[1] Jesusqa nillarqantaqmi: —Cheqaqta, cheqaqtan niykichis: ‘Pipas obeha kanchaman mana punkuntachu haykun, aswanpas huk ladonta haykun chayqa, chay runaqa, suwa hinallataq q'aru suwan,’ nispay.
[2] Pipas punkunta haykuqmi ichaqa, obehakunata michiq.
[3] Punku kuidaqqa, michiqpaqmi punkuta kicharin. Obehakunataq paypa kunkanta uyarinku. Hinan obehankunata sutinmantakama waqyaspan, hawaman pusan.
[4] Llapan paypa kaqkunata hawaman pusaspantaq, obehankunaq ñawpaqenta rin. Hinan kunkanta reqsisqankurayku, obehakunaqa payta qatikunku.
[5] Mana reqsisqatan ichaqa, kunkanta mana reqsisqankurayku, mana hayk'aqpas qatikunkumanchu. Aswanmi paymantaqa ayqerikunku, nispa.
[6] Chay rikch'anachiytan Jesusqa paykunaman nirqan. Paykunataqmi ichaqa, imatachus paykunaman rimaykusqanta, mana entiendirqankuchu.
[7] Hinaqtinmi Jesusqa wakmanta paykunaman nirqan: —Cheqaqta, cheqaqtan niykichis: ‘Obehakunaq punkunqa ñoqan kani,’ nispay.
[8] Lliw ñoqamanta ñawpaq hamuqkunaqa, suwakuna, hinallataq q'aru suwakunan karqanku. Obehakunataqmi ichaqa, mana paykunata uyarirqankuchu.
[9] Ñoqan punkuqa kani. Sichus pipas ñoqanta haykunqa chayqa, qespichisqan kanqa. Haykunqa, lloqsinqa, hinan q'achuta tarinqa.
[10] Suwaqa suwanallanpaq, wañuchinallanpaq, hinallataq tukunallanpaqmi hamun. Ñoqan ichaqa, runakuna kawsayniyoq kananpaq, hinallataq runakuna ancha askha kawsayniyoq kananpaq hamurqani.
[11] Ñoqan allin michiqqa kani. Allin michiqqa, obehakunaraykun kawsayninta churan.
[12] Pagasqa michiqqa, manan cheqaq michiqchu. Payqa lobo hamushaqta rikuspanmi, obehakuna mana paypachu kasqanrayku, chay obehakunata saqerparispa ayqekapun. Hinan loboqa, wakin obehakunata hap'in. Wakintataq ch'eqechin.
[13] Pagasqa michiqqa, pagasqa kasqanraykun, ayqekun. Paymanqa, manan imapas obehakunamanta qokunchu.
[14] Ñoqaqa, allin michiqmi kani. Obehaykunatapas reqsinin. Paykunataqmi ñoqata reqsiwanku.
[15] Imaynan Yayaypas reqsiwan, chay hinallataqmi ñoqapas Yayayta reqsini. Hinan obehakunarayku kawsayniyta churani.
[16] Hinallataq mana kay obeha kanchamanta kaq, wakin obehakunapas kapullawantaqmi. Paykunatapas ñoqaqa apamunaypunin. Hinan kunkayta uyarinqaku. Chay hinapin ch'ulla obeha t'aqalla, hinallataq ch'ulla michiqlla kanqa.
[17] Wakmanta kawsanaypaqmi, ñoqaqa kawsayniyta churarqani. Chaymi Yayayqa munakuwan.
[18] Manan pipas kawsayniytaqa qechuwanchu. Aswanpas ñoqa kikillaymantapunin churani. Kawsayniyta qonaypaqpas atiyniyoqmi kani. Hinallataq wakmanta kawsanaypaqpas atiyniyoqmi kani. Chay kamachikuytaqa Yayaymantan chaskirqani, nispa.
[19] Chay simikunaraykun, wakmanta judío runakunapurapi t'aqanakuy karqan.
[20] Hinan paykunamanta askha nirqanku: —Supayniyoqmi kashan. Hinallataq manapuniñan yuyayninpichu kashan. ¿Imapaqñataq paytari uyarinkichis? nispanku.
[21] Wakinkunataq nirqanku: —Kay simikunaqa manan supayniyoq runaqchu. ¿Huk supayri, ñawsakunaq ñawinta kichariyta atinmanchu? nispanku.
[22] Hinan Jerusalén llaqtapi Diosman hap'ichina fiesta chayamusharqan. Paray tiempotaqmi karqan.
[23] Hinan Jesusqa, Dios yupaychana wasipi Salomonpa portalninta purisharqan.
[24] Hinaqtinmi judío runakunaqa Jesusta muyurukuspanku, payta nirqanku: —¿Hayk'aqkamataq iskayrayachiwankikuri? Sichus Cristopuni kanki chayqa, sut'inta niwayku, nispanku.
[25] Jesustaq paykunaman kutichirqan: —Nirqaykichisñan. Qankunataqmi ichaqa, mana kreewankichischu. Yayaypa sutinpi ruwaykuna ruwasqaykunan ñoqamantaqa willakushan.
[26] Qankunamanmi ichaqa, nirqaykichis: ‘Manan obehaykunachu kankichis,’ nispay. Chaymi qankunaqa, mana kreewankichischu.
[27] Obehaykunaqa, kunkaytan uyarinku. Ñoqataqmi paykunata reqsini. Hinan paykunaqa qatikuwanku.
[28] Ñoqaqa wiñay kawsaytan paykunaman qoni. Hinan mana hayk'aqpas chinkanqakuchu. Manataqmi pipas makiymanta paykunataqa qechuwanqachu.
[29] Qowaqniy Yayayqa, llapamantapas aswan atiyniyoqmi. Manataqmi pipas Yayaypa makinmantaqa paykunata qechuyta atinmanchu.
[30] Ñoqawan, Yayaywanqa ch'ullallan kayku, nispa.
[31] Hinaqtinmi judío runakunaqa, Jesusta rumiwan ch'aqenankupaq wakmanta rumita hoqarikurqanku.
[32] Jesustaq paykunaman kutichirqan: —Yayaypa kaqninmanta askha allin ruwaykunatan rikuchirqaykichis. ¿Mayqen kaq ruwaykuna ruwasqaymantataq rumiwanri ch'aqewankichis? nispa.
[33] Judío runakunataq payman kutichispa nirqanku; —Manan, chay allin ruwaykunata ruwasqaykiraykuchu rumiwanqa ch'aqeykiku. Aswanpas, Diospa kontranpi k'arak simikuna rimasqaykiraykun rumiwanqa ch'aqeykiku. Qanqa, runa kashaspaykin, Diosman tukushanki, nispanku.
[34] Jesustaq paykunaman kutichirqan: —¿Manachu Kamachikuy Simi qelqaykichispi qelqasqa kashan: ‘Ñoqan nirqani: “dioskunan kankichis,” nispay,’ nispa? (Sal.82:6)
[35] Pikunamanchus Diospa siminqa hamurqan, paykunamantan ‘dioskuna’ nispa nirqan. Chay Qelqaqa manataqmi p'akisqa kanmanchu.
[36] Ñoqataqmi ichaqa nirqani: ‘Diospa Churinmi kani,’ nispay. Chaymi qankunaqa ninkichis: ‘Qanqa Diostan k'arakta k'amishanki,’ nispaykichis. Sichus chay hina kanman chayqa, ¿imaynatan Yayaq t'aqasqanta, hinallataq kay pachaman kachamusqanta chay hina niyta atinkichis?
[37] Sichus Yayaypa ruwayninkunata mana ruwanichu chayqa, ama kreewaychischu.
[38] Ruwanitaqchus chayqa, manaña ñoqata kreewankichis chaypas, ruwayniykunapi kreeychis. Yaya ñoqapi kashasqanta, ñoqapas paypi kashasqayta yachanaykichispaq, hinallataq kreenaykichispaq, ruwayniykunapi kreeychis, nispa.
[39] Hinaqtinmi wakmanta Jesusta hap'irqoytapuni munarqanku. Paytaqmi ichaqa, makinkumanta ayqekapurqan.
[40] Hinan Jordán mayuq wak ladon, maypichus Juanqa bautisayta qallarishaspa kasharqan, chay cheqasman wakmanta Jesusqa rirqan. Chaypitaqmi qhepakurqan.
[41] Askha runakunataq, payman rirqanku. Nirqankutaq: —Cheqaqtan Juanqa, mana ima señaltapas ruwarqanchu. Ichaqa, kay runamanta Juanpa llapan nisqanqa cheqaqmi karqan, nispanku.
[42] Hinan chaypi, askha runakuna Jesuspi iñikapurqanku.