[1] Hinaqtinmi Jesusqa, Olibos orqoman ripurqan.
[2] Ichaqa ancha tutallamantan Dios yupaychana wasiman kutimurqan. Hinan llapa runakuna paypa kasqanman hamurqanku. Paytaqmi tiyaykuspa yachachirqan.
[3] Hinaqtinmi, kamachikuy simita yachachiqkunapiwan, fariseokunapiwan, wasanchay huchapi hap'isqanku huk warmita apamurqanku. Hinan chawpipi sayaykuchirqanku.
[4] Nirqankutaq: —Yachachikuq, kay warmitan wasanchay hucha ruwashaqta hap'iramuyku.
[5] Chay hina warmikunataqa, rumiwan ch'aqespa wañuchinapaqmi Kamachikuy Simipi Moisesqa kamachiwarqanku. Chay hinaqa, ¿qanri imaninkitaq? nispanku.
[6] Imallapipas huchachanankupaqmi wateqaspanku, chaytaqa nirqanku. Jesustaq ichaqa, pampaman k'umuykuspan, dedonwan hallp'api qelqasharqan.
[7] Ichaqa sinchita tapupayaqtinkutaq, sayarispan paykunata nirqan: —Mayqenniykichispas mana huchayoq kaq, ñawpaqta kay warmita rumiwan ch'aqechun, nispa.
[8] Yapamanta pampaman k'umuykuspantaq, hallp'api qelqashallarqantaq.
[9] Ichaqa chayta uyarispankutaq, konsiensiankupi huchachasqa karqanku. Hinan aswan kurakkunamanta qallarispa, qhepa kaqkunakama, ch'ulla ch'ullallamanta lloqsipurqanku. Hinan Jesusqa sapallanña, hinallataq chawpipi sayashaq warmillapiwanña qhepakurqanku.
[10] Hinaqtinmi Jesusqa sayarispa, mana pitapas rikurqanñachu. Aswanpas warmillataña qhawarispanmi, nirqan: —Warmi, ¿maypitaq huchachaqniykikunari kashanku? ¿Manachu pipas huchachasunki? nispa.
[11] Warmitaqmi nirqan: —Señor, manan pipas huchachawanchu, nispa. Hinaqtinmi Jesusqa payta nirqan: —Manan ñoqapas huchachaykichu. Ripuy, hinaspa kunanmantaqa amaña huchallikuyñachu, nispa.
[12] Hinan Jesusqa, wakmanta fariseokunata rimaykuspan nirqan: —Ñoqan, kay pachaq k'anchayninqa kani. Pipas ñoqata qatikuwaqqa, manan hayk'aqpas laqha-tutayaqpi purinqachu. Aswanpas kawsay qokuq k'anchayniyoqmi kanqa, nispa.
[13] Hinaqtinmi fariseokunaqa, payta nirqanku: —Qanqa kikiykimantan willakunki. Willakuyniykitaqmi ichaqa, mana cheqaqchu, nispanku.
[14] Jesustaq kutichispan, paykunata nirqan: —Maymantachus hamurqani, hinallataq maymanchus rishani, chaytaqa yachanin. Chaymi, hinaña ñoqa kikiymanta willakuni chaypas, willakuyniyqa cheqaqpuni. Qankunan ichaqa, maymantachus hamuni, maymantaqchus rishani, chaytaqa mana yachankichischu.
[15] Qankunaqa, runakunaq yuyaykusqankuman hinallan chaninchankichis. Ñoqan ichaqa, mana pitapas chaninchanichu.
[16] Manan ñoqaqa sapallaychu kashani. Aswanpas ñoqaqa, kachamuwaqniy Yayawanmi kashani. Chaymi, sichus ñoqa chaninchani chaypas, chaninchayniyqa cheqaqpuni.
[17] Hinallataq Kamachikuy Simi qelqaykichispipas qelqasqan kashan: ‘Iskay qharikunaq willakuyninqa cheqaqpunin,’ nispa.
[18] Kikiymanta willakuqqa ñoqan kani. Kachamuwaqniy Yayapas ñoqallamantataqmi willakullantaq, nispa.
[19] Hinaqtinmi Jesusta nirqanku: —¿Maypitaq Yayaykiri kashan? nispanku. Jesustaq kutichirqan: —Manan ñoqatapas reqsiwankichischu. Nillataq Yayaytapas reqsinkichischu. Sichus ñoqata reqsiwankichisman karqan chayqa, Yayaytapas reqsiwaqchismi karqan, nispa.
[20] Dios yupaychana wasipi, maypichus ofrendakuna churana cheqaspi yachachishaspanmi, chay simikunata Jesusqa rimarqan. Hap'inanku orasqa manaraqmi chayamusqachu karqan. Chayraykun mana pipas payta hap'irqanraqchu.
[21] Wakmantataqmi Jesusqa paykunata nirqan: —Ñoqaqa ripusaqmi, hinan qankunaqa maskhawankichis. Ichaqa huchaykichispin wañunkichis. Maymanchus risqaymanqa, manan hamuyta atiwaqchischu, nispa.
[22] Hinaqtinmi judío runakunaqa nirqanku: —Nishanmi: ‘Maymanchus risqaymanqa, manan hamuyta atiwaqchischu,’ nispan. Chay hinaqa, ¿pay kikintachu wañuchikunqa? nispanku.
[23] Jesustaq paykunata nirqan: —Qankunaqa hallp'a pachamantan kankichis. Ñoqataq, hanaq pachamanta kani. Qankunaqa kay pachamantan kankichis. Ñoqan ichaqa, mana kay pachamantachu kani.
[24] Sichus Ñoqa kasqayta mana iñinkichischu chayqa, huchaykichispin wañupunkichis. Chaymi nirqaykichis: ‘Huchaykichispin wañupunkichis’, nispay’ nispa.
[25] Hinaqtinmi Jesusta nirqanku: —¿Qanri pitaq kanki? nispanku. Hinan Jesusqa paykunata nirqan: —Qallariymantapachan, pichus kasqaytaqa nirqaykichis.
[26] Askha imaymanakunan qankunamanta ninaypaq, hinallataq chaninchanaypaq kapushawan. Kachamuwaqniymi ichaqa, cheqaqpuni. Ñoqataqmi, paymanta uyarisqayta kay pachapi runaman nini, nispa.
[27] Ichaqa manataqmi Yayamanta Jesuspa paykunaman rimasqanta entiendirqankuchu.
[28] Hinaqtinmi Jesusqa, paykunata nirqan: —Maypachachus Runaq Churinta hoqarinkichis, chayñan pichus ñoqa kasqaytaqa yachankichis. Hinallataq, mana imatapas ñoqaq kikillaymanta ruwasqayta, aswanpas imaynatachus Yayayqa yachachiwasqanman hinapuni rimasqaytapas yachankichis.
[29] Ñoqaqa, imachus Yayayta kusichin, chaytapunin ruwani. Chayraykun, kachamuwaqniy Yayayqa ñoqawanpuni kashan. Manataqmi sapallaytachu saqerpariwan, nispa.
[30] Jesús chaykunata rimashanankamataqmi, askha runakuna paypi iñikapurqanku.
[31] Hinaqtinmi Jesusqa, judío runakunamanta pikunachus paypi kreesqaku karqan, paykunata nirqan: —Sichus rimasqaykunapi takyankichis chayqa, cheqaqmantapunin yachachisqaykuna kankichis.
[32] Hinan cheqaq kaqta reqsinkichis. Cheqaq kaqtaqmi kacharichisunkichis, nispa.
[33] Paykunataq kutichispa nirqanku: —Abrahampa mirayninkunan kayku. Manataqmi hayk'aqpas piqpa kamachinpas karqaykuchu. ¿Imaynataq qanri ninki: ‘Kacharichisqan kapunkichis,’ nispari? nispanku.
[34] Jesustaq paykunaman kutichirqan: —Cheqaqta, cheqaqtan niykichis: ‘Hayk'an huchallikuspallapuni kashaqqa, huchaq kamachinmi,’ nispay.
[35] Kamachi runaqa, manan wasipi wiñaypaqchu takyan. Churitaqmi ichaqa, wiñaypaq takyan.
[36] Chay hinaqa, sichus Churi kacharichisunkichisman chayqa, cheqaqmantapunin kacharichisqa kawaqchis.
[37] Abrahampa mirayninkuna kasqaykichistaqa yachanin. Ichaqa rimasqaymi, mana qankunapi kabinchu. Chayraykun wañuchiwaytapuniqa munashankichis.
[38] Ñoqaqa, Yayaywan kashaspa rikusqaytan rimani. Qankunataq ichaqa, imatachus taytaykichismanta uyarisqaykichista ruwankichis, nispa.
[39] Kutichispankutaq Jesusta nirqanku: —Taytaykuqa Abrahammi, nispanku. Jesustaq paykunata nirqan: —Sichus Abrahampa wawankuna kawaqchis chayqa, Abrahampa ruwayninkunatan ruwawaqchis.
[40] Kunantaq ichaqa, ñoqa Diosmanta uyarisqay cheqaq kaq rimapayaqniykichis runata wañuchiytapuni munashawankichis. Chaytaqa, manapunin Abrahamqa ruwarqanchu.
[41] Hinallataq qankunaqa, taytaykichispa ruwayninkunatan ruwankichis, nispa. Hinaqtinmi paykunaqa Jesusta nirqanku: —Ñoqaykuqa manan qhellipi puriymanta naseqchu kayku. Ch'ullallan Taytaykuqa, payqa Diosllapunin, nispanku.
[42] Hinaqtinmi Jesusqa, paykunata nirqan: —Ñoqaqa, Diosmantan lloqsimurqani, hinallataq hamurqani. Manan ñoqaqa kikiymantachu hamurqani, aswanpas Yayaymi kachamuwarqan. Chayrayku, sichus Diospuni taytaykichis kanman chayqa, munakuwankichismanmi.
[43] ¿Imanaqtintaq nisqaytari mana entiendinkichischu? Qankunaqa manan simiyta uyarinkichischu, chaymi mana entiendinkichischu.
[44] Qankunaqa, taytaykichis saqramantan kankichis. Chaymi taytaykichispa mana allin munasqankunata ruwayta munankichis. Paypiqa manan cheqaq kaqqa kanchu. Chayraykun, payqa qallariymantapacha runa wañuchiq karqan. Nitaqmi cheqaq kaqpipas takyarqanchu. Payqa llullan, hinallataq llullakuypa taytanmi. Chayraykun, llullakuspa riman chayqa, paypa kaqkunamanta riman.
[45] Ichaqa, qankunaman cheqaq kaqta nisqayraykutaqmi, ñoqataqa mana kreewankichischu.
[46] ¿Qankunamanta mayqenniykichistaq huchayoqtari tariwankichisman? Cheqaq kaqtataq nini chayqa, ¿imanaqtintaq manari kreewankichischu?
[47] Pipas Diosmanta kaqqa, Diospa nisqan kunatan uyarin. Qankunaqa manan Diosmantachu kankichis. Chayraykun qankunaqa, Diospa nisqankunata mana uyarinkichischu, nispa.
[48] Judío runakunataqmi kutichispanku, Jesusta nirqanku: —Ñoqaykuqa niykikun: ‘Qanqa Samaria probinsiamantan kanki, hinallataq supayniyoqmi kashanki,’ nispayku. ¿Chay nisqaykuri, manachu allin? nispanku.
[49] Jesustaq kutichirqan: —Manan supayniyoqchu kashani. Aswanmi, ñoqaqa Yayayta allinpaq hap'ini. Qankunataqmi ichaqa, ñoqata mana allinpaq hap'iwankichis.
[50] Ñoqaqa manan hatunchasqa kaytachu maskhani. Hatunchasqa kanayta maskhaqpas chaninchaqpas Yayaymi.
[51] Cheqaqta, cheqaqtan niykichis: ‘Sichus pipas simiyta hunt'anqa chayqa, manapunin hayk'aqpas wiñaypa wiñayninpaq wañuytaqa rikunqachu,’ nispay, nispa.
[52] Hinaqtinmi judío runakunaqa, Jesusta nirqanku: —¡Kunanqa, supayniyoq kashasqaykita yachaykun! Abrahampas, Diospa rantinpi rimaqkunapas wañukapurqankun. Qantaq ninki: ‘Sichus pipas simiyta hunt'anqa chayqa, manapunin hayk'aqpas wiñaypa wiñayninpaq wañunqachu,’ nispayki.
[53] ¿Qanri, wañukapuq taytayku Abrahammanta, hinallataq Diospa rantinpi rimaqkuna wañukapuqlla kaqkunamantapas aswan allinchu kanki? ¿Pimantaq qanri tukunki? nispanku.
[54] Jesustaq kutichirqan: —Sichus ñoqa kikiyta allinpaq hap'ikuni chayqa, allinpaq hap'ikuyniyqa manan imapaschu. Allinpaq hap'iwaqniyqa Yayaymi. Qankunapas paytan ninkichis: ‘Diosniykun’ nispaykichis.
[55] Qankunaqa, manataqmi payta reqsirqankichischu. Ñoqan ichaqa, payta reqsini. Sichus manan reqsinichu niyman chayqa, qankuna hina llullan kayman. Ñoqan ichaqa, payta reqsini, hinallataq simintapas hunt'ani.
[56] Taytaykichis Abrahamqa, p'unchayniyta rikunan kaqtinmi, anchata kusikurqan. Rikurqantaqmi kanpas, hinan kusikurqan, nispa.
[57] Judío runakunataq payta nirqanku: —Manaraqmi phisqa chunka watayoqpasraqchu kashanki. ¿Chaychu, Abrahamtari rikuwaq karqan? nispanku.
[58] Jesustaq paykunata nirqan: —Cheqaqta, cheqaqtan niykichis: ‘Manaraq Abrahampas kashaqtinmi, Ñoqaqa kani,’ nispay, nispa.
[59] Hinan Jesusta ch'aqenankupaq rumikunata hoqarikurqanku. Jesustaqmi ichaqa, pakakurqan, hinaspa Dios yupaychana wasimanta lloqsirqan. Hinan paykunaq chawpinkuta pasaspa, lloqsipurqan.