[1] Chay imaymanakunatan Jesusqa rimarqan. Hinan hanaq pachata qhawarispa nirqan: —Yayay, oraqa chayamunñan. Churiyki qanta hatunchananpaq, Churiykita hatunchay.
[2] Imaynan llapallan qosqaykikunaman wiñay kawsayta qonanpaq, llapa runakunata kamachinanpaq kamachikuyniyoq kayta Churiykiman qorqanki, chay hinallatataq Churiykita hatunchay.
[3] Wiñay kawsayqa kaymi: Qan sapallayki cheqaq Diosta, hinallataq pitachus kachamusqayki Jesucristota reqsinankun.
[4] Ñoqaqa, hallp'a pachapi hatuncharqaykin. Hinallataq ruwanaypaq ruwana qowasqaykitapas tukuniñan.
[5] Kunantaq Yayay, manaraq kay pachapas kashaqtin, qanpa qayllaykipi hatunchasqa kayniy kapuwarqan, chay hatunchaywanpuni kikin qayllaykipi hatunchaway.
[6] Kay pachamanta qowasqayki runakunamanmi sutiykita sut'incharqani. Qanpan karqanku, ichaqa ñoqamantaqmi qopuwarqanki. Hinan simiykita kasukurqanku.
[7] Tukuy imaymana qowasqayki qanmanta hamusqanta, kunanqa yachankun.
[8] Ñoqaqa, qowasqayki simikunatan paykunaman qorqani, paykunataqmi chaskikurqanku. Hinan cheqaqtapuni qanmanta hamusqayta yacharqanku. Hinallataqmi qanpa kachamuwasqaykita kreerqanku. Chaymi tukuy imaymanakuna qanmanta hamusqanta yachanku.
[9] Manan kay pacha runakunaraykuchu mañakuyki. Aswanqa qowasqayki runakunaraykun mañakuyki. Paykunaqa, qanpan kanku, chayraykun ñoqaqa qowasqaykikunarayku mañakuyki.
[10] Tukuy ñoqaq kaqqa qanpan, hinallataq tukuy qanpa kaqpas ñoqaqmi. Paykunapitaqmi hatunchasqa karqani.
[11] Manañan kay pachapiñachu kashani, paykunan ichaqa, kay pachapiraq kashanku. Ñoqaqa qanmanmi hamushani. Ch'uya Yayay, imaynan ñoqanchis kanchis, chay hina ch'ullalla kanankupaq, qowasqaykikunata sutiykipi waqaychaykuy.
[12] Ñoqa paykunawan kay pachapi kashaspayqa, sutiykipin paykunataqa waqaychasharqani. Qowasqaykikunataqa waqaycharqanin. Hinan manapuni mayqellanpas chinkarqankuchu. Aswanpas Qelqaq hunt'akunanpaqmi, chinkay churilla chinkarqan.
[13] Kunanmi ichaqa, qanman hamushani. Ancha kusikuyniy paykuna kikinkupi hunt'asqa kananpaqmi, chaytaqa kay pachapi rimani.
[14] Ñoqaqa simiykitan paykunaman qorqani. Ichaqa imaynan ñoqapas mana kay pachamantachu kani, chay hinallataqmi paykunapas mana kay pachaqñachu kanku. Chayraykun kay pachapi runakunaqa paykunata cheqnikurqanku.
[15] Manan kay pachamanta paykunata qechupunaykipaqchu mañakuyki. Aswanpas mana allin kaqmanta waqaychaykunaykipaqmi mañakuyki.
[16] Imaynan ñoqapas mana kay pachamantachu kani, chay hinallataqmi paykunapas, mana kay pachaqñachu kanku.
[17] Paykunataqa cheqaq kaqpi ch'uyanchaykuy. Simiykiqa cheqaqpunin.
[18] Imaynan qan kay pachaman kachamuwarqanki, chay hinallatataqmi ñoqapas paykunata kay pachaman kacharqani.
[19] Paykunapas cheqaq kaqpi Diospaq t'aqasqa kanankupaqmi, paykunarayku ñoqa kikiytapas Diospaq t'aqakuni.
[20] Ichaqa manan paykunallapaqchu mañakuyki. Aswanpas paykunaq rimarisqankuq chawpinta chayraq ñoqapi iñikapuqkunapaqwanmi mañakuyki.
[21] Yayay, llapallanku ch'ullalla kanankupaqmi mañakuyki. Imaynan qanpas ñoqapi, hinallataq ñoqapas qanpi ch'ullalla kanchis, chay hinallataqmi paykunapas ñoqanchispi ch'ullalla kanankupaq mañakuyki. Chay hinapin, kay pacha runakunaqa qanpa kachamuwasqaykita kreenqaku.
[22] Imaynan ñoqanchispas ch'ullallapuni kanchis, chay hina ch'ullallapuni kanankupaqmi, ñoqaqa hatun k'anchariy qowasqaykita paykunaman qorqani.
[23] Chayllaraq ñoqapi iñikapuqkunata k'apakta hukllachanaykipaqmi, ñoqaqa yachachisqaykunapi kashani, qantaq ñoqapi kashanki. Kay pacha runakunaman kachamuwasqaykita yachanankupaq, hinallataq imaynatachus munakuwarqanki, chay hinata paykunatapas munakusqaykita yachanankupaqmi, ñoqaqa yachachisqaykunapi kashani, qantaq ñoqapi kashanki.
[24] Yayay, manaraq kay pachapas kamasqa kashaqtinmi munakuwarqanki. Chaymi qowasqayki k'anchariyniyta rikunankupaq, maypichus ñoqa kashani, chayllapitaq qowasqaykikunapas ñoqawan kuska kanankutaqa munani.
[25] Chanin Yayay, kay pacha runakunaqa manan reqsirqasunkichu, ñoqan ichaqa reqsirqayki. Yachachisqaykunapas kachamuwasqaykitaqa yachallarqankutaqmi.
[26] Munakuwasqayki munakuy paykunapi kananpaq, hinallataq ñoqapas paykunapi kanaypaqmi sutiykitaqa paykunaman sut'incharqani. Chaymantapas sutiykitaqa sut'inchasaqraqmi kanpas, nispa.