[1] Ama sonqoykichispi llakipakuychischu. Diospi iñiychis. Ñoqapipas iñillaychistaq.
[2] Yayaypa wasinpiqa askha wasikunan kashan. Sichus mana chay hinachu kanman chayqa, niykichismanmi karqan. Qankunapaq wasikunata wakichiqmi risaq.
[3] Sichus risaq, hinallataq wasikunatapas wakichimpusaykichis chayqa, wakmantan kutimusaq. Maypichus kashasaq, chaypi qankunapas ñoqawan kanaykichispaq qankunata ñoqapaq chaskikapusaykichis.
[4] Qankunaqa, maymanchus risqayta yachankichismi. Hinallataq ñantapas reqsinkichismi, nispa.
[5] Tomastaqmi Jesusta nirqan: —Señor, maymanchus risqaykitaqa manan yachaykuchu. ¿Imaynatataq ñantari reqsiyta atiykuman? nispa.
[6] Jesustaq Tomasta nirqan: —Ñoqan ñanpas, cheqaq kaqpas, kawsaypas kani. Manan pipas mana ñoqantaqa Yayaman chayanmanchu.
[7] Sichus ñoqata reqsiwankichisman karqan chayqa, Yayaytapas reqsillawaqchistaqmi karqan. Kunanmantataqmi ichaqa, payta reqsinkichis, hinallataq rikurqankichis, nispa.
[8] Felipen Jesusta nirqan: —Señor, Yayata rikuchiwayku, chayllatan munayku, nispa.
[9] Jesustaq payta nirqan: —Felipe, unay tiempoñan qankunawan kasharqani. ¿Manachu reqsiwarqanki? Ñoqata rikuwaqniyqa, Yayaytapas rikurqanmi. Chay hinaqa, ¿imaynataq ninki: ‘Yayata rikuchiwayku,’ nispaykiri?
[10] ¿Manachu ñoqaqa Yayaypi kashasqayta, Yayaytaq ñoqapi kashasqanta kreenki? Qankunaman rimaykusqay simikunataqa, manan kikiymantachu rimaykuykichis. Aswanpas, ñoqapi kashaq Yayan ruwaykunata ruwan.
[11] Ñoqa Yayaypi kashasqayta, hinallataq Yayaypas ñoqapi kashasqanta kreewaychis. Mana hinataq, kikin ruwaykunahawa kreewaychis.
[12] Cheqaqta, cheqaqtan niykichis: ‘Ñoqaqa Yayaymanmi ripushani. Chayrayku, pipas ñoqapi iñiqqa, ñoqaq ruwasqay ruwaykunata ruwallanqataq. Chaykunamantapas aswan hatun ruwaykunataraqmi ruwanqa’ nispay.
[13] Sutiypi tukuy mañakusqaykichistataqmi ruwasaq. Churipi Yaya hatunchasqa kananpaqmi chaytaqa ruwasaq.
[14] Sichus sutiypi imallatapas mañakunkichis chayqa, ruwasaqmi, nispa.
[15] Sichus munakuwankichis chayqa, kamachikuyniykunata kasukuychis.
[16] Ñoqataqmi Yayaymanta wak Kallpachaqta qomunasunkichispaq mañakusaq. Hinan payqa, qankunawanpuni wiñaypaq kashanqa.
[17] Payqa cheqaqmanta Espíritun. Kay pachapi runakunaqa manan payta rikunkuchu, nitaqmi reqsinkupaschu. Chayraykun paytaqa mana chaskiyta atinkuchu. Paytaqmi ichaqa, qankunawanpuni kashan, hinallataq qankunapipuni kashanqa. Chaymi qankunaqa payta reqsinkichis.
[18] Manan wakchatachu saqerparisaykichis. Qankunamanqa kutimusaqmi.
[19] Kay pachapi runakunaqa, pisi tiempollatawanñan rikuwanqaku. Chaymanta aswantaqa manañan rikuwanqakuñachu. Qankunan ichaqa, rikuwankichisraq. Ñoqaq kawsasqayraykun, qankunapas kawsankichis.
[20] Haqay p'unchaypin, ñoqa Yayaypi kashasqayta yachankichis. Qankunapas ñoqapi kashasqaykichistawan, ñoqataq qankunapi kashasqaytawan yachankichis.
[21] Pipas kamachikuyniykunata hap'ispa kasukuqqa, munakuwaqniymi. Hinallataq munakuwaqniytaqa, Yayaypas munakullanqataqmi. Ñoqapas paytaqa munakullasaqtaq, hinallataq paymanqa reqsichikullasaqtaqmi, nispa.
[22] Judasmi (manan Iskariote kaqchu) Jesusta nirqan: —Señor, ¿imanaqtintaq ñoqaykumanri reqsichikunki, manataq kay pachapi runakunamanqa reqsichikunkichu? nispa.
[23] Jesustaqmi kutichispan payta nirqan: —Sichus pipas munakuwan chayqa, simiytaqa kasukunqan. Yayaytaqmi payta munakunqa. Paymantaqmi Yayaywan hamusaqku, hinaspa tiyanaykuta paywan ruwakusaqku.
[24] Pipas mana munakuwaqniyqa, manan simiykunata kasukunchu. Uyarisqaykichis simiqa, manataqmi ñoqaqchu, aswanpas, kachamuwaqniy Yayaypa siminmi.
[25] Qankunawan kashaspaymi, chay imaymanakunataqa rimaykurqaykichis.
[26] Kallpachaqqa, Santo Espíritun. Paytan Yayaqa sutiypi kachamunqa. Paymi qankunaman tukuy imaymanakunata yachachisunkichis, hinallataq llapan nisqaykunatapas yuyarichisunkichis.
[27] Thak kaytan saqeykichis, thak kayniytan qoykichis. Manan kay pachaq qosqanta hinachu qoykichis. Ama sonqoykichis llakipakuchunchu, nitaq manchapakuchunchu.
[28] Qankunamanmi nirqaykichis: ‘Risaqmi, ichaqa qankunaman kutimusaqmi,’ nispay. Chay nisqaytaqa uyarirqankichismi. Yayayqa, ñoqamanta allinpaq qhawarisqan. Chaymi, sichus munakuwankichisman chayqa, Yayayman ripusqaymantaqa q'ochukuwaqchis.
[29] Kunanmi, manaraq chay pasashaqtin niykichis. Chay hina pasaqtin iñinaykichispaqmi, nirqaykichis.
[30] Kay pachapi umalliqqa hamushanñan. Chaymi qankunawan mana askhatañachu rimasaq. Payqa, manan imapas ñoqawan ruwanan kanchu.
[31] Ichaqa Yayayta munakusqayta, hinallataq Yayaypa kamachiwasqanman hina ruwasqayta, kay pachapi runakuna yachananpaqmi chay hinata ruwani. Chay hinaqa, sayariychis. ¡Kaymanta hakuchis! nispa.