunaq ñawinkutapas ñawsayachirqan, Sonqonkutapas rumiyachirqan,’ nispa. (Isa. 6:10)
[41] Isaiasqa, Señorpa hatun k'anchariyninta rikusqanrayku, hinallataq paymanta rimasqanraykun, chay imaymanakunataqa nirqan.
[42] Chay tukuywanpas, umalliqkunamantapas askhan Jesuspiqa iñikapurqanku. Judío runakunaq huñukunanku wasimanta qarqosqa kaytan mana munarqankuchu. Chaymi, fariseokunahawa, mana alayritañachu willakurqanku.
[43] Paykunaqa, Diospa allinpaq hap'iyninmantaqa, runakunaq allinpaq hap'iyninkutan aswantaraq munarqanku.
[44] Jesustaqmi ichaqa kunkayoqta nirqan: —Pipas ñoqapi iñiqqa, manan ñoqapichu iñin, aswanpas kachamuwaqniypin iñin.
[45] Pipas ñoqata rikuwaqniyqa, kachamuwaqniytan rikun.
[46] Hayk'an ñoqapi iñiqqa, ama laqhatutayaqllapipuni kashanankupaqmi, ñoqa k'anchaypas kay pachaman hamurqani.
[47] Ñoqaqa manan kay pachapi runakunata huchachaqchu hamurqani. Aswanpas kay pachapi runakunata qespichinaypaqmi hamurqani. Chayrayku, sichus pipas simiykunata uyarin, hinaspa mana kreenchu chayqa, manan ñoqaqa huchachanichu.
[48] Pipas ñoqata mana chaskiwanchu, hinallataq simiykunatapas mana chaskinchu chayqa, paypa huchachaqninqa kanmi. P'uchukay p'unchaypin, rimaykusqay simi payta huchachanqa.
[49] Manan ñoqaqa kikillaymantachu rimarqani. Aswanpas kachamuwaqniy Yayaymi, imatachus ninaypaq, hinallataq imatachus rimanaypaq kamachikuyta qowarqan.
[50] Kamachikuynin wiñay kawsay kasqantataqmi yachani. Chay hinaqa, imaynatachus Yayayqa rimaykuwarqan, chay hinatan rimani, nispa.