[1] Paskua fiesta ñawpaqtan Jesusqa, kay pachamanta Yayaman pasananpaq oran chayamusqanta ña yacharqanña. Kay pachapi paypa kaqkunata munakuspanqa, p'uchukaykamapunin paykunataqa munakurqan.
[2] Mikhushaqtinkutaqmi, saqraqa, Judas Iskarioteq sonqonpi Jesusta hap'ichinanpaq churasqaña karqan. Judasqa, Simonpa churinmi karqan.
[3] Yayan, Jesuspa makinman tukuy imaymanakunata churarqan. Chaytan Jesusqa yacharqan. Hinallataq payqa, Diosmanta lloqsimusqantapas, Diosllamantaq ripushasqantapas yacharqanmi.
[4] Hinaqtinmi mikhusqanku qhepaman, Jesusqa sayarirqan. P'istunanta ch'ustikuspantaqmi, toallata hap'ispan, sinturanman watakurqan.
[5] Chaymantataqmi, puruñaman unuta hich'aspan, yachachisqankunaq chakinkuta maylliyta qallarirqan. Hinaspataqmi sinturanman watakusqan toallawan ch'akichirqan.
[6] Hinaqtinmi Simón Pedroq kasqanman chayarqan. Hinan Pedroqa payta nirqan: —Señor, ¿qanchu chakiyta maylliwanki? nispa.
[7] Jesustaq kutichispan payta nirqan: —Ñoqaq ruwasqayta, kunan qanqa manan entiendinkiraqchu. Ichaqa chaymantañan chaytaqa entiendinki, nispa.
[8] Pedrotaq payta nirqan: —¡Chakiytaqa, manapunin hayk'aqpas maylliwankimanchu! nispa Jesustaq payman kutichirqan: —Sichus mana mayllisaykichu chayqa, manan ñoqawanchu kanki, nispa.
[9] Simón Pedrotaq Jesusta nirqan: —Señor, chay hinaqa, ama chakillaytachu maylliway. Aswanpas makiytawan, umaytawan ima maylliway, nispa.
[10] Jesustaqmi payta nirqan: —Bañasqa kaqkunaqa, llapanmi llimphuyña kashan, chakillantañan mayllikunan. Ichaqa manaña llapaykichischu llimphuy kashankichis chaypas, qankunaqa, ñan llimphuyña kashankichis, nispa.
[11] Pichus hap'ichinan karqan, chaytaqa yacharqanmi. Chaymi nirqan: ‘Manan llapaykichischu llimphuy kashankichis,’ nispa.
[12] Chay hinaqa, chakinkuta mayllisqan qhepatataq, p'istunanta hap'irqan. Hinan wakmanta mesaman tiyaykuspan, paykunata nirqan: —¿Imatachus ruwarqaykichis, chayta entiendinkichischu?
[13] Qankunan niwankichis: ‘Yachachiq, hinallataq Señor,’ nispa. Arí, ñoqapunitaqmi kani. Chay hinaqa, allintan ninkichis.
[14] Chay hinaqa, sichus ñoqa Señorniykichis, hinallataq Yachachiqniykichis, chakiykichista mayllini chayqa, qankunapas hukkuna-hukkunawanmi chakiykichista mayllinakunaykichis.
[15] Imaynan ñoqapas ruwarqaykichis, chay hinata qankunapas ruwanaykichispaqmi ejemplota qoykichis.
[16] Cheqaqta, cheqaqtan niykichis: ‘Kamachiqa manan patronninmanta aswan allinpaq qhawarisqaqa kanmanchu. Nitaqmi kamachisqapas kachamuqninmanta aswan allinpaq qhawarisqaqa kanmanchu,’ nispay.
[17] Sichus chaykunata yachankichis chayqa, chaykunata ruwaspaykichismi, kusisamiyoqqa kankichis, nispa.
[18] Jesusqa nillarqantaqmi: —Manan llapaykichismantachu rimashani. Pikunatachus akllakurqani, chaytaqa yachanin. Qelqaqa ninmi: ‘Ñoqawan t'antata mikhuqmi, talonninta ñoqaq kontraypi hoqarirqan,’ nispa. (Sal. 41:9) Chay Qelqaq hunt'akunanpaqmi kayqa karqan.
[19] Manaraq chaykuna pasashaqtinmi, kunan nishaykichis. Maypachachus pasaqtin, ñoqa kasqayta kreenaykichispaqmi nishaykichis.
[20] Cheqaqta, cheqaqtan niykichis: ‘Pipas ñoqaq kachasqayta chaskiqqa, ñoqatan chaskiwan. Pipas ñoqata chaskiqtaqmi, kachamuwaqniyta chaskin,’ nispay, nispa.
[21] Chay nisqan qhepatataqmi, Jesuspa sonqonqa phoq-nirqan. Hinan sut'inchaspa nirqan: —Cheqaqta, cheqaqtan niykichis: ‘Qankunamanta hukniykichismi hap'ichiwankichis,’ nispay, nispa.
[22] Hinaqtinmi yachachisqankunaqa, pimantachus rimashasqanta iskayaspanku, paykunapura qhawanaykukurqanku.
[23] Huknin yachachisqan, pitachus Jesusqa aswanta munakurqan, paymi, paypa qhasqonman k'iraykusqa kasharqan.
[24] Pimantachus Jesusqa rimasharqan chayta tapunanpaqmi, Simón Pedroqa payta señascharqan.
[25] Hinaqtinmi payqa, Jesuspa qhasqonman k'iraykuspa, payta nirqan: —Señor, ¿pitaqri? nispa.
[26] Jesustaq kutichirqan: —Pimanchus apichasqa t'antata qosaq paymi, nispa. Hinan apichasqa t'antata, hap'iykuspan, Simonpa churin Judas Iskarioteman qorqan.
[27] T'antata chaskisqan qhepatataqmi, Satanasqa Judasman haykurqan. Hinan Jesusqa payta nirqan: —Imachus ruwanaykitaqa, usqhayllamanpuni ruway, nispa.
[28] Mesaman k'iraykusqa kashaqkunataqmi, imapaqchus chay nishasqanta mana mayqenninkupas entiendirqankuchu.
[29] Judasqa qolqe wayaqata hap'iqmi karqan. Chaymi wakinninkuqa yuyaykurqanku: ‘Fiestapaq nesesitasqanchista rantimuy,’ otaq: ‘Wakchakunaman imallatapas qomuy,’ nispa Jesuspa ninanpaq yuyarqanku.
[30] T'antata chaskispan hinataqmi, Judasqa hawaman lloqsirqan. Tutañataqmi karqan.
[31] Judaspa lloqsisqan qhepatataq, Jesusqa nirqan: —Kunanmi Runaq Churinqa hatunchasqa kashan. Hinallataq Diospas paypi hatunchasqa kashan.
[32] Sitaqchus Diosqa Churinpi hatunchasqa kashan chayqa, Diospas, pay kikinpin payta hatunchanqa. Usqhayllamanmi payta hatunchanqa.
[33] Wawallaykuna, pisi tiempollatawanmi qankunawan kashasaq. Maskhawankichismi. Ichaqa imaynan judío runakunata nirqani: ‘Maymanchus risqaymanmi, qankunaqa mana riyta atinkichischu,’ nispay, chay hinallatataqmi kunan qankunatapas nillaykichistaq.
[34] Huk mosoq kamachikuytan qoykichis: ‘Hukkunahukkunawan munanakuychis,’ nispay. Imaynan munakurqaykichis, chay hinallatataq qankunapas hukkuna-hukkunawan munanakuychis.
[35] Sichus hukkuna-hukkunapaq munakuyniykichis kanqa chayqa, chaypin yachachisqaykuna kasqaykichista llapa runakuna yachanqaku, nispa.
[36] Simón Pedrotaq, Jesusta nirqan: —Señor, ¿maymantaq rishankiri? nispa. Jesustaq kutichispa payta nirqan: —Maymanchus risqaymanqa, manan kunan qatikuwayta atinkiraqchu. Ichaqa qhepamanñan qatikuwanki, nispa.
[37] Pedrotaq nirqan: —Señor, ¿imanaqtintaq kunanri mana qatikuyta atiymanraqchu? ¡Kawsayniytan qanrayku churasaq! nispa.
[38] Jesustaqmi payman kutichirqan: —¿Kawsayniykitachu ñoqarayku churanki? Cheqaqta, cheqaqtan niyki: ‘Kinsa kutinta mananchawanaykikaman manapuni galloqa waqamunqaraqchu,’ nispay, nispa.