[1] Pasashaspantaqmi Jesusqa, nasesqanmantapacha huk ñawsa runata rikurqan.
[2] Yachachisqankunataq Jesusta tapuspa nirqanku: —Rabí, ¿ñawsa nasenanpaqri, pitaq huchallikurqan? ¿Kay runachu, ichari tayta-mamanchu huchallikurqan? nispanku.
[3] Jesustaq kutichirqan: —Manan kay runachu huchallikurqan, nitaq taytamamanpaschu huchallikurqanku. Aswanpas, Diospa ruwayninkuna paypi rikuchisqa kananpaqmi, kay hina karqan.
[4] P'unchayraq kashanankamaqa, kachamuwaqniypa ruwayninkunata ruwanayqa nesesariopunin. Tutataqmi ichaqa, hamushanña. Chaymi manaña pipas llank'ayta atinqañachu.
[5] Ñoqa kay pachapi kashanaykamaqa, kay pachaq k'anchayninmi kani, nispa.
[6] Chayta nispataqmi, hallp'a pampaman thoqarqan, hinan thoqayninwan t'uruta ruwarqan. Chaywantaq ñawsa runaq ñawinta llusiykurqan.
[7] Hinan payta nirqan: —Siloé p'uytupi mayllikamuq riy, nispa. Chaymi ñawsa runaqa rispan, mayllikamurqan. Hinan qhawaripuspaña kutimpurqan. ‘Siloé’ ninantaqa ‘kachasqa’ ninantan nin.
[8] Hinaqtinmi wasimasinkunapas, ñawpaqta ñawsa kasqanta reqsiqkunapas nirqanku: —¿Mañachu kay runaqa, tiyaykuspa mañapakuq runa kashan? nispanku.
[9] Hukkunan nirqanku: —Paymi, nispanku. Wakintaqmi nirqanku: —Manan. Ichaqa paymanmi rikch'akun, nispanku. Paytaq nirqan: —Ñoqan kani, nispa.
[10] Hinaqtinmi payta nirqanku: —¿Imaynapitaq ñawiykiri kicharisqa karqan? nispanku.
[11] Paytaq kutichispa nirqan: —Jesús sutiyoq runan, t'uruta ruwasqanwan ñawiyta llusiyku- warqan. Niwarqantaq: ‘Siloé p'uytuman riy hinaspa mayllikamuy,’ nispa. Hinan rispa mayllikamuqtiy, qhawaripurqani, nispa.
[12] Hinaqtinmi payta nirqanku: —¿Maypitaq payri kashan? nispanku. Paytaq nirqan: —Manan yachanichu, nispa.
[13] Hinan ñawpaq ñawsa kasqa karqan, chay runata fariseokunaq kasqankuman aparqanku.
[14] T'uruta ruwaspan, ñawsa runaq ñawinta Jesuspa kicharichisqan, chay p'unchayqa sábado p'unchaymi karqan.
[15] Hinaqtinmi, fariseokunaqa imaynamantachus qhawaripurqan, chayta wakmanta payta tapullarqankutaq. Hinan paykunata nirqan: —Payqa t'uruwanmi ñawiy pataman churawarqan, hinan mayllikamuqtiy qhawaripuni, nispa.
[16] Hinaqtinmi, wakin fariseokunaqa nirqanku: —Kay runaqa manamá sabado p'unchayta waqaychashanchu. Chaymi kay runaqa, mana Diosmantachu hamun, nispanku. Wakintaq ichaqa nirqanku: —¿Imaynataq huk huchasapa runa kay hina señalkunatari ruwayta atinman? nispanku. Hinan paykunapurapi, t'aqanakuy karqan.
[17] Hinaqtinmi wakmanta ñawsa runata nirqanku: —¿Qanri, ñawiykita kichariq runamanta imaninkitaq? nispanku. Paytaq nirqan: —Payqa Diospa rantinpi rimaqmi, nispa.
[18] Judío runakunataqmi ichaqa, qhawaripuq runaq taytamamanta waqyamunankukama, chay runa ñawsa kashaspa, qhawaripusqanta mana kreerqankuchu.
[19] Hinan paykunata tapuspanku nirqanku: —¿Ñawsan naserqan nisqaykichis wawaykichis paychu? ¿Imanaqtintaq kunanri qhawaripun? nispanku.
[20] Tayta-mamantaq kutichispa, paykunata nirqanku: —Payqa, wawaykupuni kasqanta, hinallataq ñawsa nasesqantapas yachaykun.
[21] Imaynatachus kunan qhawaripun, chaytan ichaqa mana yachaykuchu. Otaq pichus ñawinta kicharirqan chaytapas manallataqmi yachaykuchu. Yuyayniyoqñan. Payta tapuychis, hinan pay kikin rimarinqa, nispanku.
[22] Tayta-mamanqa, judío runakunata manchakusqankuraykun chayta nirqanku. Ñan judío runakunaqa rimanakusqakuña karqan: ‘Sichus pipas Jesuspa Mesías kasqanta rimarirunqa, chayqa, judío runakunaq huñukunanku wasimanta qarqosunchis,’ nispanku.
[23] Chaymi tayta-mamanqa nirqanku: ‘Yuyayniyoqñan. Payta tapuychis,’ nispanku.
[24] Hinaqtinmi ñawsa kasqa karqan chay runata wakmanta waqyamuspa nirqanku: —¡Diosta hatunchay! Ñoqaykuqa, chay runaq huchasapa kasqanta yachaykun, nispa.
[25] Hinaqtinmi payqa kutichispa nirqan: —Huchasapachus, icha manachus chaytaqa, manan yachanichu. Ichaqa kayllatan yachani: Ñawsa kashaspaymi, kunanqa qhawaripuni, nispa.
[26] Hinan wakmanta payta nirqanku: —¿Imatataq ruwarqasunkiri? ¿Imaynatataq ñawiykitari kicharirqasunki? nispanku.
[27] Paytaq paykunaman kutichirqan: —Ñan niykichisña, qankunataqmi mana uyariwankichischu. ¿Imanaqtintaq wakmanta uyariytari munashankichis? ¿Qankunapas yachachisqankuna kapuytachu munashankichis? nispan.
[28] Hinan payta k'amirqanku. Nirqankutaq: —¡Qanqa paypa yachachisqanmi kanki! ¡Ñoqaykun ichaqa, Moisespa yachachisqankuna kayku!
[29] Diospa Moisesman rimaykusqanta ñoqaykuqa yachaykun. Chay runa maymantachus kasqantan ichaqa, mana yachaykuchu, nispanku.
[30] Chay runataq kutichispan, paykunata nirqan: —Maymantachus kasqanta qankunaqa manan yachankichischu. ¡Chayqa utirayanapaqmá! Ñoqatataqmi ichaqa, ñawiyta kichariwarqan.
[31] Diosqa, manan huchasapakunata uyarinchu. Chaytaqa yachanchistaqmi. Aswanpas, pipas Diosta manchakuqta, hinallataq munaynin ruwaqtan, payqa uyarin.
[32] Nasesqanmantapacha ñawsa runata pipas ñawinkuna kichariqmantaqa, qallariymantapachan manapuni hayk'aqpas uyarikurqanchu.
[33] Sichus chay runa mana Diosmantachu hamunman chayqa, manapunin imatapas ruwayta atinmanchu, nispa.
[34] Paykunataq kutichispa nirqanku: —Qanqa huchapipunin naserqanki. ¿Qantaqchu yachachiyta munashawankiku? nispanku. Hinan judío runakunaq huñukunanku wasimanta payta qarqopurqanku.
[35] Chay runata qarqopusqankutan Jesusqa uyarirqan. Hinan payta tarispan tapurqan: —¿Diospa Churinpi qan iñinkichu? nispa.
[36] Paytaq kutichispan nirqan: —Señor, ¿paypi iñinaypaq, pitaq payri? nispa.
[37] Jesustaq payta nirqan: —Rikurqankiñan. Hinaqa pichus qanwan rimashan paymi, nispa.
[38] Chay runataq nirqan: —¡Señor, iñinin! nispa. Hinan qonqoriykukuspa, Jesusta yupaycharqan.
[39] Jesustaq nirqan: —Huchachanaypaqmi kay pachamanqa hamurqani. Mana rikuqkuna, qhawaripunankupaq, rikuqkunañataq ichaqa ñawsayachisqa kanankupaqmi hamurqani, nispa.
[40] Chayta uyarispankutaq, Jesuswan kashaq wakin fariseokunaqa payta nirqanku: —¿Ñoqaykupas ñawsallataqchu kayku? nispanku.
[41] Jesustaq paykunata nirqan: —Sichus ñawsa kawaqchis chayqa, manan huchayoqchu kawaqchis. Kunantaq ichaqa ninkichis: ‘Rikushaykun,’ nispaykichis. Chaymi huchaykichiskunaqa qankunapipuni takyan, nispa.