[1] Semana qallariy p'unchaymi, ancha tutallamanta, sasphillaraq kashaqtin, Magdala llaqtayoq Mariaqa aya p'ampana t'oqota rirqan. Hinan aya p'ampana t'oqoq punkunmanta rumita achhurichisqata rikurqan.
[2] Hinaqtinmi phawaylla Simón Pedromanwan, pitachus Jesusqa munakurqan, chay wak yachachisqanmanwan rirqan. Hinan paykunata nirqan: —Aya p'ampana t'oqomantan Señorta horqorusqaku. Ichaqa maymanchus churasqankuta manataqmi yachaykuchu, nispa.
[3] Hinaqtinmi, Pedropas, Jesuspa chay huknin yachachisqanpas lloqsispanku, aya p'ampana t'oqoman rirqanku.
[4] Iskayninkutaqmi, kuska phawarqanku. Ichaqa huknin yachachisqataq, Pedromanta aswan usqhayta phawaspan, ñawpaqta aya p'ampana t'oqoman chayarqan.
[5] Qhawaykunanpaq k'umuykuspantaqmi, chaypi kashaq linomanta p'achakunallataña rikurqan. Ichaqa manataqmi haykurqanchu.
[6] Hinaqtinmi Simón Pedropas, qhepanta chayallarqantaq. Chayaspantaqmi, aya p'ampana t'oqoman haykurqan. Hinan chaypi kashaq linomanta p'achakunallataña rikurqan.
[7] Hinallataq Jesuspa umanpi churasqa pañotapas rikurqan. Ichaqa manataqmi linomanta p'achakunawan kuskatachu, aswanpas wakpi k'uyuykusqatan rikurqan.
[8] Hinaqtinmi, ñawpaqta aya p'ampana t'oqoman chayaq wak yachachisqapas haykullarqantaq. Hinan payqa chaykunata rikuspa, kreerqan.
[9] Qelqaqa nirqanmi: ‘Wañusqakunamanta Cristoq kawsarimpunanqa nesesariopunin,’ nispa. Chaywanpas, chay Qelqataqa manan entiendisqakuraqchu karqan.
[10] Hinaqtinmi yachachisqakunaqa, maypichus kasqankuman wakmanta kutipurqanku.
[11] Magdala llaqtayoq Marían ichaqa, aya p'ampana t'oqo qayllapi waqasharqan. Hina waqan-waqantaqmi aya p'ampana t'oqota qhawaykunanpaq k'umuykurqan.
[12] Hinan yuraq p'achayoq iskay agelkunata chaypi tiyashaqta rikurqan. Maymanchus Jesuspa ayanta churasqaku karqan, chaypin hukninta sawnapi, huk kaqtataq hayt'anapi kashaqta rikurqan.
[13] Angelkunataqmi payta nirqanku: —Warmi, ¿imanaqtinmi waqashanki? nispanku. Mariataq paykunata nirqan: —Señorniytan aparapusqaku, manataqmi maymanchus churasqankuta yachanichu. Chaymi waqashani, nispa.
[14] Chayta nispantaq, qhepaman kutirirqan. Hinan Jesusta sayashaqta rikurqan. Ichaqa manataqmi Jesús kasqanta kuentata qokurqanchu.
[15] Jesustaq payta nirqan: —Warmi, ¿imanaqtintaq waqashankiri? ¿Pitataq maskhashankiri? nispa. Mariataq, wertapi llank'aq runa kananpaq yuyaykuspan, payta nirqan: —Wiraqocha, sichus qan aparqanki chayqa, maymanmi churamurqanki, chayta niway, hinaspa apakampusaq, nispa.
[16] Jesustaq payta nirqan: —¡María! nispa. Kutirispantaq, Mariaqa payta nirqan: —¡Raboní! nispa. Chayqa, ‘Yachachiqniy’ ninantan nin.
[17] Jesustaq payta nirqan: —Manaraqmi Yayayman wichanichu. Chayrayku amaraq llamiykuwaychu. Ichaqa wawqe-panaykunaman riy, hinaspa paykunaman willamuy: ‘Jesusmi nin: “Ñoqaqa Yayayman hinallataq Yayaykichisman, Diosniyman hinallataq Diosniykichismanmi wichasaq,” ’ nispan, nispayki, nispa.
[18] Magdala llaqtayoq Mariataq, yachachisqakunaman mosoq willakuyta willaq rirqan. Nirqantaq: —¡Señortan rikuramuni! nispa. Hinallataq Jesuspa chay imaymanakuna nisqantapas paykunaman willallarqantaq.
[19] Chay semana qallariy p'unchaymi tutayaykusharqanña. Yachachisqankunataq, judío runakunata manchakusqankurayku, huñukunanku cheqaspi punkuta wisq'arukuspa kasharqanku. Jesustaqmi ichaqa, haykuspan chawpinkupi sayaykurqan. Hinan paykunata nirqan: —¡Thak kay qankunawan kachun! nispa.
[20] Chayta nispantaqmi, makinkunata hinallataq waqtannintawan yachachisqankunaman qhawachikurqan. Hinan paykunaqa, Señorta rikuspanku, anchatapuni kusikurqanku.
[21] Hinaqtinmi Jesusqa wakmanta paykunata nirqan: —¡Thak kay qankunawan kachun! Imaynan Yayaypas kachamuwarqan, chay hinallatataqmi ñoqapas qankunata kachaykichis, nispa.
[22] Chayta nispantaqmi, paykunata phukuykuspa nirqan: —Santo Espirituta chaskiychis.
[23] Pikunatachus qankuna huchankuta pampachankichis chayqa, pampachasqañan kanku. Pikunatachus mana pampachankichischu chaytaqmi ichaqa, mana pampachasqachu kanku, nispa.
[24] Dídimo nispa sutichasqa Tomastaqmi ichaqa, Jesús hamuqtin mana paykunawanchu kasharqan. Payqa, chunka iskayniyoq yachachisqankunamanta hukninmi karqan.
[25] Hinan wakin yachachisqakunaqa Tomasta nirqanku: —¡Señortan rikuruyku! nispanku. Tomastaq ichaqa paykunata nirqan: —Sichus makinkunapi klabokunaq haykusqanta mana rikusaqchu chayqa, hinallataq manachus dedoyta klabokunaq haykusqanman winaykusaq chayqa, manallataqchus waqtanninmanpas makiyta winaykusaq chayqa, manapunin kreesaqchu, nispa.
[26] Pusaq p'unchay qhepatataq, yachachisqankunaqa wakmanta wasi ukhupi kasharqanku. Tomaspas paykunawanmi kashallarqantaq. Punkutaña wisq'akamusqaku karqan chaypas, Jesusqa haykurqanpunin. Chawpinkupi sayaykuspantaq nirqan: —¡Thak kay qankunawan kachun! nispa.
[27] Hinamantaq Tomasta nirqan: —Dedoykita kayman churay, hinaspa makiykunata qhaway. Kayman makiykita churay hinaspa waqtanniyman winaykuy. Amataq mana kreeqqa kaychu, aswanpas kreeq kay, nispa.
[28] Hinan Tomasqa kutichispan Jesusta nirqan: —¡Señorniy, Diosniy! nispa.
[29] Jesustaq payta nirqan: —Tomás, ¿rikuwasqaykiraykuchu kreenki? ¡Pikunachus mana rikuwaspalla kreeqkunaqa, kusisamiyoqmi kanku! nispa.
[30] Cheqaqtapunin Jesusqa, yachachisqankunaq ñawpaqenkupi ancha askha wak señalkunatawanraq ruwarqan. Chaykunaqa, manan kay qelqapi qelqasqachu kashan.
[31] Ichaqa Jesús Diospa Churin Cristo kasqanta iñinaykichispaqmi, kaykunaqa qelqasqa karqan. Iñispaykichis, sutinpi wiñay kawsayniyoq kanaykichispaqmi qelqasqa karqan.