[1] Chaykuna qhepantataqmi Jesusqa, Galilea probinsiantinpi purisharqan. Judío runakunataqmi, Jesusta wañuchinankupaq maskhasharqanku. Chayraykun, Judea probinsiapi puriytaqa mana munarqanñachu.
[2] Judío runakunaq Ch'ukllakuna nisqa fiestankun qayllaykamusharqanña.
[3] Chaymi Jesuspa wawqenkunaqa, payta nirqanku: —Yachachisqaykikunapas ruwasqaykikunata rikunankupaq, kaymanta lloqsiy, hinaspa Judea probinsiaman ripuy.
[4] Pipas reqsichikuyta munaspaqa, manan imatapas pakapiqa ruwanmanchu. Kaykunatataqchus ruwanki chayqa, kay pachantinpi runakunaman riqsichikamuy, nispanku.
[5] Jesuspa wawqenkunapas, manapunin paypiqa iñirqankuchu.
[6] Hinaqtinmi Jesusqa wawqenkunata nirqan: —Manaraqmi tiempoyqa chayamunraqchu. Qankunapaqmi ichaqa, mayqen tiempopas fiestaman rinaykichispaq allillanpuni kashan.
[7] Kay pachapi runakunaqa, manan qankunata cheqnipakuyta atisunkichismanchu. Ñoqaqa, paykunaq ruwayninku mana allin kasqantan willakuni. Chayraykun ñoqataqa cheqnipakuwanku.
[8] Qankunaqa chay fiestaman wichallaychis. Ñoqaq tiempoymi ichaqa, manaraq hunt'akunraqchu. Chaymi chay fiestamanqa manaraq wichanayraqchu nispa.
[9] Chaykunata paykunaman nispantaq, Jesusqa Galilea probinsiapi qhepakurqan.
[10] Wawqenkuna fiestaman wichaqtinkutaqmi, Jesuspas fiestaman wichallarqantaq. Ichaqa manan alayritachu, aswanpas pakapi hinallan wicharqan.
[11] Judío runakunaqa, fiestapin Jesusta maskharqanku, hinan nirqanku: —¿Maypitaq chay runari kashan? nispanku.
[12] Jesusmantan chay askha runakunapurapi ancha chhuchupakuy karqan. Wakinmi nirqanku: —Allin runan, nispanku. Hukkunataqmi ichaqa, nirqanku: —Manan, aswanqa askha runakunatan q'otushan, nispanku.
[13] Ichaqa, judío runakunata manchakuspankun, mana pipas Jesusmanta alayritaqa rimarqankuchu.
[14] Kuskan fiesta pasaqtinñan, Jesusqa Dios yupaychana wasiman wicharqan. Hinan chaypi yachachirqan.
[15] Chaymi judío runakunaqa, utirayaspa nirqanku: —¿Imaynataq kay runari, yachay wasimanpas mana haykushaspa, imaymana qelqakunata yachan? nispanku.
[16] Chay hina kaqtintaq, Jesusqa paykunaman kutichispa nirqan: —Yachachikuyniyqa manan ñoqaqchu, aswanpas kachamuwaqniypan.
[17] Pipas Diospa munayninta ruwaqqa kanmanmi. Sichus chay hina kanman chayqa, paymi yachachikuyniy Diosmantachus hamun, ichari kikillaymantachus rimani, chayta reqsinqa.
[18] Pipas pay kikinmanta rimaqqa, kikinpa allinpaq qhawarisqa kaynillantan maskhan. Kachamuqninpa allinpaq qhawarisqa kayninta maskhaqmi ichaqa, cheqaqpuni. Paypiqa manataqmi ima mana chaninpas kanchu.
[19] ¿Manachu Moisesqa Kamachikuy Simita qorqasunkichis? Qankunataq ichaqa, mana mayqenniykichispas chay Kamachikuy Simita hunt'ankichischu. Chay hinaqa, ¿imanaqtintaq wañuchiwanaykichispaqri maskhashawankichis? nispa.
[20] Chay askha runakunataqmi kutichispa nirqanku: —Qanqa supayniyoqmi kashanki. ¿Pitaq wañuchinasunkipaqri maskhashasunki? nispanku.
[21] Jesustaq kutichispan, paykunata nirqan: —Ch'ulla ruwayllatan ruwarqani. Llapaykichistaq utirayankichis.
[22] Chaymi Moisesqa sirkunsisionta qorqasunkichis. Manataqmi sirkunsisionqa Moisespachu, aswanpas machulaykichiskunaqmi. Sábado p'unchaypitaqmi qharitaqa sirkunsidashankichis.
[23] Moisespa Kamachikuy Siminta mana p'akinankupaqmi, sábado p'unchaypi qhariqa sirkunsisionta chaskin. Chay hinaqa, ¿imanaqtintaq sábado p'unchaypi huk runata hukpaqkama qhaliyachisqaymantari qankuna ñoqata phiñapayawankichis?
[24] Ama rikch'ayman hinallachu chaninchaychis. Aswanpas chanin kaq chaninchaywan chaninchaychis, nispa.
[25] Hinaqtinmi, Jerusalén llaqtamanta wakin runakunaqa nirqanku: —¿Manachu wañuchinankupaq maskhasqanku runa kayqa kashan?
[26] ¡Qhawariychis, alayritañan rimashan, manataqmi paytaqa imaninkupaschu! ¿Icha cheqaqtachu kamachikuqkunaqa paypuni Cristo kasqanta reqsinkupas?
[27] Ichaqa kay runa maymantachus kasqantaqa yachanchismi. Cristo hamuqtintaqmi ichaqa, mana pipas maymantachus kasqanta yachanqakuchu, nispanku.
[28] Hinan Jesusqa, Dios yupaychana wasipi yachachishaspan kunkayoqta nirqan: —¡Ñoqataqa reqsiwankichismi, hinallataq maymantachus kasqaytapas yachankichismi! Manataqmi ñoqaqa kikiymantachu hamurqani. Aswanmi kachamuwaqniyqa cheqaqpuni. Manataqmi paytaqa reqsinkichischu.
[29] Ñoqaqa paymantan hamuni. Paytaqmi kachamuwarqan. Chayraykun, paytaqa reqsini, nispa.
[30] Hinaqtinmi, hap'irqoytapuni munarqanku. Ichaqa manataqmi, hap'inanku orasqa chayamusqaraqchu karqan. Chayraykun mana pipas paymanqa makita churarqanchu.
[31] Chay ancha askha runakunamantan, Jesuspi askha iñirqanku. Hinan nirqanku: —¿Cristo hamuspanri, kay runaq ruwasqanmanta aswan señalkunataraqchu ruwanqa? nispanku.
[32] Jesusmanta imaymanakunata chay askha runakunaq chhuchupakusqankutan fariseokunaqa uyarirqanku. Chaymi umalliq saserdotekunapiwan, fariseokunapiwan payta hap'imunankupaq guardiakunata kacharqanku.
[33] Hinaqtinmi Jesusqa nirqan: —Qankunawanqa, pisi tiempollatañan kasaq. Chaymantataqmi, kachamuwaqniypa kasqanman ripusaq.
[34] Maskhawankichismi, ichaqa manataqmi tariwankichischu. Maypichus kasqaymanqa, manataqmi hamuyta atinkichischu, nispa.
[35] Hinaqtinmi judío runakunaqa paykunapura ninakurqanku: —¿Ñoqanchis mana tarinanchispaq, maymantaq kay runari ripunqa? ¿Griego runakuna chawpipi ch'eqerisqa judío runakunaq kasqanmanchu ripunqa? ¿Chay griego runakunaman yachachimunanpaqchu ripunqa?
[36] Payqa nirqanmi: ‘Maskhawankichismi, ichaqa manataqmi tariwankichischu. Maypichus kasqaymanqa, manataqmi hamuyta atinkichischu,’ nispan. ¿Chayta nispanri, imaninantataq nishan? nispanku.
[37] Ichaqa, fiesta p'uchukay hatun p'unchaypitaqmi, Jesusqa sayarispan, kunkayoqta nirqan: —Sichus pipas ch'akisqa kashan chayqa, ñoqaman hamuchun, hinaspa ukyachun.
[38] Pipas ñoqapi iñiqqa, Qelqakunaq nisqanman hinan, kawsay unu mayukunaraq paypa ukhunmanta phawarinqa, nispa.
[39] Ichaqa, paypi iñiqkuna Santo Espíritu chaskinankumantan, chaytaqa nirqan. Jesusqa manaraq hatunchasqachu kasqanraykun Santo Espirituqa, mana hamusqaraqchu karqan.
[40] Hinaqtinmi, chay ancha askha runakunamanta wakinninkuqa, chay simikunata uyarispa, nirqanku: —¡Cheqaqtapunin, payqa Diospa rantinpi rimaq kasqa! nispanku.
[41] Hukkunataqmi nirqanku: —Payqa Cristopunin, nispanku. Wakinkunataqmi ichaqa, nirqanku: —¿Cristori, Galilea probinsiamanta kanmanchu?
[42] Qelqakunaqa ninmi: ‘Davidpa mirayninmantan Cristoqa kanqa. Hinallataq, maymantachus Davidqa karqan, chay Belén llaqtamantan, hamunqa,’ nispan. ¿Manachu Qelqakunaqa chay hinata nin? nispanku.
[43] Chaymi, pay-hawa, chay askha runakunapurapi t'aqanakuy karqan.
[44] Wakinninkutaqmi, hap'irqoytapuni munarqanku. Ichaqa manataqmi pipas paymanqa makita churarqankuchu.
[45] Chaymantataqmi guardiakunaqa, umalliq saserdotekunaq, hinallataq fariseokunaq kasqankuman rirqanku. Hinan paykunaqa guardiakunata nirqanku: —¿Imanaqtinmi Jesusta mana apamurqankichischu? nispanku.
[46] Guardiakunataq kutichispa nirqanku: —¡Manan hayk'aqpas, pi runapas chay runaq rimasqanta hinaqa rimarqanchu! nispanku.
[47] Hinaqtinmi fariseokunaqa paykunaman kutichispa nirqanku: —¿Qankunapas ñachu q'otusqaña kashankichis?
[48] ¿Llaqta umalliqkunamanta, otaq fariseokunamanta pillapas ñachu paypi iñinkumanña karqan?
[49] Kamachikuy Simita mana reqsiq chay runakunan ichaqa, ñakasqaña kanku, nispanku.
[50] Paykunaq hukninmi, Nikodemo sutiyoq runa karqan. Paymi tutalla Jesuspa kasqanman risqa karqan.
[51] Hinan Nikodemoqa, paykunata nirqan: —¿Kamachikuy siminchisri, huk runata manaraq ñawpaqta uyarishaspa, hinallataq imachus ruwasqantapas manaraq yachashaspa, chaninchanmanchu? nispa.
[52] Hinan kutichispanku, Nikodemota nirqanku: —¿Qanpas Galilea probinsiamantachu kanki? Qelqakunata t'aqwispa qhaway. Galilea probinsiamantaqa, manan hayk'aqpas pi Diospa rantinpi rimaqpas sayarirqanchu, nispanku.
[53] Hinan sapankanku wasinkuman ripurqanku.