[1] Hinan Betania llaqtamanta, Lázaro sutiyoq huk runa onqosqa kasharqan. Betania llaqtaqa, Maríaq hinallataq ñañan Martaq llaqtankun karqan.
[2] Mariaqa, Señorta q'apashaq hawinawan hawiqmi karqan. Hinallataq chakinkunatapas chukchanwan ch'akichiqmi karqan. Onqosqa kashaq Lazarotaqmi, Maríaq turan karqan.
[3] Hinaqtinmi Lázaroq panankunaqa, willaqta Jesusman kacharqanku. Chay willaqtaqmi nirqan: —Señor, qhawarillaypas, pichus munakusqaykiqa, onqosqan kashan, nispa.
[4] Jesustaqmi chayta uyarispa nirqan: —Chay onqoyqa manan wañuchinanpaqchu, aswanpas Dios hatunchasqa kananpaqmi. Hinallataq chay onqoypa chawpinta, Diospa Churin hatunchasqa kananpaqmi, nispa.
[5] Jesusqa Martatapas, ñañantapas, Lazarotapas munakurqanmi.
[6] Lázaroq onqosqa kashasqanta uyarispantaqmi, iskay p'unchaytawanraq Jesusqa maypichus kashasqanpi qhepakurqan.
[7] Chay qhepata- taqmi, Jesusqa yachachisqankunata nirqan: —Judea probinsiaman wakmanta hakuchis, nispa.
[8] Yachachisqankunataq Jesusta nirqanku: —Rabí, qaynallataq judío runakunaqa rumiwan ch'aqeytapuni munasharqasunkiku. ¿Chaychu, wakmanta riyta munashallankitaq? nispanku.
[9] Jesustaq kutichirqan: —¿Manachu intiqa chunka iskayniyoq orasta k'anchan? Sichus pipas p'unchaypi purin chayqa, kay pachaq k'anchayninta rikusqanraykun, mana misk'akunchu.
[10] Sitaqchus pipas tutayaqpi purin chayqa, paypi k'anchay mana kasqanraykun, misk'akun, nispa.
[11] Chay imaymanakuna nisqan qhepatataqmi paykunata nirqan: —Amigonchis Lazaroqa puñushallanmi. Ichaqa rikch'arichimunaypaqmi risaq, nispa.
[12] Hinaqtinmi yachachisqankunaqa nirqanku: —Señor, sichus puñushallan chayqa, qhaliyachisqan kanqa, nispanku.
[13] Jesusqa, Lázaroq wañusqanmantan chayta nisqa karqan. Paykunataqmi ichaqa, puñuspa samanamanta ninanpaq yuyaykurqanku.
[14] Chay hinaqa, chaymantañan Jesusqa sut'itapuni paykunaman nirqan: —Lazaroqa wañukapunmi.
[15] Ñoqaqa manan chaypichu kasharqani, chaymantan kusikuni. Qankunapas ñoqapi kreenaykichismantan kusikuniqa. Ichaqa payman hakuchis, nispa.
[16] Hinaqtinmi Dídimo sutiyoq Tomasqa, yachachisqamasinkunata nirqan: —Ñoqanchispas paywan kuska wañukanpunanchispaq haku risunchis, nispa.
[17] Jesusqa Betania llaqtamanmi chayarqan. Hinan Lazarota, aya p'ampana t'oqopi tawa p'unchayña kashaqta tarirqan.
[18] Betania llaqtaqa, Jerusalén llaqtaq qayllanpin kasharqan. Yaqapas chunka phisqayoq estadiokuna hinan kasharqan.
[19] Askha judío runakunataqmi, Martatawan, Mariatawan, turankumanta sonqochanankupaq risqaku karqan.
[20] Hinaqtinmi Martaqa, Jesuspa hamushasqanta uyariruspan, payta chaskinanpaq lloqsirqan. Mariataq ichaqa, wasillapi qhepakurqan.
[21] Hinan Martaqa, Jesusta nirqan: —Señor, sichus kaypi kashawaq karqan chayqa, turayqa manan wañunmanchu karqan.
[22] Kunantaq ichaqa, Diosmanta tukuy mañakusqaykita, Diospa qonasunkitapas yachanin, nispa.
[23] Jesustaq payta nirqan: —Turaykiqa kawsarimpunqan, nispa.
[24] Martataq, Jesusta nirqan: —P'uchukay p'unchay kawsarimpuypi, pay kawsarimpunantaqa yachanin, nispa.
[25] Jesustaqmi payta nirqan: —Ñoqan kawsarimpuypas, kawsaypas kani. Pipas ñoqapi iñiqqa, wañukapunqaña chaypas kawsashallanqapunin.
[26] Hinallataqmi, lliw pipas kawsaqqa, hinallataq ñoqapi iñiqqa, manapunin wiñaypaq wañunqañachu. ¿Chayta kreenkichu? nispa.
[27] Martataq payta nirqan: —Arí, Señor. Kay pachaman hamuq, Diospa Churin Cristopuni kasqaykita ñoqaqa iñirqanin, nispa.
[28] Chayta nispantaqmi Martaqa, rispan ñañan Mariata waqyamurqan. Hinan pakallapi nirqan: —Yachachikuqmi kaypi kashan, hinan waqyamushasunki, nispa.
[29] Chayta uyarispantami payqa, usqhaylla sayarispa, Jesuspa kasqanman rirqan.
[30] Jesusqa manaraqmi llaqtaman chayasqachu karqan. Aswanpas maypichus Marta tarirqan chayllapiraqmi kasharqan.
[31] Hinan, wasipi Mariawan kashaq judío runakuna payta sonqochasharqanku. Paykunataqmi Mariaq usqhaylla sayarispa lloqsisqanta rikuspanku, qhepanta rillarqankutaq. Hinan nirqanku: —Aya p'ampana t'oqopi waqamunanpaqmi rishan, nispanku.
[32] Chaymantataqmi Mariaqa, maypichus Jesuspa kashasqanman chayarqan. Rikuruspantaq, Jesuspa chakinman qonqoriykukuspa payta nirqan: —Señor, sichus kaypi kawaq karqan chayqa, turayqa manan wañunmanchu karqan, nispa.
[33] Hinan Jesusqa, Mariata waqashaqta, hinallataq paywan kuska hamuq judío runakunatapas waqashaqta rikurqan. Chayta rikuspantaqmi, espiritunpi sonqon phoq-nirqan, hinaspan anchatapuni llakikurqan.
[34] Hinan nirqan: —¿Maymanmi payta churarqankichis? nispa. Paykunataq nirqanku: —Señor, hamuy hinaspa qhawaykuy, nispanku.
[35] Jesustaqmi waqarqan.
[36] Hinaqtinmi judío runakunaqa nirqanku: —¡Qhawariychis! ¡Imaynatapunin payta munakurqan! nispanku.
[37] Wakinninkutaq ichaqa, nirqanku: —Kay runaqa, ñawsaq ñawintapas kicharirqanmi. ¿Manachu Lázaroq ama wañunanpaq imallatapas ruwayta atinman karqan? nispanku.
[38] Hinan Jesusqa, wakmanta sonqonpi phoq-nisqa, aya p'ampana t'oqoman rirqan. Chay aya p'ampana t'oqoqa, qaqapi t'oqosqan karqan. Punkuntaqmi, rumiwan wisq'asqa kasharqan.
[39] Jesusmi nirqan: —Rumita achhurichiychis, nispa. Wañuqpa panan Martataqmi, Jesusta nirqan: —Señor, tawa p'unchayñan pasarqon. Chay hinaqa asnashanñachá, nispa.
[40] Jesustaqmi payta nirqan: —¿Manachu nirqayki: ‘Sichus iñinki chayqa, Diospa hatun atiynintan rikunki’ nispay? nispa.
[41] Hinaqtinmi, maymanchus wañusqata churarqanku, chaymanta rumita achhurichirqanku. Jesustaqmi wichayta qhawarispan nirqan: —Yayay, uyariwasqaykiraykun grasiasta qoyki.
[42] Ñoqataqa uyariwankipunin. Chaytaqa yacharqanin. Ichaqa muyuriqpi ancha askha runakunaq kasqankuraykun, kachamuwasqaykita kreenankupaq chaytaqa nirqani, nispa.
[43] Chayta nispantaqmi, kunkayoqta qaparirqan: —¡Lázaro, hawaman lloqsimuy! nispa.
[44] Hinan wañusqa kashaqqa, chakinkunapas, makinkunapas k'uyunawan k'uyusqa, hinallataq uyanpas pañowan k'uyusqa lloqsimurqan. Hinan Jesusqa paykunata nirqan: —Paskaychis, hinaspa ripullachun, nispa.
[45] Hinan Mariaman hamuq askha judío runakunapas, Jesuspa ruwasqanta rikuspanku, paypi iñikapurqanku.
[46] Paykunamanta wakinninkutaqmi ichaqa, fariseokunaman rispa, Jesuspa ruwasqanta willamurqanku.
[47] Hinaqtinmi umalliq saserdotekunapiwan, fariseokunapiwan Konsilio Sanedrinta huñunachirqanku. Hinan nirqanku: —Chay runaqa, askha señalkunatan ruwashan. ¿Imatataq ruwasunchisri?
[48] Sichus hinallata ruwachisunchis chayqa, llapachá paypi iñinqaku. Hinaqtinchá Roma llaqtamanta runakuna hamuspanku ch'uya cheqasninchistapas, suyunchistapas qechuwasunchis, nispanku.
[49] Ichaqa, paykunamanta hukninku Kaifásmi, hatun umalliq saserdote chay watapi kasharqan. Hinan Kaifasqa paykunata nirqan: —Qankunaqa manan imatapas yachankichischu.
[50] Ñoqanchispa allinninchispaq huk runalla llaqtantin runapaq wañunantapas manataqmi yuyaykunkichischu. Chay hinapin suyuntin runa mana chinkanqachu, nispa.
[51] Chaytataqmi ichaqa, mana pay kikillanmantachu nisharqan. Aswanpas chay watapi hatun umalliq saserdote kaspanmi, suyuntinrayku Jesuspa wañunanmantaña profetisasharqan.
[52] Manataqmi suyuraykullachu wañunan karqan, aswanpas ch'eqechisqa kashaq Diospa wawankunata ch'ullallaman huñunanpaqmi wañunanqa karqan.
[53] Chay hinaqa, chay p'unchaymantapachan, Konsilio Sanedrinqa Jesusta wañuchinankupaq rimanakurqanku.
[54] Chaymi, Jesusqa judío runakuna ukhupi manaña alayritañachu purirqan. Aswanmi chaymanta, ch'inniqpa qayllanpi suyuman ripurqan. Efraín sutiyoq llaqtamanmi ripurqan. Hinan yachachisqankunapiwan chaypi qhepakurqan.
[55] Judío runakunaq Paskua fiestankun qayllaykamusharqanña. Hinan chay suyumanta, askha runakuna manaraq judío runakunaq Paskua fiestanku chayamushaqtin, Jerusalén llaqtaman ch'uyanchakunankupaq wicharqanku.
[56] Dios yupaychana wasipi kashaspankutaq, Jesusta maskhasharqanku. Hinan hukkuna-hukkunawan ninakurqanku: —¿Qankunari, imaninkichistaq? ¿Manachu fiestaman hamunqa? nispanku.
[57] Jesusta hap'imunankupaqmi, umalliq saserdotekunapiwan, fariseokunapiwan kamachikusqaku karqan. Nirqankutaq: ‘Sichus pipas maypichus kashasqanta yachanqa chayqa, willakamuchun,’ nispanku.