[1] Wakin runakunan nisharqanku: ‘Juanmanta aswantaqa, Jesusmi yachachisqankunata askhayachishan, hinallataq bautisashanpas,’ nispanku. Chay nisqankutan fariseokunaqa uyarirqanku. Chaytataqmi Señorqa yacharurqan.
[2] Ichaqa manan Jesús kikinpunichu bautisasharqan, aswanpas yachachisqankunan bautisasharqanku.
[3] Jesusqa, fariseokunaq uyarisqankuta, yacharuspa hinan, Judea probinsiamanta lloqsispan Galilea probinsiaman wakmanta ripurqan.
[4] Ichaqa Samaria probinsiantapunin pasanan karqan.
[5] Hinan Jesusqa, Samaria probinsiapi kashaq Sikar sutiyoq llaqtaman chayarqan. Jakobmi, churin Joseman huk chakrata qosqa karqan. Chaypa qayllanpin chay Sikar llaqtaqa kasharqan.
[6] Chaypitaqmi Jakobpa pukyun kasharqan. Hinan Jesusqa, purisqanmanta sayk'usqa kaspan, chay pukyu patapi tiyaykurqan. Yaqapas soqta kaq orasñan karqan.
[7] Samaria probinsiamantataqmi, huk warmi unuta horqonanpaq hamurqan. Hinan Jesusqa payta nirqan: —Ukyanaypaq unuta qoykuway, nispa.
[8] Yachachisqankunataqmi, mikhuna rantiq llaqtata risqaku karqan.
[9] Hinaqtinmi Samaria probinsiamanta warmiqa, Jesusta nirqan: —¿Imaynataq qanri, judío runa kashaspayki, ukyanaykipaq unutari mañakuwanki? Ñoqaqa Samaria llaqtayoq warmin kani. Judío runakunawan, Samariamanta runakunawanqa manan allinpichu kanku, nispa.
[10] Kutichispantaqmi, Jesusqa payta nirqan: —Ñoqaqa nirqayki: ‘Ukyanaypaq unuta qoykuway,’ nispan. Ichaqa sichus Diospa qokuyninta, hinallataq unu mañakuqniykita reqsiwaq chayqa, mañakuwaqchá karqan. Hinaspataq payqa, kawsay qokuq unuta qosunkiman karqan, nispa.
[11] Warmitaq Jesusta nirqan: —Señor, unu pukyuqa ukhun. Manataqmi imaykipas unu horqonaykipaqqa kapusunkichu. Chay hinaqa, ¿kawsay qokuq unutari maymantataq horqomuwaq?
[12] ¿Kay unu pukyu qowaqniyku taytayku Jakobmanta aswan allinchu qanri kanki? Manan riki. Pay kikinmi wawankunapiwan, uywankunapiwan ima, kay unu pukyumantaqa, ukyarqanku, nispa.
[13] Kutichispantaqmi, Jesusqa payta nirqan: —Pikunachus kay unuta ukyaqqa, wakmantan ch'akichikullanqakutaq.
[14] Pikunachus ñoqaq qosqay unuta ukyaqkunataqmi ichaqa, manapuniña hayk'aqpas ch'akichikunqakuchu. Aswanmi ñoqaq unu qosqayqa, paypi wiñay kawsaypaq phullpumuq unu pukyu kanqa, nispa.
[15] Warmitaqmi Jesusta nirqan: —Señor, manaña ch'akiwananpaq, hinallataq manaña aswanta kayman unuta horqoq hamunaypaq, chay unuta qoway, nispa.
[16] Jesustaqmi warmita nirqan: —Rispa, qosaykita waqyamuy, hinaspa kayman hamuychis, nispa.
[17] Warmitaqmi kutichispan, Jesusta nirqan: —Manan qosayoqchu kani, nispa. Jesustaqmi warmita nirqan: —Allintan ninki: ‘Manan qosayoqchu kani,’ nispaykiqa.
[18] Phisqan qosaykikunaqa karqan. Kunan tiyaqmasiykitaqmi ichaqa, mana qosaykichu. Chaytaqa cheqaqtan ninki, nispa.
[19] Warmitaq payta nirqan: —Señor, yaqachu hina Diospa rantinpi rimaq kawaq.
[20] Taytaykuqa, kay orqopin Diosta yupaycharqanku. Qankunataqmi ninkichis: ‘Yupaychanapaq cheqasqa, Jerusalén llaqtapin kashan,’ nispaykichis, nispa.
[21] Jesustaq payta nirqan: —Warmi kreeway, mana kay orqopipas, nillataq Jerusalén llaqtapipas Yayata hatunchanaykichispaq oraqa chayamunqan.
[22] Qespikuyqa, judío runakunamantan hamun. Chaymi qankunaqa, mana yachasqaykichista yupaychankichis. Ñoqaykutaqmi ichaqa, yachasqaykuta yupaychayku.
[23] Ichaqa, cheqaqmantapuni yupaychaqkuna, espiritupi hinallataq cheqaq kaqpi Yayata yupaychananku oraqa chayamunqan. Chay oraqa kunanmi. Hinaqa, Yayapas chay hina yupaychaqkunataqa payta yupaychanankupaq maskhashanmi.
[24] Diosqa Espíritun. Chaymi yupaychaqkunaqa, espiritupi, hinallataq cheqaq kaypi yupaychanankuqa nesesariopuni, nispa.
[25] Warmitaq Jesusta nirqan: —Cristo sutiyoq Mesiaspa hamunantaqa yachanin. Pay hamus panmi, tukuy imaymanakunatapas sut'inchawanqaku, nispa.
[26] Jesustaq payta nirqan: —Ñoqa, qanwan rimashaqmi, chay Mesiasqa, kani, nispa.
[27] Chay ratupitaqmi, Jesuspa yachachisqankunaqa chayamurqanku. Hinan chay warmiwan Jesuspa rimashasqanmanta, paykunaq yuyayninkupi mana kabesqa kasharqanku. Chaywanpas ichaqa, manan mayqenninkupas nirqankuchu: ‘¿Imatan maskhashanki?’ nispa, otaq ‘¿Imamantan chay warmiwan rimashanki?’ nispapas.
[28] Hinaqtinmi warmiqa, p'uyñunta saqerparispa, llaqtata rirqan. Hinaspa runakunata rimaykurqan.
[29] Nirqantaq: —¡Hamuychis! Tukuy imaymana ruwasqayta niwaqniy huk runata rikumuychis. ¿Manachu payqa Cristo kanman? nispa.
[30] Hinaqtinmi llaqtamanta lloqsispanku, Jesuspa kasqanman rirqanku.
[31] Chay hina kashanankamataq, yachachisqankunaqa payta balikuspanku, nirqanku: —Rabí, mikhuykuy, nispanku.
[32] Jesustaq ichaqa, paykunata nirqan: —Qankunaq, mana yachasqaykichis mikhunan ñoqaq mikhunayqa kashan, nispa.
[33] Hinaqtinmi, yachachisqankunaqa paykunapura ninakurqanku: —¿Pillapas paymanri mikhunata aparamunmanchu karqan? nispanku.
[34] Jesustaqmi paykunata nirqan: —Ñoqaq mikhunayqa, kachamuwaqniypa munayninta ruwanaymi, hinallataq chay ruwayninkunata tukunaymi.
[35] ¿Manachu qankunaqa kay hinata ninkichis: ‘Ichhuy tiempo chayamunanpaqqa, tawa killaraqmi faltashan,’ nispaykichis? Qhawariychis, ñoqataqmi niykichis: ‘¡Ñawiykichista allinta kichariychis, hinaspataq chakrakunata qhawariychis! Ichhunapaqqa ñan yuraqña kashan,’ nispay.
[36] Ichhuqqa pagonta chaskikunmi. Hinallataq wiñay kawsaypaqmi rurutapas pallan. T'akaqwan kuska kusikunanpaqmi ichhuqqa ruruta pallan.
[37] Chaymanta huk rimayqa kanmi: ‘Hukmi t'akaqpas, huktaq ichhuqpas,’ nispa. Chay rimayqa cheqaqmi.
[38] Qankunaq mana llank'asqaykichismanmi ñoqaqa ichhumunaykichispaq kacharqaykichis. Hukkunan llank'arqanku, qankunataq ichaqa paykunaq chay llank'asqankuman haykurqankichis, nispa.
[39] Samaria llaqtayoq warmitaqmi, willakusqa karqan: —Payqa tukuy imachus ruwasqaykunatan, niwan, nispa. Chaymi, chay willakusqanhawa, Samaria probinsiapi kashaq, chay llaqtayoq askha runakunaqa Cristopi iñikapurqanku.
[40] Hinaqtinmi, Samaria llaqtayoq runakunaqa, Jesuspa kasqanman rirqanku. Hinan paykunawan qhepakunanpaq balikurqanku. Jesustaqmi iskay p'unchay paykunawan qhepakurqan.
[41] Jesuspa siminta uyarispankutaqmi, aswan askha runakuna paypi iñikapurqanku.
[42] Runakunataq warmita nirqanku: —Ñoqayku kikiykun, payta uyarirqayku. Hinan payqa cheqaqmantapuni kay pacha runa Qespichiq kasqanta, hinallataq Cristo kasqantapas yachayku. Chayraykun manaña niwasqallaykiwanñachu iñiykuqa, nispanku.
[43] Iskay p'unchay qhepatataqmi, Jesusqa, Samaria probinsiamanta lloqsispa, Galilea probinsiaman ripurqan.
[44] Diospa rantinpi rimaq llaqtanpi mana allinpaq qhawarisqa kasqantaqa, kikin Jesuspunin sut'inta willakusqa karqan.
[45] Jesús, Galilea probinsiaman haykuqtintaqmi, Galilea llaqtayoq runakunaqa payta chaskirqanku. Paykunaqa, ñawpaqtañan Jerusalén llaqtapi fiestaman rispanku, Jesuspa tukuy imaymana ruwasqankunata rikumusqaku karqan. Chaymi paykunaqa Jesusta chaskirqanku.
[46] Jesusqa, Galilea probinsiapi kashaq Kaná llaqtamanmi, wakmanta chayarqan. Chay llaqtapin payqa, unuta binoman tukuchisqa karqan. Reypa huk ofisialninpa churintaqmi, Kapernaum llaqtapi onqosqa kasharqan.
[47] Hinan Judea probinsiamanta Galilea probinsiaman Jesuspa chayamusqanta, chay ofisialqa uyarisqa karqan. Chaymi Jesuspa kasqanman hamurqan. Ofisialpa churinqa wañukapunan patallapiñan kasharqan. Chayraykun, churinta qhaliyachiq uraykunanpaq Jesustaqa balikurqan.
[48] Hinaqtinmi, Jesusqa payta nirqan: —Manachus señalkunata, hinallataq musphana ruwaykunata rikuwaqchis chayqa, manan hayk'aqpas iñiwaqchischu, nispa.
[49] Reypa ofisialnintaq payta nirqan: —Señor, waway manaraq wañurapushaqtin uraykuy, nispa.
[50] Jesustaq payta nirqan: —Ripuy, wawaykiqa kawsashanmi, nispa. Ofisialtaqmi, Jesuspa nisqanta kreespa ripurqan.
[51] Hinan uraykushallaqtinraq, kamachinkunaqa paywan tupanankupaq lloqsimurqanku. Willaspankutaq, payta nirqanku: —Wawaykiqa kawsashanmi, nispanku.
[52] Hinaqtinmi, ima orastachus alliyarurqan chayta, ofisialqa paykunata tapurqan. Hinan payta nirqanku: —Qayna p'unchaymi, qanchis kaq orasta, ruphapakuy onqoyninqa thanipurqan, nispanku.
[53] Jesusqa nisqan karqan: ‘Wawaykiqa kawsashanmi,’ nispan. Chaymi onqosqa waynaq taytanqa, Jesuspa nisqan chay oras kasqanta yacharqan. Hinan payqa, llapan wasinpi kaqkunapiwan Jesuspi iñikapurqanku.
[54] Judea probinsiamanta, Galilea probinsiaman rispa, iskay kaq señal Jesuspa ruwasqanmi chayqa karqan.