[1] Chay imaymanakuna qhepatataqmi, judío runakunaq fiestanku karqan. Hinan Jesusqa, Jerusalén llaqtaman wicharqan.
[2] Jerusalén llaqtapin, obehakunaq punkun qayllapi, phisqa portalniyoq, hebreo simipi Betesda nisqa sutiyoq, huk p'uytu kasharqan.
[3] Chay portalkunapitaqmi, askha onqosqakuna, ñawsakuna, wist'ukuna, mana kuyuriq such'ukuna ima, sirisharqanku. Paykunaqa, unuq aytirikunantan suyakusharqanku.
[4] Unay-unaymantan, huk ángel unuta aytirichinanpaq chay p'uytuman uraykamuq. Chay hina kaqtinmi, unuq aytirikusqan qhepata ñawpaq kaq haykuqlla, imaymana onqoyninkunamantapas qhaliyapuq.
[5] Chaypitaqmi, huk runa kasharqan. Payqa, kinsa chunka pusaqniyoq watañan onqosqa karqan.
[6] Jesustaq payta sirishaqta rikurqan. Hinan unayña onqosqa kasqanta yachaspa, payta tapurqan: —¿Qhali kapuyta munankichu? nispa.
[7] Onqosqataq, kutichispa payta nirqan: —Señor, unu aytirikuqtin, p'uytuman apaykuwananpaq manan piñiypas kanchu. Kuyurishanaykaman, ñoqamanta huk ñawpaqta haykurapun, nispa.
[8] Jesustaq payta nirqan: —Sayariy, kamillaykita hoqariy hinaspa puriripuy, nispa.
[9] Hinan, kasqan ratupacha, chay runaqa qhali kapurqan. Kamillanta hoqarispataq, puriripurqan. Chay p'unchayqa, sábado p'unchaymi karqan.
[10] Hinaqtinmi judío runakunaqa, chay qhaliyachisqa runata nirqanku: —Kunanqa sábado p'unchaymi. Kamachikuy Simiman hinaqa, manan kamillayki apayta atiwaqchu, nispanku.
[11] Qhaliyachisqa runataq ichaqa, paykunaman kutichirqan: —Pichus qhaliyachiwaqniy, pay kikinmi nimuwan: ‘Kamillaykita hoqariy, hinaspa puriripuy,’ nispan, nispa.
[12] Hinaqtinmi payta tapurqanku: —¿Pi runataq chaytari nimurqasunki: ‘Kamillaykita hoqariy, hinaspa puriripuy,’ nispari? nispanku.
[13] Chaypi askha runakunaq kasqanraykun, Jesusqa chay cheqasmanta ch'inlla t'aqarikapusqa karqan. Chaymi qhaliyachisqa runaqa, pichus karqan chayta mana yacharqanchu.
[14] Chaymantataqmi Jesusqa, Dios yupaychana wasipi chay runata tarirqan. Hinan payta nirqan: —Qhawariy, qhaliyachisqañan kapunki. Ama chaymantapas aswan mana allinraq hamunasunkipaq, amaña huchallikuyñachu, nispa.
[15] Chay runataqmi, chaymanta ripuspa, qhaliyachiqninqa Jesuspuni kasqanta judío runakunaman willamurqan.
[16] Sábado p'unchaypin Jesusqa, chaykunata ruwarqan. Chaymi judío runakunaqa wañuchiytapuni munaspanku, Jesusta qatiykacharqanku.
[17] Jesustaqmi ichaqa, paykunaman kutichirqan: —Yayayqa kunankaman llank'ashan. Hinallataqmi ñoqapas llank'ashani, nispa.
[18] Manan sábado p'unchayllatachu p'akirqan, aswanpas nirqanmi: ‘Diosqa ñoqaq Yayaymi,’ nispan. Chay hinapin Dioswan kuskachakurqan. Chaykunaraykun judío runakunaqa, aswantaraq wañuchiytapuni munarqanku.
[19] Hinaqtinmi Jesusqa, kutichispan paykunata nirqan: —Cheqaqta, cheqaqtan niykichis: ‘Yayaq tukuy ruwasqantan, kikillantataq Churipas ruwan. Chayraykun Churiqa, mana imatapas pay kikillanmanta ruwaytaqa atinmanchu. Aswanpas Yayaq imatachus ruwasqanta rikuspanmi, chaytaqa ruwan,’ nispay.
[20] Yayaqa Churita munakunmi. Hinallataqmi tukuy imaymana paypa ruwasqanta rikuchin. Chaykunamantapas, aswan hatun ruwaykunataraqmi, qankunaq utirayanaykichispaq rikuchinqa.
[21] Chay hinaqa, Yayan wañusqakunata kawsarichispa, paykunaman kawsayta qon. Chay hinallatataqmi Churipas, pikunamanchus kawsayta qoyta munan, paykunaman kawsayta qon.
[22] Yayaqa manan pitapas chaninchanchu. Aswanpas tukuy chaninchaytaqa Churimanmi qorqan.
[23] Imaynan Yayata allinpaq hap'inku, chay hinallatataq llapalla Churita allinpaq hap'inankupaqmi, chay chaninchaytaqa qorqan. Pipas Churita mana allinpaq hap'iqqa, manallataqmi Churita kachamuq Yayatapas allinpaq hap'inchu.
[24] Cheqaqta, cheqaqtan niykichis: ‘Pipas simiyta uyarin, hinallataq kachamuwaqniypi iñin chayqa, wiñay kawsayniyoqmi kapun. Manan huchachasqañachu kanqa. Aswanpas wañuymanta kawsaymanñan pasarqon,’ nispay.
[25] Cheqaqta, cheqaqtan niykichis: ‘Diospa Churinpa kunkanta wañusqakunaq uyarinanku oraqa hamushanmi. Uyariqkunataqmi kawsanqaku. Chay oraqa kunanmi,’ nispay.
[26] Imaynan Yayapas kikinpi kawsayniyoq kashan, chay hinallatataqmi Churimanpas, kikinpi kawsayniyoq kananpaq qorqan.
[27] Runaq Churin kasqanraykutaqmi, payman chaninchananpaq kamachikuyniyoq kaytapas Yayaqa qollarqantaq.
[28] Aya p'ampana t'oqokunapi tukuy kashaqkuna, Churiq kunkanta uyarinanku orasqa chayamunqan. Chay hinaqa, amapuni chaymantaqa utirayaychischu.
[29] Hinan allin kaqta ruwaqkunaqa, kawsaypaq kaq kawsarimpuyman lloqsimunqaku. Mana allin kaqta ruwaspallapuni kashaqkunan ichaqa, huchachayta chaskina kaq kawsarimpuyman lloqsimunqaku,’ nispa.
[30] Jesusqa nillarqantaqmi: —Manan imatapas ñoqaqa kikillaymanta ruwaytaqa atiymanchu. Aswanpas, uyarisqayman hinallan chaninchani. Manataqmi ñoqaqa munayniytachu maskhani. Aswanpas, kachamuwaqniy Yayaq munaynintan maskhani. Chayraykun, chaninchayniyqa chaninpuni.
[31] Sichus ñoqa kikillaymanta willakuni chayqa, willakuyniyqa manan cheqaqchu.
[32] Ñoqamanta willakuqqa hukmi. Ñoqamanta chay willakusqan cheqaq kasqantaqa yachanin.
[33] Qankunaqa, willaqkunatan Juanman kacharqankichis. Hinan payqa, cheqaq kaqmanta willakurqan.
[34] Ñoqan ichaqa, mana pi runamantapas willakuytaqa chaskinichu. Aswanmi, qankuna qespikuyta chaskinaykichispaq chaytaqa nini.
[35] Juanqa, yawrashaq, hinallataq k'anchashaq lámparan karqan. Qankunataqmi, chay k'anchayninpi huk pisi tiempolla kusikuyta munarqankichis.
[36] Ñoqamanta willakuymi ichaqa, Juanpamanta aswan hatun. Yayayqa, ruwaykunata ñoqa hunt'anaypaqmi qowarqan. Chay kikin ruwaykuna ruwasqaykunan, ñoqamanta hinallataq Yayaypa kachamuwasqanmanta willakun.
[37] Hinallataqmi kachamuwaqniy Yayaypas, ñoqamanta willakurqan. Qankunaqa, manataqmi hayk'aqpas kunkanta uyarirqankichischu, nitaqmi rikch'aynintapas rikurqankichischu.
[38] Qankunaqa, Yayaq kachamusqantan mana kreerqankichischu. Chaymi, Yayaq siminqa, qankunapi mana takyanchu.
[39] Qelqakunata t'aqwiychis. Qankunapaqqa, chay Qelqakunapi wiñay kawsay kapusunkichismanmi. Chay Qelqakunataqmi ñoqamanta willakuqkunaqa kanku.
[40] Qankunataqmi ichaqa, kawsayniyoq kanaykichispaq, mana ñoqaman hamuyta munankichischu.
[41] Runakunaq yupaychaynintaqa manan chaskinichu.
[42] Ñoqataqmi ichaqa, qankunata reqsiykichis. Hinan qankunapi Diospaq mana munakuyniyoq kasqaykichista yachani.
[43] Ñoqaqa Yayaypa sutinpin hamurqani. Ichaqa manataqmi ñoqata chaskiwarqankichischu. Sichus huk runa pay kikinpa sutinpi hamunman chayqa, paytaqa chaskiwaqchismi.
[44] Hukkunan hukkunamanta yupaychayta chaskishankichis. Manataqmi sapallan Diosmanta hamuq yupaychaytaqa maskhankichischu. Chay hina kaqtinqa, ¿imaynatataq qankunari kreeyta atiwaqchis?
[45] Yayaq ñawpaqenpi ñoqaq huchachanaytaqa ama yuyaykuychischu. Qankunata huchachaqniykichisqa kanmi. Moisespin suyakuyniykichisqa kashan. Huchachaqniykichisqa paytaqmi.
[46] Moisesqa ñoqamantan qelqarqan. Chay hinaqa, sichus qankuna Moisesta kreewaqchis karqan chayqa, ñoqatan kreewankichisman karqan.
[47] Sichus qankuna, paypa qelqasqankunata mana kreenkichischu chayqa, ¿imaynatataq ñoqaq nisqaytapas kreenkichisri? nispa.